Dr Ängelhoof z Baasel

47.5586777777787.5854638888889

Dr Ängelhoof

Dialäkt: Baseldütsch

Dr Ängelhoof isch e historischs Geböid in dr Schwizer Stadt Baasel. Er befindet sich in dr Groossbaasler Altstadt am Noodlebärg 4 und stoot uf dr Liste vo de Kulturgüeter im Kanton Basel-Stadt.

Gschicht

Dr Ängelhoof stammt worschinlig us em früeje 14. Joorhundert. 1477 het en dr Junker Matthias Eberler kauft. Er het en vom Remigius Faesch lo umbaue und e Brachtzimmer lo iirichde, wo spööter dr Naame Condé-Zimmer überchoo het. Bi de Friidensverhandlige 1499 zwüsche Frankriich, Ööstriich und de Äidgenosse isch in däm Zimmer dr Friidensverdraag underschriibe worde. Im Joor 1568 het dr Marco Perez, e spanische Flüchtling und Calvinist, wo Baasler Bürger worde isch, dr Ängelhoof kauft und het Glaubensflüchtling dört Asyl aabote. Die Dradizioon het dr Bernhard Burckhardt-Krug noch em Dood vom Perez witergfüert. Dr Henri de Condé, wo s Condé-Zimmer noch em benennt isch, isch 1574 e Zitli lang im Ängelhoof z Gast gsi.

Spööter het dr Johann II. Bernoulli (1710-1790) im Ängelhoof gwoont und dr Maupertuis isch dört gstorbe, won er mit em Bernoulli zrugg vo Berlin choo isch.

S Condé-Zimmer isch 1875 vollständig renowiert worde und 1950 no äinisch mit Gäld vom Arbetsrabbe. Sit 1990 isch s dütsche Seminar vo dr Uni im Ängelhoof dehäi und s Condé-Zimmer wird für Vordrääg und chliineri Veraastaltige brucht.

Im Innehoof vom Ängelhoof stoot sid öbbe zwäi Joorhundert e Brunne mit eme Stäidroog und ere Skulptur uf em Brunnestock.