Bärnhard Meyer zum Pfiil

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Dialäkt: Baseldütsch
Dr Bärnhard Meyer zum Pfiil

Dr Junker Bärnhard Meyer zum Pfiil (* 1488 z Baasel; † 1558 z Baasel), isch e Duechhändler, Ghäime Staatsroot und Gsandte vom Kanton Baasel gsi und vo 1548 bis 1558 Bürgermäister z Baasel. Bim Milidäär het er dr Rang vom ene Hauptmä und Bannerherr ghaa.[1]

Biografii[ändere | Quälltäxt bearbeite]

Härkumft[ändere | Quälltäxt bearbeite]

Bernhard Meyer zum Pfiil isch vom Gschlächt vo de Meyer zum Pfiil abgstammt, wo eso ghäisse het, wägen em Pfiil im Familiewabbe. Es het scho im 15. Joorhundert zu de riiche Familie vo Baasel ghöört. Im 15. und 16. Joorhundert häi sini Mitgliider dr Junkerditel gfüert. Er isch e Soon vom Humanist Nikolaus Meyer zum Pfeil († 1500) und vo dr Barbara zum Lufft gsi und e Brueder vom Junker Adelbärg Meyer zum Pfiil (1474–1548), wo grad vor iim dr Bürgermäister vo Baasel gsi isch.[2]

Wirke[ändere | Quälltäxt bearbeite]

Vo 1529 isch er reformiert gsi. Er het as Gwandmaa und Wäggsler gschafft und isch vo 1530 bis 1548 Rootsher vo dr Zumft zum Schlüssel gsi, äinere vo de „Herrezümft“ und as Drizääner Ghäime Staatsroot. 1548 bis 1558 isch er Bürgermäister z Baasel gsi, und under anderem au Dreier, Siibner und „Wardein“ (Münzbrüefer) an dr „Goldige Münze“. Er isch Mitgliid vom Stadtgricht, (Fümfergricht) und vom Apellazioonsgricht gsi. Im Milidäär het er as Hauptmä und Bannerher dient. Dr Bärnhard Meyer zum Pfiil het zu de füerende Ussepolitiker vo Baasel ghöört. Er isch an 190 Baasler Gsandtschaftsmandat in dr Äidgenosseschaft und im Baasler Umland drbii gsi[1] und het e füerendi Rolle bi de Gsandtschafte ins nööchere und witere Beziejigsfäld vo Baasel gspiilt.[2]

D Familie[ändere | Quälltäxt bearbeite]

Dr Bärnhard Meyer zum Pfiil isch in erster Ee mit dr Helena Bär, ere Dochder vom Duechhändler Hans Bär verhürootet gsi, wo 1515 in dr Schlacht ni Marignano as dr Baasler Bannerher gfalle isch,[3] Zumftmäister vo dr Baasler Zumft zu Safre und Schwooger vom Baasler Bürgermäister (1516–1521) Jakob Meyer zum Haas (1482–1531) gsi isch. In zwäiter Ee isch dr Bärnhard Meyer zum Pfiil mit dr Maria Wölflin verhürootet gsi, dr Dochder vom Gwandmaa Wilhelm Wöflin.[1]

Sini Söön:[4]

  • Beat Meyer zum Pfiil († 1552), verhürootet in erster Ee mit dr Christina Bischoff, denn mit dr Barbara Meyer (* 1539), wo 1557 dr Hans Jacob Keller (1531–1603) ghürootet het
  • Nikolaus Meyer zum Pfiil (1515–1550), sit 1537 verhürootet mit dr Katharina Rüdin († 1547).

Äine vom Bärnhard Meyer zum Pfiil sine Nöwöö isch dr Hans Ludwig Meyer zum Pfiil (1539–1607) gsi, e Baasler Drizääner. Vo 1559 aa isch dr Hans Ludwig mit dr Anna Frobenius (1541–1576) verhürootet gsi, dr Dochder vom bedütende Baasler Verleger Hieronymus Frobenius (1501–1563), eme Fründ vom Erasmus vo Rotterdam, und eso e Schwooger vom Ambrosius Frobenius (1537–1595).[2]

Litratuur[ändere | Quälltäxt bearbeite]

  • A. Bernoulli (Hrsg.): Die Familienchronik der Meyer zum Pfeil 1533–1656. In: Basler Chroniken 6, 1902, S. 379–422
  • W. Merz: Oberrheinische Stammtafeln. 1912, Nr. 18
  • Rudolf Wackernagel: Geschichte der Stadt Basel Band III. 1924, S. 262 f., 418
  • Paul Burckhardt: Basel in den ersten Jahren nach der Reformation, 124. Neujahrsblatt der GGG. Baasel 1946, S. 36 f.
  • H. Füglister: Handwerksregiment und Materialien zur sozialen und politischen Struktur der Stadt Basel in der ersten Hälfte des 16. Jahrhunderts. 1981, S. 338 f.

Fuessnoote[ändere | Quälltäxt bearbeite]

  1. 1,0 1,1 1,2 Samuel Schüpbach-Guggenbühl: Meyer, Bernhard (zum Pfeil). In: Historisches Lexikon vo dr Schwiiz.
  2. 2,0 2,1 2,2 Hans BernerMeyer zum Pfeil, Adelberg. In: Neue Deutsche Biographie (NDB). Band 17, Duncker & Humblot, Berlin 1994, ISBN 3-428-00198-2, S. 324 f.
  3. Hans Bär – Basler Bannerträger bei Marignano altbasel.ch
  4. Patrizier-Familien Basel: Auszug Stamm Meyer zum Pfeil (PDF; 29 kB)
Information icon.svg Dä Artikel basiert uff ere fräie Übersetzig vum Artikel „Bernhard_Meyer_zum_Pfeil“ vu de dütsche Wikipedia.

E Liste vu de Autore un Versione isch do z finde.