Barbara Bosch

Us der alemannische Wikipedia, der freie Dialäkt-Enzyklopedy
Hops zue: Navigation, Suech
D Barbara Bosch nôch-em Schbadastich fir da Neibau vom Reitlenger Theader «Die Tonne» am 1. März 2016
Dialäkt: Schwäbisch

D Barbara Bosch (* 5. Sepdembr 1958 z Stuegert) ischt a pardeilosa Kommunalpolidigere. En sellra Funkzioo isch-se seit 2003 d Obrbirgermoischdore vo dr Graußa Kreisstadt Reitlenga. Vom Januar 2011 bis Januar 2017 isch dui Frau au Präsidendin vom Stedtedag Bada-Wirdaberg gwäa.[1]

Aus ihrem Leaba[ändere | Quälltäxt bearbeite]

D Barbara Bosch ischt am 5. Sepdembr 1958 z Stuegert uf d Welt komma. Wia se ihr Abidur en dr Dasch ghet hot, hot-se noh d Handlsschual bsuacht und dui mit-ma staatlich priafda Abschluss beendet. Dô drnôch hot-se a Universideetstudiom ufgnomma. Ihre Hauptfecher send Polidikwissaschafda ond d Gschicht vo dr Konscht gwäa. Abgschlossa hot-se ihr Studiom mit-em „Magister Artium“. Scho gega Schluss vo ihrer Schualzeit ond während-em Studiom hot-se neabaher a bissle bei vrschiidene Vorwaldonga gschafft ond sich so an Doil vo ihrem Studiom finanziira kenna. Tädich gwäa ischt-se ondr andrem als Schreibkraft emma Vorzemmer, als Sachbearbeidere en dr Sozial- ond Jugendarbeit, als Honorarkraft en dr Erwachsenabildong. A Zeitlang hot-se au an Lehrufdrag an dr Fachhochschual fir Geschdaldong en Schwäbisch Gmend ghet. Dô drnôch hot se d Leidong vo dr Abdeilong Sozialarbeit beim DRK-Kreisvorband Rems-Murr kriagt. Weil-se deet ihr Sach so guad gmacht hot, ischt-se bald zor Assischdendin vom Gschäftsfihrer beim DRK-Landesvorband Bada-Wirdaberg ufgschdiiga.

Em Johr 1990 isch d Barbara Bosch zor Leidere vom stedtischa Sozialamt Fellbach ernannt worra. Als nägschda Stazioo en ihrer Karriere ischt-ra Leidong vom Perseenlicha Referat vom Fellbachr OB ibrtraga worra. Dui Stell hot-se so lang ausgiabt, bis-se dr Gmoidrôt vo Fellbach 1997 zor Beigeordnada vom OB gwehlt hot. En sellra Stellong hot-se d Bezeichnong „Birgermoischdore“ gfihrt.

Wia em Johr 2003 z Reitlenga wiidr amôl a OB-Wahl ôôgschdanda ischt, hot sich au d Barbara Bosch om dui Stell bewôrba, obwohl dr seitherig OB, dr Stefan Schultes vo dr CDU, au wiidr kandidiirt hot. D Barbara Bosch isch zwar en koira Pardei gwäa, abr trotzdem vo dr SPD ond dr FDP ondrstitzt worra. Ond was viil et fir meglich ghalda hend, ischt eidroffa: D Barbara Bosch hot s Renna gmacht. Am 3. April hot-se ihr Amt ôôdredda. Weil z Bada-Wirdaberg d Amtszeit vo de Birgrmoischtr ond Obrbirgrmoischtr nôch acht Johr auslauft, ischt em Johr 2011 z Reitlenga wiidr a OB-Wahl ôôgschdanda. Nôchdem d Barbara Bosch abr ihr Amtszeit ohne Fehl ond Tadl hendr sich brôcht hot, hot sich vo de etabliirde Pardeia näamert draut, gega d Amtsinhabere zo kandidiira. Bloß a obedeidendr Kandidat ischt gega-se ens Renna ganga. Am End isch d Barbara Bosch mit 85,6 % vo de Stemma wiidrgwehlt worra. A kloiner Scheeheitsfehler ischt gwäa, dass mr so a ehnlichs Ergebnis erwardet hot, wôrom bloß 23,8 % vo de Wehler an d Wahlurna ganga send.

D Neabaämdr vo dr Barbara Bosch[ändere | Quälltäxt bearbeite]

  • Mitgliid em Kreisdag vom Landkreis Reitlenga
  • Mitgliid em Regionalvrband vo dr Regioo Neckr-Alb
  • Mitgliid em Vrwaldongsrat vo dr Kreisschbarkass Reitlenga
  • Präsidendin vom Städtedag Bada-Wirdaberg (vo Januar 2011 bis Januar 2017)

Ihre Ehraemtr[ändere | Quälltäxt bearbeite]

  • Vizepräsidende vom Landesvrband Bada-Wirdaberg vom DRK
  • Vorstandsmitgliid vom Reitlengr Konschtvorei
  • Mitgliid em Stifdongsrat vo dr Bruadrhausdiakonii
  • Vorstandsmitgliid vo dr Stifdong „Konkrete Kunst Reutlingen“
  • Mitgliid em Kuradorium „Zeitenspiegel Reportageschule Günter Dahl“

Weblink[ändere | Quälltäxt bearbeite]

Oinzlne Nôchweis[ändere | Quälltäxt bearbeite]

  1. http://www.schwaebische.de/region/baden-wuerttemberg_artikel,-Neuer-Staedtetagspraesident-Salomon-fordert-mehr-Mittel-fuer-Schulsanierungen-_arid,10606194.html