D Landesregierig vo Baade-Württenärg

D Landesregierig vo Baade-Württebärg, in dr Landesverfassig nume Regierig, au Kabinett oder Ministerroot, isch s Läitigsorgaan vo dr Exekutive vom dütsche Land Baade-Würtebärg. D Landesregierig kümmeret sich um e Vollzuug vo de Gsetz, wo s Landesparlamänt beschliesst, und um d Verwaltig vom Land. Drüüber uuse läitet si dr Staat politisch und het e groosse Iifluss uf d Gsetzgääbig, uf dr Eebeni vom Land wie vom Bund. Si het iire Sitz in dr Landeshauptstadt Stuegert.

D Bildig vo dr Regierig

D Regierig bestoot us em Ministerbresidänt und de Minister und Staatssekretäär. Dr Ministerbresidänt wird vom Landdaag mit de Stimme vo dr Meerhäit vo sine gsetzlige Mitgliider gweelt. Er muess mindestens 35 Joor alt (Art. 46 Abs. 1 LV), aber sälber kä Landdagsabgordnete si. Vo 1968 bis 1992 het d CDU immer e Meerhäit vo de Landdaagssitz ghaa und het eläi Regierige bildet (d Kabinett Filbinger I bis IV, d Kabinett Späth I bis IV und s Kabinett Teufel I). Wenn kä Bardei en absoluti Meerhäit het, häi d Bardeie Sondierigsgsprööch abghalte und Koalizioonsverhandlige und schliesslig Koalizioone bildet. Wenn s drei Möönet lang kä Regierig het, gältet dr Landdaag as ufglööst.

Zum d Amtsgschäft chönne usüebe bestoot d Regieirg us em Staatsministerium as Behörde vom Ministerbresidänt und elf Fachministeerie:

s Staatsministerium
s Ministerium vom Innere, für d Digitalisierig und d Kommuune
s Ministerium für Finanze
s Ministerium für Kultus, Juuged und Sport
s Ministerium für Wüsseschaft, Forschig und Kunst
s Ministerium für Umwält, Klima und Energiiwirtschaft
s Ministerium für Wirtschaft, Aarbet und Turismus
s Ministerium für Soziaals, Gsundhäit und Integrazioon
s Ministerium für Ernäärig, Ländlige Ruum und Verbruucherschutz
s Ministerium der Justiz und für Migrazioon
s Ministerium für Vercheer
s Ministerium für Landesentwicklig und Woone

Liddratuur

Felix Hörisch und Stefan Wurster (Uusegääber, 2017): Das grün‐rote Experiment in Baden-Württemberg. Eine Bilanz der Landesregierung Kretschmann 2011–2016. Springer VS, Wiesbaden. https://www.springer.com/de/book/9783658148676
Felix Hörisch und Stefan Wurster (Uusegääber; 2021): Kiwi im Südwesten – Eine Bilanz der zweiten Landesregierung Kretschmann 2016 - 2021. Springer VS, Wiesbaden. https://link.springer.com/book/10.1007/978-3-658-34991-2

Weblingg

D Website vo dr Landesregierig vo Baade-Württebärg
Die Regierungen Baden-Württembergs seit 1952 im Internetangebot zur Landtagswahl 2016 (Landeszentrale für politische Bildung Baden-Württemberg)

Fuessnoote