Andreas Stoch
| Dialäkt: Undermarkgreflerisch |
.jpg)
Dr Andreas Stoch (* 10. Oktober 1969 z Hoidna) isch e dytsche Bolitiker (SPD). Är isch syt em 1. April 2009 Mitglid vum Landdag vu Bade-Wirttebärg. Vu Jänner 2013 bis Mai 2016 isch er bade-wirtebärgische Kultusminischter gsii. Syt Mai 2016 isch er Vorsitzer vu dr SPD-Landdagsfraktion. Syt Novämber 2018 isch er derzue au Landesvorsitzer vu dr SPD Bade-Wirttebärg.
Lääbe un Beruef
[ändere | Quälltäxt bearbeite]Dr Stoch isch z Geanga uf s Margarete-Steiff-Gymnasium gange un het dert anne 1989 s Abitur gmacht. Vu 1990 bis 1995 het er Rächtswisseschafte an dr Universitete Dibgenga un Haidelberch studiert. Vu dr Friedrich-Ebert-Stiftig het er Stipändium iberchuu. Är isch as Referändar am Landgricht Ellwang gsii un isch au uf d Verwaltigshochschuel Speyer gange. Anne 1997 het er syy zweet juristisch Staatsexame abglait, ab 1998 het er as sälbständige Rächtsaawalt in dr Kanzlei Bretzger Gladis Stoch z Hoidna mit em Schwärpunkt Zivil- un Wirtschaftsrächt gschafft. Sy Aawaltszuelossig ruet syt em 23. Jänner 2013.[1]
Dr Andreas Stoch isch evangelisch, ghyrote un Vater vu vier Chinder. Sy Frau isch Sonderschuellehreri.
Bolitik
[ändere | Quälltäxt bearbeite]Dr Andreas Stoch isch vu 1987 bis 1991 Juso-Kraisvorsitzende gsii. Anne 1990 isch er in d SPD yydrätte. Är isch Vorstandsmitgliid im SPD-Ortsverain Hoidna wore. Syt 2001 isch er Vorsitzende vum Hoidnemer Kraisverband vu dr SPD. Dr Stoch isch Mitgliid vum Kraisdag vum Landkrais Hoidna. Am 1. April 2009 isch dr Stoch in dr 14. Wahlperiod Abgordnete vum bade-wirttebärgische Landdag wore. Är isch doderby fir dr Abgordnete Wolfgang Staiger noogruckt, wu bi dr Landdagswahl 2006 e Zwaitmandat fir d SPD im Wahlkrais Hoidna gwunne het un 2009 us em Landdag uusgschiiden isch. Im Landdag isch er Stellverdrättende Vorsitzende vum Wahlbriefigsuusschuss un Mitgliid im Ständigen Uusschuss, im Uusschuss fir Finanzen un Wirtschaft un im Untersuechigsuusschuss EnBW-Deal gsii.
Dr Stoch isch Sprächer vu dr SPD-Landdagsfraktion fir Dateschutz un Mediebolitik. Bi dr Landdagswahl 2011 het er im Wahlkrais Hoidna mit 29,8 % vu dr Stimme ne Zwaitmandat gwunne un isch dodermit wider in dr Landdag yyzoge.[2]
Noch em Ruckdritt vu dr Gabriele Warminski-Leitheußer as bade-wirtebärgischi Kultusminischteri am 7. Jänner 2013 isch dr Stoch am 23. Jänner 2013 as ihre Noofolger im Kabinett Kretschmann I veraidigt wore[3].
Wu d SPD bi dr Landdagswahl 2016 hochi Verluscht ghaa het un di grien-rot Koalition iri Meehait verlore het, het dr Minischterbresidänt Kretschmann e grien-schwarzi Landesregierig bildet. Dr Stoch isch wie di andere SPD-Minschter*ne us dr Landesregierig uusgschide un isch druf zum Vorsitzer vu dr Landdagsfraktion gwehlt wore. Bi dr Landdagswahl 2016 het dr Stoch wider e Zwaitmandat im Wahlkrais Hoedna gwunne.[2]
Uf em SPD-Landesbarteidag z Sendelfenga isch dr Stoch am 24. Novämber 2018 zum neie Landesvorsitzer gwehlt wore. Är het 159 Delegiertestimme kriegt, 151 Stimme dr Lars Castellucci.[4]
Dr Stoch isch dr Spitzekandidat vu dr Sidwescht-SPD bi dr Landdagswahl 2021 gsii.[5] D SPD het mit 11,0 % ire schlächtschts Wahlergebnis syt dr Grindig vu Bade-Wirttebärg iberchuu. Dr Stoch isch wider iber e Zwaitmandat im Wahlkrais Hoedna in Landdag yyzoge[2] un isch vu syre Fraktion aistimmig as Fraktionsvorsitzer bstetigt wore.
Uf em SPD-Landesbarteidag am 16. Novämber 2024 z Offeburg isch dr Stoch mit 93,9 % vu de Delegiertestimme fir zwai Johr as Landesvorsitzer vu dr SPD Bade-Wirttebärg bstetigt wore.[6] Bi dr Landdagswahl 2026 kandidiert dr Stoch wider as Spitzekandidat vu dr SPD.[7]
Ehreämter
[ändere | Quälltäxt bearbeite]- Vorsitzende vum Verain Lernen Fördern e. V.
- Vorsitzende vum Verain G-Recht e. V.
- Mitgliidschafte u .a. in dr Arbeiterwohlfahrt e. V., im Anwaltsverein Heidenheim e. V., im Verein Freie Waldorfschule Heidenheim e. V., im Betreuungshilfeverein e. V., im Kreisverkehrswacht, in dr TSG Giengen un em TC Giengen.
Weblink
[ändere | Quälltäxt bearbeite]Fueßnote
[ändere | Quälltäxt bearbeite]- ↑ http://www.bretzger-rechtsanwaelte.de/anwalt_stoch.php
- 1 2 3 Landtagswahl: Gewählte Abgeordnete seit 1952 nach Geschlecht, Statistik Baden-Württemberg
- ↑ Andreas Stoch als Kultusminister vereidigt, Stuttgarter Nachrichten, 23.01.2013
- ↑ Stoch zum neuen Landesvorsitzenden der SPD in Baden-Württemberg gewählt, stern.de, 24. November 2018
- ↑ Stoch soll Südwest-SPD in Landtagswahl 2021 führen. In: stimme.de. 1. Februar 2020, abgruefen am 6. März 2024.
- ↑ Südwest-SPD bestätigt Stoch bei Parteitag als Landeschef. 16. November 2024, abgruefen am 18. November 2024.
- ↑ Tim Kukral: Baden-Württemberg: SPD-Kandidat Stoch erklärt „Kampf um Industriearbeitsplätze“ zur Priorität. In: tagesschau.de. 6. August 2025, abgruefen am 7. August 2025.