Aldo Gugolz

Dialäkt: Züritüütsch

Aldo Gugolz (2023)

Der Aldo Gugolz (* 24. Juni 1963 z Luzèèrn, Bürger vo Züri und Luzèèrn) isch en Schwyzer Reschissöör, Autor, Kameramaa und Filmproduzänt. Bikant woorden isch er mit sym Kinodokumäntaarfilm Rue de Blamage (2017), eme Film über d Lüüt, wo a de Luzèèrner Baselstraass woned oder schaffed. En ganze Schübel Prys hät er mit sym Kinodokumäntaarfilm Kühe auf dem Dach (2020) überchoo. Und de Film Omegäng (2024) isch der eerscht Film überhaupt, wo s drin um s Schwyzertüütsch und d Lüüt, wo mit em Schwyzertüütsch z tue händ, gaat.

Läbe

De Gugolz isch z Luzèèrn uufgwachse und hät as Puurscht vo 1980 bis 1984 für d Lokaalzytige gschriben und fotografiert. Nach de Matuur isch er zeerscht für äis Semeschter a d Uniwèrsitèèt Züri go Politology, Publizischtik und Komunikazioonswüsseschaft studiere. Nachane hät s en aber zum Film zoge, und er hät vo 1984 bis 1992 a de Hoochschuel für Fèèrnsee und Film z Münche d Fächer Dokumäntaarfilm und Fèèrnseepublizischtik gstudiert.

Sit doo schaffet er freipruefflich as Reschissöör und Kameramaa. Vo 2004 bis 2014 hät er dezue anen as Dozänt für Dokumäntaarfilmpraxis a de Prueffsschuel Wintertuur gleert. 2007 hät er zäme mit de Christina Caruso, ere Filmproduzäntin und Theaaterpèdagoogin, d Produkzoonsfirma revolumenfilm z Luzèèrn ggründet. De Gugolz läbt aber hauptsächli z Berlyn, und er isch mit de tüütsche Kamerafrau und Profässoorin Susanne Schüle verpaartneret.

Uuszäichnige

Prys

• Kühe auf dem Dach:
  • 2020: «Prix du Jury» für «der inovatyvscht lang Dokumäntaarfilm», Dokumäntaarfilmfestival Visions du Réel z Nyon
  • 2021: «Innerschweizer Filmpreis» vo der Albert-Koechlin-Stiftig
  • 2021: «Genziana d’oro Miglior film – Gran Premio “Città di Trento”», Trento Film Festival
  • 2021: «Diable d’or», Festival international du film alpin des Diablerets
  • 2021: «Luis Trenker Award», Dolomitale Filmfestival
  • 2021: «Prix du Jury», Festival international du film de montagne d’Autrans
  • 2021: «Special Award» vo der Art Hub Foundation, Apricot Tree Festival, Eriwan (Armeenie)
  • 2021: «Best Film», Sebastopol Filmfäscht, Kalifornie
  • 2023: «Lobende Erwähnung», Nonfiktionale – Festival des dokumentarischen Films, Bad Aibling
• Wir zwei:
  • 2009: IF Award, Fèèrnseeprys für Integrazioon, Münche

Nominazioone

• 2024 – Omegäng: Nominazioon für de «Prix du Public» a de Soleturner Filmtääg
• 2017 – Rue de Blamage: Nominazioon für de «Prix Soleure» a de Soleturner Filmtääg

Filmografy (Uuswaal)

• 2024: Omegäng (Reschy, Trèèbuech), Link
• 2023: Il mondo di Guido (Reschy, Trèèbuech)
• 2020: Anche stanotte le mucche danzeranno sul tetto / Kühe auf dem Dach (Reschy, Trèèbuech)
• 2017: Rue de Blamage (Reschy, Trèèbuech mit de Christina Caruso)
• 2011: Stets gerne für Sie beschäftigt, … (Reschy)
• 2011: Spaghetti, Sex und Videos / Verführt und Erpresst (Reschy, Trèèbuech mit em Romeo Regenass)
• 2009: Wir zwei (Reschy, Trèèbuech)
• 2001: Leben ausser Atem (Reschy, Trèèbuech)
• 2000: Hello, oder grüezi As We Say In Switzerland (Reschy)
• 1997: Zeit im Fluss (Reschy)
• 1995: Zwei Kämpfe (Reschy)
• 1993: Special Olympics (Reschy)
• 1991: Warum ist hier alles so anders? (Reschy)
• 1989: Einmal, bitte! (Reschy)
• 1988: Oedenwaldstetten II (Co-Reschy)

Weblink

• Aldo Gugolz. I: swissfilm.ch. Abgrüefft am 12. Jänner 2024.
• Aldo Gugolz. I: filmzentralschweiz.ch. Abgrüefft am 12. Jänner 2024.
• revolumenfilm.ch. Abgrüefft am 12. Jänner 2024.
• Aldo Gugolz in dr Internet Movie Database
• Aldo Gugolz bi filmportal.de