Aargauer Vornääme

D Aargauer Vornääme het dr Aargauer Lehrer Ernst Ludwig Rochholz anne 1859 imene Pricht für d Zytschrift Die deutschen Mundarten. Monatschrift für Dichtung, Forschung und Kritik zämegstelt.

Dr Rochholz het gschribe, me chön vom ene Deil vo de Vornääme gschichtlechi und mundartliche Eigeheite vo de Regioone ableite. Er het dänkt, us dr Analyse vo dr Namewält findi men öppis use über d Bsunderheite vo de lokale Gmeinschafte. Me müess drfür halt i den Archyv vo dr Regioon alli Nääme us den alte Chilebüecher und süschtige Schriftkwellen usezie und bi de Lüüt go lose wie d Nääme heisse.

Dr Aarauer Profässer erklärt i sym Bytrag, wie gwüssi Vornääme i dr schwyzertütsche Umgangssprooch vo de Lüüt dur d Deklinazioon vo Familienäme, als mundartlechi Verchlynerigsforme und grobi Abchürzige und als Übername entstande sind. Us em Fricktal bringt er es Bischpiil für en Spottvärs, wo bi de Chinder für en eint Name beliept gsi isch:

Fridli, Fridli, hänk d Hosen an’s Widli

Dr Fridli isch d Churzform vom Fridolin, em Patron vo Säckige, so wie z Zurzi us em Name vo der populäre Heilige Verena dr Meitliname «Vrendeli» woorden isch.

Und denn het dr Rochholz für die Nummere vo dr Zytschrift no e Lischte mit 222 Aargauer Vornääme zämegstelt und bi jedem anegschribe, vo was ass er chunt, und bin es baarne erklärt er d Namensgschicht no chly meh, deils mit Kwellenagabe. Das goot vo Aerli, was em jiddischen Aaron entspricht, bis zu dr Vronegg; das wäär d Veronika. Do drmit het dr Sproochforscher e schöni regionali Grundlaag für d Nameforschig und d Tieläktology usgschaffet.

Lueg au

• Bärner Vornääme
• Elsässer Vornääme

Literatur

• Ernst Ludwig Rochholz: Aargauer Vornamen. In: Die deutschen Mundarten. Monatschrift für Dichtung, Forschung und Kritik, 6, 1859, S. 305–314 und 449–461.