Martinique

E aglüegti Version vo derre Site, wo am 23. Jänner 2024 freige worre isch, basiert uff derre Version.

**Martinique**
Basisdate
Martinique as Däil vo Frankriich het ekäi äigeni Flagge	S Woppe vo Martinique
Amtssprooch	Französisch
Hauptort	Fort-de-France
Flechi	1.128 km²
Iiwohner	361.225 (1. Januar 2020)^[1]
Bevölkerigsdichti	320,2 Iiwohner pro km²
Arrondissements	4
Kanton	45
Gmeinde	34
Präfekt	Fabrice Rigoulet-Roze
Presidänt vom Regionalroot	Serge Letchimy
Presidänt vom Generalroot	Josette Manin
Währig	Euro
Zitzone	UTC-4 (Unterschiid zu MEZ (bzw. MESZ) im Winter -5, im Summer -6)
Internet-TLD	.mq
Vorwahl	+596
Charte
Charte vo Martinique
D Lag Martinique in dr Karibik
Martinique vo dr ISS us fotigrafiert

Martinique [maʀtiˈnik] (Martinique-Kreolisch Matinik oder Matnik) isch en Insle in dr Karibik und ghört zu de Chliinen Antille - gnauer gsait zu de Insle über em Wind. Si isch e französischs Überseedepartement und e französischi Überseeregion.

In dr Sprooch vo de Uriiwohner heisst d Insle Madinina (Bluemeninsle), die Bezeichnig wird au hüte no hüfig vo de Iiheimische bruucht.

Martinique isch e vollintegrierte Deil vom französische Staat und eso au Deil vo dr Europäische Union.

Geographii

Martinique lit zwüschen em karibische Meer und em Atlantische Ozean 25 km südlig vo Dominica und 37 km nördlig vo St. Lucia. Si lit öbbe 6.850 km vo Paris und 3.150 km vo New York ewäg und isch 440 km vor dr Küste vo Venezuela.

D Insle het e Lengi vo 73 km und e Breiti vo 39 km. D Küstelinie isch öbbe 350 km lang. D Insle is bärgig. Im Norde vo dr Insle lit dr Vulkan Montagne Pelée, won e Höchi vo 1.397 m het.

9,43 % vo dr Landflechi vo dr Insle isch verstedteret. Landwirtschaft wird uf 11,32 % vo dr Flechi bedriibe.