(2) Pallas

E aglüegti Version vo derre Site, wo am 19. Jänner 2022 freige worre isch, basiert uff derre Version.

(2) Pallas

Eigeschafte vum Orbit
Orbittyp	Hauptgürtelasteroid
Grossi Halbax	2,773 AE
Perihel; Aphel	2,135; 3,412 AE
Exzentrizität	0,230
Neigig vu dr Bahnebeni	34,851 °
Siderischi Umlaufzitt	4 a 226 d 2 h
Middleri Bahngschwindigkeit	17,886 km/s
Physikalischi Eigeschafte
Durmesser	574×526×501 km
Masse	2,41×10²⁰ kg
Middleri Dichti	3,28 g/cm³
Rotationsperiode	7 h 49 min
Albedo	0,159
Absoluti Helligkeit	4,13
Spektralklasse	B-Typ
Gschichte
Entdecker	H. Olbers
Datum vu dr Entdeckig	28. März 1802
Älderi Bezeichnig	-

Dialäkt: Markgräflerisch (Ebringe)

D' (2) Pallas isch mit eme middlere Durmesser vu 523 km dr zweitgrösst Asteroid im Asteroide-Hauptgürtel. Si isch am 28. März 1802 vum Heinrich Wilhelm Olbers entdeckt worre. Sofern isch d'Gstalt vu dr Pallas im e anächerend hydrostatische Glichgwicht befindet, isch es vu dr Internationale Astronomische Union plant, d'Pallas as Zwergplanet z'klassifiziere.

Entdeckig

D'Pallas isch am 28. März 1802 vum Heinrich Wilhelm Olbers als zweite Asteroid entdeckt worre, un uf die grichisch Götti Pallas Athene daift worre. D'Entdeckig isch zuefällig erfolgt, wie dr Olbers dr e Johr vocher entdeckt Asteroid (1) Ceres het ufsueche welle. Nooch dr Entdeckig vu dr Ceres het dr Olber, wie die andere Astronome zue sinere Zitt, nit demit grechnet, noch e wittere Planet zwischenem Mars un em Jupiter z'finde, wil mer glaubt het, dr vu dr Titius-Bode-Reihe vochergsaite Planet in sällem Beriich vum Sunnesystem mit dr Ceres gfunde z'ha. Dr Olbers het doher d'Hypothese verträtte, dass es sich bi dr Ceres un dr Pallas um Bruchstücker vume grössere, ussenanderbrochene Planet handele dät.

Dr Wilhelm Herschel, wo anno 1781 dr Uranus entdeckt gha het, het versuecht, dr Durmesser vu dr Ceres un dr Pallas zue bestimme, was ihm aber nit glunge isch: Die beide Objekte sin in sinem Teleskop praktisch sternförmig (also ohne messbari Usdähnig, anderst wie die klassische Planete) erschine. Dr Herschel het dorum scho 1802 vorgschlage, d'Ceres un d'Pallas as „Asteroide“ (grichisch fer „sternartig“), z'bezeichne un demit vu dr grosse Planete abzgrenze. Si Asicht isch zue sällere Zitt aber numme vu wänige Astronome deilt worre. Erscht wie um 1850 d'Zahl vu dr zwischenem Mars un em Jupiter gfundene Himmelskörper rasch angstiige isch, sin si under dr Bezeichnige „Asteroide“, „Planetoide“, „Chleini Planeten“ oder „Chleiplanete“ zämmegfasst worre.

S'anno 1803 entdeckt chemisch Element Palladium isch uf dr Asteroid Pallas daift worre.

Umlaufbahn

D'Pallas beweggt sich ime middlere Abstand vu 2,77 AE in 4,62 Johre um d'Sunne. D'Bahnexzentrizität isch mit 0,230 relativ gross: Dr Abstand vu dr Sunne variiert doher erheblich zwische 2,14 AE im Perihel un 3,41 AE im Aphel. D'Umlaufbahn isch mit 34,9° au starch gege d'Ekliptik gneigt, wodur es hüffig vorchummt, dass sich d'Pallas fernab vu dr Ekliptik am Himmel ufhaldet.

Während dr Opposition erreicht si e schinbari Helligkeit vu bis zue 7,0 mag. Si isch demit nooch dr (4) Vesta un dr (1) Ceres dr dritthellst Asteroid am Nachthimmel.

Eigeschafte

D'Rotationsperiode vu dr Pallas betrait 7 Stunde un 49 Minute. Ihri Oberflächi het e middleri Albedo vu 0,159. D'Masse isch zue 1,21×10⁻¹⁰ Sunnemasse (2,41×10²⁰ kg) bestimmt worre. Us dr Beobachtig vu Sternbedeckige het d'Grössi vu dr Pallas abgleitet werre chänne. D'Form vu dr Pallas entspricht demnooch ime triaxiale Ellipsoid mit Axelängene vu 574±10 km, 526±3 km un 501±2 km. In gueter Yberinstimmig demit isch us Beobachtige vum Infrared Astronomical Satellite e middlere Durmesser vu 523±20 km abgleitet worre.

Pallas isch demit, nooch dr Ceres, dr zweitgrösst Asteroid vum Hauptgürtel. Si wird an Masse aber sowohl vu dr Ceres, als au vu dr Vesta ybertroffe.

Sichtbarkeit

In dr folgende Tabelle isch d'Sichtbarkeit vu dr Pallas bis anno 2021 agäbe. Die schibar Helligkeit un d'Entfernig zue dr Erde beziege sich debi uf dr Zittpunkt vu dr Opposition, wenn dr Asteroid dr Erde am nächste isch un demit au am hellste erschint.

Stationär, no ruckläufig	Opposition	Entfernig	Helligkeit	Stationär, no rächtläufig	Konjunktion zue dr Sunne
2. Mai 2006	1. Juli 2006	2,523 AE	9,5 mag	24. August 2006	1. Februar 2007
6. Juli 2007	3. September 2007	2,253 AE	8,8 mag	22. Oktober 2007	29. März 2008
28. Oktober 2008	4. Dezember 2008	1,567 AE	8,0 mag	21. Jänner 2009	12. September 2009
24. März 2010	3. Mai 2010	1,940 AE	8,6 mag	2. Juli 2010	22. Dezember 2010
25. Mai 2011	29. Juli 2011	2,547 AE	9,5 mag	16. September 2011	22. Februar 2012
9. August 2012	24. September 2012	1,964 AE	8,3 mag	17. November 2012	9. Mai 2013
5. Jänner 2014	20. Februar 2014	1,236 AE	7,0 mag	23. März 2014	25. Oktober 2014
19. April 2015	11. Juni 2015	2,387 AE	9,4 mag	7. August 2015	19. Jänner 2016
18. Juni 2016	20. August 2016	2,403 AE	9,2 mag	7. Oktober 2016	14. März 2017
24. September 2017	27. Oktober 2017	1,705 AE	8,2 mag	23. Dezember 2017	5. August 2018
4. März 2019	8. April 2019	1,571 AE	7,8 mag	1. Juni 2019	2. Dezember 2019
10. Mai 2020	12. Juli 2020	2,556 AE	9,6 mag	1. September 2020	9. Februar 2021

Lueg au

Liste vu dr Asteroide

Quelle: dr englisch un dr dytsch Wikipedia-Bitrag zue dem Lemma