Zauberformel

Us der alemannische Wikipedia, der freie Dialäkt-Enzyklopedy

Under em Name Zauberformle häd vo 1959 bis 2003 i de Schwiiz es ungschribnigs Gsetz gulte für d Waal vo Bundesräät. Wärend s am Aafang (ab 1848) nume freisinnigi Bundesräät gee häd, sind 1891 de erschti und 1919 de zweiti Konservativi, 1929 der erscht BGB und 1943 de erschti Linggi gwält worde. 1953 isch de Max Wäber vo de SP zruggträtte und di Lingge sind id Opposition. D Zauberformle häd sich eso ergää, wil damals d Wääleraateil eso gsi sind. Ab 1959 isch de Bundesrat eso zämegsetzt gsi:

• 2 Freisinnigi (später FDP)
• 2 Konservativ-Chrischtlichsoziali (sit 1970 CVP)
• 2 Sozialdemokrate
• 1 BGB (sit 1971 SVP)

Im 2003i isch d Ruth Metzler-Arnold (CVP) abgwält woorde. Das isch erscht s dritt Mal sit 1848, das en Bundesraat abgwält worden isch. Zur Abwaal isches cho, will d SVP öppe gliich vill Stimmeateil wie d SP ghe hett und en 2. Sitz verlangt hett. Druffabe hetts Parlamänt unter starkem Protescht vo dr CVP und de Linke dr nid unumstritteni Christoph Blocher in Bundesroot gwählt. Syt denne giltet e sogenannti neui Zauberformle, nämli:

• 2 FDP
• 2 SVP
• 2 SP
• 1 CVP

Noch de Abwahl vom Christoph Blocher im Joor 2007 und de Waal vo de Eveline Widmer-Schlumpf a sinere Stell het d SVP ere und em Samuel Schmid droht, si us de Partei uuszschlüüsse. Drufabe isches zunere Spaltig vo de SVP cho, so as d SVP und baid SVP-Bundesrööt sind zu de noij Bürgerlich-Demokratische Partei öbertrete, so as d SVP zur Zeit kai Bundesrot het. Somit isch es froogli, öb d Zauberformle i de moderne Politik öberhopt no Gültigkait het.