Oberwinterthur
Oberwinterthur ("Oberi") isch en Stadtchreis vode Stadt Winterthur, wo 1922 igmeindet worde isch. Er bildet de Chreis 2.
Inhaltsverzeichnis |
[ändere] Gschicht
Oberwinterthur lit im Nordoste vode Stadt Winterthur uffem Chilehügel - wahrschinlich em Ort vode früeste Besiedlig vom Stadtgebiet. Mer nimmt ah, dass sich scho am Endi vode Iiszit Mensche nidergla hend.
Ortsname wiised uff e alemannischi Besiedlig vor em sibte Jahrhundert hii.
De Chilehügel hets Zentrum vode römische Sidlig "Vitudurum" bildet. Überreste uss dere Ziit findet mer na hüt im Gebiet rund um die reformiert Chile St. Arbogast - einere vode wichtigste archäologische Fundstelle im Kanton Züri. Öppe um 400 hend d Römer die Siedlig zrugglah.
De ursprüngli keltischi Name het sich über "Venterdura" (843) und "Winterduro" (856) zu "Oberunwinterture" (1180) entwicklet. Um 900 hets e Konkurrenzsituation zwüsched Oberwinterthur und "Niederwinterthur", de hütige Altstadt, geh. Durchd Kyburger het Oberwinterthur die Macht aber verlore. Vo dere Konkurrenz zügt bis hüt s "Hohlandhus", e Turmburg wo grad underhalb vode Chile staht.
Bis zur Industrialisierig sind in Oberi vor allem Wiibau, Ackerbau und Vihzucht wichtig gsi. Später sind wichtigi Firme, under anderem Sulzer, nach Oberi cho. Durch de Bahnaschluss isch de Standort wiiter begünstigt worde.
Hüt umfasst Oberi au Ricketwil, Hegi, Reutlinge, Stadel und Zinzike.
[ändere] Kultur
Jedes Jahr am letschte Wuchenänd vode Summerferie findet im alte Dorfchern s "Oberifäscht" statt. Verschiedni Verein uss Oberi stelled Verchaufsständ uff, näbed Schüssbude gits e chlinneri Achterbahn, en Autoscooter und es Chinderkarussell. Wil d Bahne nid bsunders attraktiv sind, vor allem im Verglich zum Albanifäscht, wo wenigi Wuche vorher stattfindet, ischs Oberifäst vor allem zum gmüetlich Zämesii beliebt.
In Oberi ischs bestbsuechti Museum vode Stadt, s Technorama. Det findet mer verschideni Usstellige zu wüsseschaftliche Theme wo sowohl für Chind als au für Erwachseni interessant sind. Speziell für Chind gits es Versuechslabor, womer diversi Experimänt sälber chan durefüere.
Au Oberi sälber isch kulturgschichtlich gseh spannend: de Dorfchern het alti Fachwärkhüser und Chopfsteipflaster. Verschideni römischi Usgrabige chamer under freiem Himmel besichtige, zum Bispiil ein vode wichtigste Brunne im Wohnquartier über de Chile. Usserdem gits z Oberi mehreri Brunne, wo sich durchuus azluege lohned.
Die reformiert Chile St. Arbogast isch 843 innerhalb vom ehemalige Römerkastell baut worde. De Patron St. Arbogast isch allerdings ersch im 14. Jahrhundert beleit. Wahrschinlich isch sie früener uss Holz baut gsi. Im Innere vode Chile chamer en alte Taufstei und vor allem Zeichnige ade Wänd gseh. Die sind während de Reformation wägem Bildersturm übermalt worde, aber mer hets grössteteils chöne widerherstelle.
[ändere] Läbe in Oberi
Mitem öffentliche Verchehr oder au z Fuess erreicht mer de Hauptbahnhof vo Winterthur in öppe ere Viertelstund. D Nächi zum Wald und zum Eulachpark sind fürd Freiziitgstaltig wichtig. In Oberi gits verschiedeni Schuelhüser: 13 Chindergärte, 12 Primarschuele und 3 Oberstufeschuelhüser. Zum Teil sind mehreri Schuelstufe i eim Gebäude, so gits z Oberi "nur" 20 Schuelhüser. D Kantonsschule "Rycheberg" und "Im Lee" lieged grad ade Gränze vo Oberi.
An öffentliche Verchehr isch Oberi relativ guet agschlosse. Die verschiedene Bahnhöf werdet vode wichtigste Linie agfahre, under anderem vode S12 uff Züri. De Stadtbus Winterthur fahrt mit de Linie 1, 5 und 10 uff Oberi sälber, d Linie 14 und 15 fahred uff Hegi. Oberi het e eigeni Autobahnussfahrt (A1) und Hauptstrasse, under anderem uss Frauefäld, füered is Stadtzäntrum.
In Oberi gits en Huffe Iichaufsmöglichkeite und im Dorfchern hets chlinneri Lädeli: en Claro-Lade, en Kiosk und es Kafi. Durs Jahr verteilt findet verschideni gsellschaftlichi Aläss statt, zum Bispiil e Erst-August-Fiir oders "Oberi Sounds Good", es Jazzfestival, wo allerdings nonid würklich bekannt isch. Die reformiert und die katholisch Chile planed au en Huffe Aläss, zum Teil au zäme.
[ändere] Referänze
- Oberwinterthur
- Oberi Sounds Good, Ortsverein Oberwinterthur
| Dä Artikel basiert uff ere fräie Übbersetzig vum Artikel „Oberwinterthur“ vu de dütsche Wikipedia.
E Liste vu de Autore un Versione isch do z finde. |
