Arbogast von Strassburg

Us der alemannische Wikipedia, der freie Dialäkt-Enzyklopedy
Hops zue: Navigation, Suech
E Daarstellig vom Arbogast us em 15. Joorhundert

Dr Arbogast vo Schdroossburg, au St. Arbogast, isch im 6. odr 7. Johrhundert Missionär im Elsass und denn Bischof z Schdroossburg gsi. Er isch heiliggschbroche worde.

Läbe[ändere | Quälltäxt bearbeite]

Es git nume wenig wo mä vom Arbogast vo Schdroossburg sicher weiss, und Johreszahle ghöre nid drzue. Dr Arbogast—dr althochdütsch Name bedütet dr „fremd Erb“—isch mögligerwiis z Irland under em Name Arascach[1] odr z Aquitanie im Süde vo Frankriich uf d Wält cho. Er isch wohrschiinlig im 6. Johrhundert as Missionär ins Elsass cho. Im Johr 646 (?) isch er dr Nochfolger vom Heilige Amandus as Bischof vo Schdroossburg worde[2] und het Chille und Chlöschder lo baue, drunder die erschti Kathedrale vo Schdroosburg[3] und d Schdadt gförderet. Es isch gsait worde, ass er es Buech mit Predige und Kommentar zu de Brief vom Paulus gschriibe haig. Er isch vilicht im Johr 658[4] z Schdroossburg gschdorbe. Ä langi Ziit noch siim Dod het män es Chloschder mit siim Name baut am Ort usserhalb vo dr Schdadt, won er begrabe worden isch.[5].

Noch dr Heiligschbrächig isch er dr Patron vo Rufach, Muttez und Oberwinterthur worde. Öbbe im 11. Johrhundert het män em d Chille z Muttez gweiht. Si Gedänkdag wird vo dr katholische Chille am 21. Juli begange.

Legände[ändere | Quälltäxt bearbeite]

Er het sich im Wald vo Hagenau (fr. Haguenau) niiderglo. Er het dr Sohn vom ä Dagobert, wo mä im allgemeine für dr merowingisch König Dagobert II. (öbbe 650 – 679) vo Austrasie ghalte het, won er von erä Wildsau umbrocht worden isch—noch andere Versione isch er vom Ross gfalle—widr beläbt. Druf het en dr Dagobert, wo z Irland ufzooge worden isch, zum Bischof vo Schdroossburg gmacht.

Literatur[ändere | Quälltäxt bearbeite]

  • Friedrich Wilhelm Bautz: Arbogast. In: Biographisch-Bibliographisches Kirchenlexikon (BBKL). Band 1, Hamm 1975, Sp. 205.
  • Alban Butler, Paul Burns, Butler's Lives of the Saints, Continuum International Publishing Group 2000

Weblink[ändere | Quälltäxt bearbeite]

 Allmänd (Commons): Arbogast vo Schdroossburg – Sammlig vo witere Multimediadateie

Fuessnote[ändere | Quälltäxt bearbeite]

  1. The Catholic Encyclopedia, Robert Appleton Co 1913, S.686
  2. John O'Hart, The Irish and Anglo-Irish Landed Gentry, When Cromwell Came to Ireland, Heritage Books 2007, S.595
  3. Butler & Burns, op.cit., S.162
  4. Noch dr Catholic Encyclopedia, 1913, isch er im Johr 678 gschdorbe. Dr Alban Butler und dr Paul Burns, op.cit., S.162, dänke ass er am Ändi vom sächste Johrhundert gschdorbe siig, wil si zweit Nochfolger as Bischof, dr Ansoald, im Johr 614 z Baris gsi isch.
  5. James MacGeoghegan, The History of Ireland, Ancient and Modern, J. Duffy 1844, S.193