Dr Baasler Politiker Fritz Hauser

Dr Fritz Hauser (* 3. Juni 1884 z Baasel; † 26. Merz 1941 z Bäärn) isch e soziaaldemokratische Schwizer Politiker gsi.

Lääbe und Wärk[ändere | Quälltäxt bearbeite]

Dr Fritz Hauser isch dr Soon vom ene Schniidergsell us Südbaade gsi. Er het en Usbildig zum Brimaar- und Middelschuelleerer gmacht und denn Nazionaalökonomii an dr Uni Baasel studiert. 1915 isch er zum Dr. phil. bromoviert.

Kantonaali Bolitik[ändere | Quälltäxt bearbeite]

Als Mitgliid vo dr Sozialdemokraatische Bardei het er e politischi Karriere gha: 1911–1918 isch er im Groosse Root vom Kanton Basel-Stadt gsässe, 1918–1941 isch er Regierigsroot gsi. Er het d Gründig vo der staatlige Witwe- und Waisekasse gförderet, d Iifüerig vo dr obligatoorische Umfallversicherig für Schüeler, d Schuelfürsorg, Maturidäätskürs für Erwaggseni und d Volkshochschuel. As Vorsteer vom Erziejigsdepartemänt ab 1919 het er d Baasler Bildigs- und Kultuurbolitik massgääblig brägt. In sinere Amtszit isch s Schuel- und des Uniwversidäätsgsetz rewidiert worde, dr Kunstkredit Baasel-Stadt gründet worde und si s Basler Kunstmuseum und s Kollegiehuus vo dr Uniwersidäät Baasel am Petersblatz baut worde.

Nazionaali Bolitik[ändere | Quälltäxt bearbeite]

Vo 1919 bis 1941 isch er im Nazionaalroot gsässe, und 1937–1938 si Bresidänt gsi. Noch em Aaschluss vo Ööstriich an s Nazidütschland het dr Hauser d Broklamazioon vom Bundesroot und de Frakzioone zur Nöitralidäät vo dr Schwiz understützt.^[1]^[2] Im Nazionaalroot het sich dr Hauser as Finanzpolitiker und Mitgliid vo dr Gschäftsbrüefigskommissioon e Naame gmacht.

Kultuur[ändere | Quälltäxt bearbeite]

As Mitgliid vo de Old Boys het dr Fritz Hauser 1912 an dr Delegierteversammlig z Luzärn si Verdäidigungsreed gegen e Boykott vom Schwizerische Fuessballverband ghalte. Dr Boykott isch wägen eme unerlaubte Fründschaftsspiil gegen e Fuessballclub Nordstärn Baasel verhängt worde und dank dr Reed vom Fritz Hauser wider ufghoobe worde.^[3]

Im Grubbebild Sitzung der Basler Kunstkreditkommission, wo dr Jean Jacques Lüscher (1884–1955) 1930 gmoolt het, cha mä au dr Fritz Hauser gsee.^[4]

S Graab[ändere | Quälltäxt bearbeite]

Dr Fritz Hauser isch uf em Friidhoof am Hörnli begraabe. D Grabskulptuur «Arbäiter» het dr Ernst Suter 1943 gmacht.

Liddratuur[ändere | Quälltäxt bearbeite]

Albert Oeri: Zwei Basler Politiker [Dr. V.E. Scherer und Dr. F. Hauser]. In: Basler Jahrbuch 1942, S. 107-109.
Gregor Spuhler: Hauser, Fritz. In: Historisches Lexikon vo dr Schwiiz.
Charles Stirnimann: Baumeister des Roten Basel. Fritz Hauser (1884–1941) in seiner Zeit. Basel: Christoph Merian Verlag 2021. ISBN 978-3-85616-955-8.
Reg.-Rat Dr. Fritz Hauser, Basel. (Noochruef). In: Die Berner Woche 31 (1941), Nr. 16 (19. April), noch S. 187. Digitalisat in E-Periodica.