Aquae Helveticae

Aquae Helveticae – das heisst uf latynisch: "Helvetischi Bäder" – isch e römischi Sidlig an ere Flussschlaufe vo de Limmat gsi, wo hüt s Bäderquartiir vo de Stadt Bade ligt. D Thermalquelle derte sind vo de Römer für nes Thermalbad bruucht worde.

Gschicht

Im Johr 15 vor Chrischtus hei d Römer s Mittelland bsetzt und zur Sicherig vom eroberte Biet chlineri und grösseri Militärstützpünkt aagleit. Eine vo de gröschte isch s Römerlager vo Vindonissa gsi, uf em Gebiet vo de hütige Gmeind Windisch. Ab em Johr 14 noch Chrischtus hei d Römer dann aagfange d Thermalquelle z nutze, wo numme öppe füüf Kilometer von Vindonissa wägg si gsi.

Um das Baad umme isch e Sidlig entschtande, wo Kauflüt und Handwerker sich aagsidlet hei. D Sidlig isch vermuetlich ufgäh worde, wo d Römer e chli vor oder im Johr 406 Vindonissa verloh hei.

Der Oort isch id der römische Provinz Obergermanie gsi.

Sidlig

d Inschrift vom Isistempel, wo hüt i de Sankt Sebaschtians-Chile z Wettige iigmuuret isch

Bisherigi Grabige hei zeigt, dass d Sidlig am Aafang us Holz bauet gsi isch und spöter die Holzbaute durch Steihüüser ersetzt worde sind. Bei Usgrabige hät me nöd numme am linke Limmatufer Gebäude gfunde, sondern au uf de Ännetbadner Siite. Nochgwisse isch au d Exischtenz vo eme Isis-Tempel, wome aber vonnem nid wäiss, won er genau gstanden isch. Me het vermuetet, ass er usserhalb vo de Sidling uf em Gebiet vom hütige Wettige chönt gsi sy.

Z Aquae Helveticae hei sowohl Römer wi au Helvetier gläbt und d Sidlig isch an de römische Stroosse gläge, wo vo Augusta Raurica (Augscht) und Vindonissa uf Turicum (Züri), Vitudurum (Oberwinti) und Brigantium (Breagaz) ggangen isch.

Literatur

• Martin Hartmann, Hans Weber: Die Römer im Aargau. Verlag Sauerländer, Aarau 1985, ISBN 3-7941-2539-8, S. 161–164.
• Otto Mittler: Geschichte der Stadt Baden – Band I: Von der frühesten Zeit bis um 1650. Verlag Sauerländer, Aarau 1962, S. 17–36.