Ziibelewaje

e Ziibelewaije

e Quiche lorraine, dr lothringisch Schbäckchueche

D Ziibelewaje isch äins vo de dradizionelle Baasler Fasnachtsgricht. Mä säit eso au am Hochrhy bis über e Hotzewaald äwäg. Witer östlich säit mä Zibèlèdünnè. As Zibelechueche wird si z Bäärn wääred em Zibelemärit as Oobenässe serviert. Si wird aber au im Räschd vo dr alemannische Schwiz, z Baade-Württebärg und im Schwoobeland gässe. Am Kaiserstuehl isch si as Zibelekuachä und im Elsass as Quiche odr Quiche alsacienne bekannt.

E Waje isch ä Chueche us erä dünne Underlaag vo Wajedäig, wo mä fiini Ziibeleschiibli und je noch Gebiet und Vorliebi Schbägg odr Luuch drufduet und mänggisch mit Chäs überbacht. Es isch am beschde d Ziibele vo Hand z schniide, wil, wenn si von erä Maschine gschnäzlet wärde dr Belag z matschig wird.

In de Wiibaugebiet isst mä sä bsundrigs hüfig wääred dr Wiiläsi. Mä dringgt drzue Suuser odr ä drochene Wisswii wien ä Riisling.

Rezäpt für vier Persone[ändere | Quälltäxt bearbeite]

Für ä Deig nimmt mä 200 g Wissmähl, ä halbe Teelöffel Salz und vermischd s, duet 80 g Anke, Säufett odr Margarine drzue und verriibt s, bis dr Deig gliichmässig isch. 5 bis 6 Ässlöffel Wasser und 10 g Hefi wärde drin verrüehrt, zum enä homogene Deig knätet und, zuedeggt, lot me s währed erä halbe Schdund lo ufgoh. Denn duet me s noch em Uusrolle ins iigfettete Bläch und verschdicht dr Bode mit erä Gable.

Für d Füllig nimmt män ä Ässlöffel Öl oder Säufett und duets erwerme in dr Pfanne, 100 g Schbäckwürfeli wo mä drin brötlet bis si hellbruun si, und git denn 500 g Ziibele drzue, wo in Schdreifli gschnitte si, dämpft s ganze, lot s lo abküehle und verdeilt s uf em Deig.

Für ä Guss nimmt mä 2 dl Rahm, 1 dl Milch, 2 Eier, 1 Teelöffel Salz und ä Bitz Pfäffer, vermischd alles und giesst s über d Füllig.

Mä bacht d Wäje währed erä halbe Schdund oder a Bitzeli meh im vorgheizte Ofe bi 220 Grad.