Ziibelewaaie

D Ziibelewaaie isch äins vo de dradizionelle Baasler Fasnachtsgricht, und z Bäärn wird si as Zibelechueche wääred em Zibelemärit as Oobenässe serviert. Si wird aber au im Räschd vo dr alemannische Schwiz, z Baade-Württebärg und im Schwoobeland gässe: Ziibelewaaie säit mä drum au am Hochrhy bis über e Hotzewaald äwäg, und wyter öschdlig ghäisst si Böllewääe und Bölletünne. Am Kaiserstuehl isch si as Zibelekuachä und im Elsass as Quiche odr Quiche alsacienne bekannt.

E Waaie isch ä Chueche us erä dünne Underlaag vo Waaiedäig, wo mä fiini Ziibeleschiibli und je noch Gebiet und Vorliebi Schbägg odr Luuch drufduet und mänggisch mit Chäs überbacht. Es isch am beschde, d Ziibele vo Hand z schniide, wil, wenn si von erä Maschine gschnäzlet wärde, dr Belag z matschig wird.

In de Wiibaugebiet isst mä sä bsundrigs hüfig wääred dr Wiiläsi. Mä dringgt drzue Suuser odr ä drochene Wisswii wien ä Riisling.

Rezäpt für vier Persone

Für ä Däig nimmt mä 200 g Wissmähl, ä halbe Teelöffel Salz und vermischd s, duet 80 g Anke, Säufett odr Margarine drzue und verriibt s, bis dr Däig gliichmässig isch. 5 bis 6 Ässlöffel Wasser und 10 g Hefi wärde drin verrüehrt, zum enä homogene Deig knättet und, zuedeggt, lot me s währed erä halbe Schdund lo ufgoh. Denn duet me s noch em Uusrolle ins iigfettete Bläch und verschdicht dr Bode mit erä Gable.

Für d Füllig nimmt män ä Ässlöffel Öl oder Säufett und duets erwerme in dr Pfanne, 100 g Schbäckwürfeli, wo mä drin brötlet, bis si hellbruun si, und git denn 500 g Ziibele drzue, wo in Schdreifli gschnitte si, dämpft s ganze, lot s lo abküehle und verdäilt s uf em Däig.

Für ä Guss nimmt mä 2 dl Rahm, 1 dl Milch, 2 Eier, 1 Teelöffel Salz und ä Bitz Pfäffer, vermischd alles und giesst s über d Füllig.

Mä bacht d Waaie währed erä halbe Schdund oder a Bitzeli meh im vorgheizte Ofe bi 220 Grad.

Veraschdaltige

d Basler Fasnacht – vor allem am Morgeschdraich, wenn mä au Mählsuppe isst
dr Zibelemärit z Bärn
s Ziwwl-Fescht z Achere-Fautebach
s Wii- und Ziibelechuechefescht z Bretzfeld-Adolzfurt
s Esslinger Ziibelefescht
s Ziibelechuechefescht z Kerne-Rommelshuuse
s Ziibelechuechefescht z Vogtsburg-Bickesohl

Weblink

Wikibooks: Kochbuch/ Zwiebelkuchen — Lern- und Lehrmaterialie

Zwiebelkuchen-Rezept im Rezepte-Wiki