Tatort: Himmelblau mit Silberstreifen

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Filmdate
Dütsche TitelTatort: Himmelblau mit Silberstreifen
OriginaltitelTatort: Himmelblau mit Silberstreifen
ProduktionslandDeitschland
OriginalsproochDeitsch
Erschiinigsjoor1977
Lengi90 Minute
Stab
RegieTheo Mezger
DräibuechFritz Eckart
ProduktionWerner Sommer fir da Siddeitscha Rundfunk
KameraJustus Pankau
SchnittHans Trollst
Bsetzig
  • dr Werner Schumacher als Kriminalhauptkommissar Eugen Lutz
  • dr Frank Strecker als deam sei Assischdent Wagner
  • dr Günter Strack als Enderle
  • d Claudia Wedekind als deam sei Frau Ruth
  • d Louise Martini als d Ellen Kollmann
  • dr Rolf Bogus als dera ihr Soh Alex
  • dr Klaus Herm als Erwin Seifert
  • d Edda Dohrmann-Pastor als deam sei Frau Herta
  • dr Max Strecker als Rechtsôwalt Dr. Haß
  • dr Oscar Heiler als Herr Säuberlich
  • dr Walter Schultheiß als dr Wirt Eppeler
  • d Trudel Wulle als deam sei Frau Margret
  • dr Oscar Müller als Apotheker Bolz
  • d Doris Denzel als d Frau Reschke
  • dr Ernst Specht als Bolezischt Böhle
  • dr Peter H. Schwerdt als Fahrdienschtleiter Kaiser
  • dr Martin Schwab als Heppich vo dr Schburasicherong
  • dr Achim Plato als Bankdirektr Schröder
  • dr Helmut Wieland als Werkstaddmoischtr
  • dr Fritz Eckhardt als Oberinschpektr Marek aus Wiin

Dialäkt: Schwäbisch

Tatort: Himmelblau mit Silberstreifen ischt a deitscher Fernsehfilm us dr Krimi-Reihe „Tatort“ us-em Jôhr 1977 vom Reschisseer Theo Mezger. Uruffgfihrt wôrra isch der Stroifa am 30. Januar 1977 em Erschda Programm vo dr ARD.

Handlong[ändere | Quälltäxt bearbeite]

Handla duat der Film em fikdiva schwäbischa Städtle Weilerburg mit-em Kfz-Kennzoiche WE. Deet geit’s an reicha Jonggsella namens Paul Seifert. Dr sell wuud en-ra Nacht vo-ma lauda Greisch uffgweckt. Wia-nr en sei Stub neikommt, siht’r an Eibrecher ond erkennt dean Lomba. Weil aber dr sell jetzt woiß, dass’r erkannt wôrra ischt, haut’r mit-ma stompfa Gegastand uff da Hausbesitzer nei, bis der sein ledschda Schnaufer doa hôt.

Z Weilerburg soll môrga dr Gsangvorei sei jährlichs Stifdongsfescht feira. Zo deam Ereignis ischt aus Wiin dr Oberinschbektr Marek ôôgreist. Mit-em Ermordeda seim Nôchbr Säuberlich hôt’r da Ôbed e-ma Wirtschäftle vorbrôcht ond an Haufa Virdela Wei dronka. Wia dia zwoi Manna nôch Middernacht am Seifert seim Haus vorbeikommet, sehet se, dass trotz dr fortgeschriddena Zeit noh Liacht en dr Wohnong brennt ond an dr Strôß a-ma vorsteckda Plätzle a Opel-Kadedd abgschdellt ischt – hemmlblau mit Silberstroifa ond-ra schwarza Modorhaub. Kaum hend-se des Audo entdeckt, braust’s au glei mit-ra Mords-Geschwendichkeit drvoo. Abr em Moment messet dia Mannsbilder deam Vorkommnis noh koi Bedeidong bei.

Am Dag druff trifft en Weilerburg aus Heilbronn dr Kriminal-Hauptkommissar (KHK) Lutz ei. Am Bôhof wuud’r scho vo seim Assischdenda Wagner erwardet. Am Tatort miaßet dia zwoi feschtstella, dass em Seifert sei Tresor uffbrocha wôrra ischt. Seltsam kommt de Bolezischda vor, dass d Wohnongsdiir et uffbrocha wôrra ischt, dr Schlissl dô drzua ischt beim Ermordada. Jetzt ibrleget sich dia Bolezischda, wer zom Kreis vo de Vordächdige gheera kôô: Dô wär amôl em Toda sei Bruader Erwin, wo-nen am Sonndichmôrga om Achde uffgfonda hôt, ôôgeablich om a Familia-Ôgleagaheit mit-em zo klära. Der geit vor, ibrhaupt koin Schlissl zor Wohnong zo han, was sich aber schbäder als gloga rausstellt. Weaga-ma Kredit fir sei Fodo-Gschäft schdôht’r en-ra graußa Schuld bei seim Bruader. – Vordächdig ischt au dr Ladabesitzer Enderle, wo genau geganiiber wohnt. Dr sell erklärt ondra-ma fadascheiniga Vorwand, er häb geschdern Ôbed gega halb Neine da Paul Seifert uffgsuecht. – De dridd vordächdig Persoo isch d Ellen Kollmann, em Ermordada sei Haushäldere. Dui leabt vo ihrem Môô getrennt, hôt an Schlissl zom Seifert seira Wohnong ond geit vor, en dr Tatnacht vorreist gwäa zo sei, will abr et ôôgäa, wo se gwäa ischt. Jedafalls kursiirt a Gerücht, dass-se mit-em Seifert a Vorheltnis ghet hôt. Dera ihr erwachsener Soh Alex, wo noh em Haus vo seira Muader wohnt, vorhelt sich offasichtlich ganz nervees bei de Frôga vom Lutz ond-em Wagner. A Alibi kô-nr jedafalls et nôchweisa.

A bissle schbäder kriagt dr Lutz Bsuach vom Oberinschbektr Marek. Seller Wiiner vorzehlt-em vo seira nächtlicha Beobachdong. Falls der hemmlblaue Kadedd mit-em Mord ebbes zo doa hedd, wär d Tatzeit genau om 0:30 Uhr gwäa. Dô druff geit dr Lutz seim Assischdenda da Ufftrag, nôch so-ma Audole zo suacha.

Vom Paul Seifert seim Ôwalt Dr. Haß erfehrt dr Lutz, dass dr Enderle scho lang nemme dr Besitzer vom Kaufhaus Enderle ischt, sondern bloß noh dr Gschäftsfihrer. D Frau Enderle will ihrem Môô koi Alibi geaba. Viilmehr behaubdet se vôr-em, en dr frôglicha Zeit bei ihrem Liebhaber gwäa zo sei.

Dr Ellen Kollmann ihr Fortbleiba erklärt sich bald so: Ihr Môô vorbiaßt a Strôf em Gfengnis vo Stadelheim, was bisher a guads Geheimnis gwäa ischt. Weil sui zor Tatzeit nôchweislich z Mincha gwäa ischt, scheidet se als Täterin aus.

Vom Bankdirekder Schröder erfehrt dr Lutz, dass dr Ermordede an Haufa Bargeld en seim Tresor uffbewahrt hôt, ond dass dr Enderle em Seifert Wechsel em Wert vo 60.000 Mark schulda dät. So wuud uff oimôl dr Enderle zom Hauptvordächdiga. Dr sell behaubdet abr steif ond fescht, er häb seine Schulda vollstendich zruckzahlt ond dô drnôch dia Wechsel vornichdet.

Dr Assischdent Wagner suacht enzwischa em jonga Kollmann sein Arbeitsplatz auf. Dô drbei mueß’r feschtstella, dass ganz en dr Näh a Opel-Kadedd abgschdellt ischt, wo genau uff-em Marek sei Beschreibong passt. Dr Kollmann selber abr ischt en deam Betriib et uffzofenda. Wia dr Wagner grad drbei ischt, d Belegschaft auszofrôga, siht’r, wia dr Kollmann mit-em Kadedd drvoo-fehrt. Schutz suacht der jonge Kerle em Haus vo seira Mueder. Dera sait’r, er häb bloß beim Seifert a bissle Geld steala welle, om d Schulda fir sein Kadedd abzahla zo kenna. Dô drbei wär’r vom Seifert ibrrascht wôrra. Jetzt dät’r a Stang Geld fir sei Flucht braucha. So weit kommt’s abr et: Noh en dr Wohnong wuud’r vo dr Bolezei vorhafdet ond geschdôht sei Tat.

Au des muaß noh gsait werra[ändere | Quälltäxt bearbeite]

En sellem Fachwerkhaus befendet sich d Weistub „Eppeler“, wo dr KHK Lutz sei „Hauptquardiir“ uffgschlaga ghet hôt

D Handlong vo deam Film ischt – vorgleicht mr-se em Abstand vo rond 40 Jôhr mit de neiere Tatort-Krimis – arg zahm. Was der Stroifa abr entressant macht, isch des Heifle vo dr erschda Garde vo de dômôlige schwäbische Volksschauschbiiler.

D Ussa-Uffnahma vo dr fikdiva Altstadt vo Weilerburg send z Bad Wimpfen dreht wôrra. Als „Weinstube Eppeler“ hôt s denkmalgschitzde Gebeide vo dr „Weinstube Feyerabend“ herhalda miaßa. De erscht Begegnong zwischem Lutz ond dr Frau Enderle hôt em „Café-Restaurant Birkensee“ staddgfonda. Em Ôwald Dr. Hass sei Kanzlei ischt em frihera Gaschthaus „Dominikaner“ en dr Kloschdergass uffgnomma wôrra, s Fodo-Gschäft vom Erwin Seifert „Im Marktrain 8“. D Ennaszena vom Paul Seifert seim Haus send en dr Villa vom Ondrnehmer Rolf Böhrenger z Waiblenga dreht wôrra, em Ibriga en de Studios vom Siddeitscha Rundfunk en Stuegert.

Dia Dreharbeida händ vom 16. Auguscht bis zom 21. Sebdember 1976 dauret. Bei seira Fernseh-Premiere am 30. Januar 1977 hôt der Krimi an Marktôôdoil vo 65 % ghet. S Drehbuach stammt vom eschtreichischa Schauschbiiler, Reschisseer ond Autor Fritz Eckardt, wo vo 1971 bis 1983 en de eschtreichische Beiträg zo dr Tatort-Reihe da Wiiner Oberinschpektr Marek gschbiilt ond sich selber fir dui Folge „Himmelblau mit Silberstreifen“ a Gaschtroll neigschriiba hôt.

Kridik[ändere | Quälltäxt bearbeite]

  • D Fernseh-Zeitschrift „TV Spielfilm“ moint, der Krimi wär so schbannend, dass’r au vo herzkranke Leit ohne a Gfahr ôôguckt werda kôô.

Weblink[ändere | Quälltäxt bearbeite]

Information icon.svg Dä Artikel basiert uff ere fräie Übersetzig vu dere Version vum Artikel „Tatort:_Himmelblau_mit_Silberstreifen“ vu de dütsche Wikipedia. E Liste vu de Autore un Versione isch do z finde.