Oscar Heiler

Dr Oscar Heiler (reachts) mit-em Willy Reichert als Häberle und Pfleiderer, 1960

Dialäkt: Schwäbisch

Dr Oscar Heiler (lenks) ond dr Willy Reichert als Häberle ond Pfleiderer e-ma Bronce-Denkmal vor em Friidrichsbau en Stuegert

Dr Oscar Heiler (gebora am 23. Novembr 1906 z Stuegert, wo-nr am 9. April 1995 au gstorba ischt) isch a schwäbischr Volksschauspiiler gwäa, wo meischdens komischa Rolla gschbiilt hot. Bsondrs bekannt worra isch’r mit dr Figur vom Häberle en dera Sketsch-Serie Häberle ond Pfleiderer, wo dr Willy Reichert sei Partner gwäa ischt.

Aus seim Leaba

Dr Oscar Heiler ischt am 23. Novembr 1906 z Stuegert uf d Welt komma. Sei Vaddr isch Hotelier gwäa ond hot da gleicha Vornama ghet. Dr jong Oscar isch grad amol zwoiahalb Johr alt gwäa, nô hot sei Vaddr an Herzschlag kriagt ond s Zeitliche gsegnet. Noch dr Grondschual isch dr Heiler ufs humanischdisch Karls-Gymnasium en seira Hoimetstadt ganga. En seira Jugend isch’r offa gwäa fir a sozialischdischs Gedanggaguat. Seine grauße Idol send d Rosa Luxemburg ond dr Karl Liebknecht gwäa. Zo seira Konformazioo hot’r sich a Buach gwenscht mit de Briaf, wo d Rosa Luxemburg us-em Gfängnis gschriiba hot. Wia-nr 1925 s Abi e dr Dasch ghet hot, hot’r zerscht amol a Buachhendlrlehr gmacht. S hot abr et lang dauret, bis’r gmerkt hot, dass sei graußa Leidaschaft em Theatr gilt. So isch’r em Altr vo 22 Johr zom Stuegerter Schauschbiilhaus komma. (Heitzodag hoißt des Theater Altes Schauspielhaus.) Oi Johr druf hot da Heiler an graußa Schicksalsschlag troffa: Bei-ra Prob uf dr Bihne isch’r ganz arg nôghaglet, was zor Folg ghet hot, dass mr em da reachda Fuaß bis zom Obrschenkl hot wegmacha miaßa. Trotz ällam hot sich dr Heiler et ondrkriaga lau ond wiidr Theatr gschbiilt, jetzt halt mit ma Holzfuaß.

Em Johr 1931 hot dr Heiler zamma mit seim Bihnapartner Willy Reichert dia Konschtfigura Häberle

Em Heiler sei Grab en Cannstatt

ond Pfleiderer gschaffa. De erscht Vorstellong isch am 16. Dezembr 1931 em Stuegerter Kleikonschttheatr Excelsior gwäa. Weaga deam Riisaerfolg, wo dia zwoi mit deane Figura ghet hend, hend se bald druf ens greeßere Friedrichsbautheatr gwechslet. Em Lauf dr Zeit send a baar hondrt Sketsch vo vorschiidene Autora entstanda, mit deane des Duo ibr 40 Johr lang – au uf Turneea durch da ganza deitschschbrochige Room – Erfolg ghet hot.

1976 hot dr Heiler sei Buach Sind Sie ein Schwabe, Herr Häberle? voreffentlicht. Dô dren schwätzt ond lacht’r ibr sich selbr ond ibr seine Landsleit.

Em Johr 1983 isch em Heiler sei Frau a-ma Magadurchbruch gstorba, was en schwer mitgnomma hot. A Johr schbätr isch bei-em a Krebsleida feschtgstellt worra. Sechs Opraziona ond an Haufa Kura hend-em gholfa, dass’r sein Beruaf hot wiidr ausiaba kenna. Abr trotzdem hot-en dr Krebs em schbätra Altr wiidr eigholt. Sein letschda effentlicha Uftridd hot dr Heiler em Novembr 1994 en Waiblenga ghet, wo dr domolige Siddeitsche Rondfonk (SDR) a Folg vo seira Sende-Roih Mundart und Musik ufzoichnet hot. Seine letschde Däg hot’r e-ma Stuegerter Hoschbiz vorbrocht, bis’r deet am 9. April 1995 em Altr vo 88 Johr seine Auga fir emmr gschlossa hot. Begraba worra isch’r uff-em Uff-Kirchhof en Stuegert-Bad Cannstatt.

Vor em ehemaliga nuia Friedrichsbau-Theatr (en dr Zeit vom Johreswechsel 2014 bis 2015 ischs Varieté omzoga) en Stuegert geit’s seit 1994 a Denkmal aus Bronce, wo da Oscar Heiler (lenks) ond da Willy Reichert (reachts) en ihre Rolla als Häberle ond Pfleiderer zeigt.

D Film, wo-nr mitgschbiilt hot

• 1953: Die Mühle im Schwarzwäldertal
• 1956: Die Rosel vom Schwarzwald
• 1963: Schwäbische Geschichten, a Fernsehserie vom SDR, wo-nr d Figur vom Gärtnermoischtr Pfischderer gschbiilt hot
• 1966: Guten Abend... , au a Fernsehsendong vom SDR
• 1968: Chronik der Familie Nägele, nomôl a Fernsehserie, wo-nr da Adolf Neschtle ond deam seine Nochkomma gschbiilt hot
• 1971: Tommi und kein Telefon, e dera Fernsehsendong hot’r an Pfertner gschbiilt
• 1973: Alter Kahn und junge Liebe (Reeder)
• 1975: Tatort, Folge: Schöne Belinda (Rentner)
• 1977: Meine Mieter sind die besten, Fernsehserie
• 1977: Tatort, Folge: Himmelblau mit Silberstreifen (Herr Seiberlich)
• 1995: Tatort, Folge: Bienzle und der Mord im Park (Herr Neschdele)

A baar vo de Heerschbiil, wo-nr mitgmacht hot

• 1948: Familientag bei Scheuffeles, dô hot’r da Friseer Lächele gschwätzt, d Reschii hot dr Paul Land ghet
• 1952: Die Abenteuer des Herrn Pfleiderer, au wenn en deam Heerschbiil Schwäbisch gschwätzt worra ischt, isch dr Autor dr Hess Wolf Schmidt gwäa. Dr Heiler hot da Häberle gschwätzt ond dr Willy Reichert d Titlfigur
• 1957/58: Häberle und Pfleiderer auf Weltreise vom Werner Illing. De oinzlne Folga send gwäa:

1. Die Safari
2. Das indische Abenteuer
3. Dämonisches auf Java
4. Opium, Spielhölle und Diamanten
5. Bei den Geishas
6. USA
7. Die Heimkehr

• 1976: Dr Entaklemmer, des isch d Heerschbiilfassong vom gleichnamiga Theatrstick vom Thaddäus Troll noch-em Luschtschbiil Der Geizige vom Molière. Dô hot dr Heiler da Friidrich Iblmesser gschwätzt

Weblink

• Oscar Heiler in de Internet Movie Database (änglisch)
• Vorschiidene Bildr vom Oscar Heiler
• Kurzbiografii bei stuttgart-im-bild
• S Manuskript vo-ra Sendong ibr da Oscar Heiler vom SWR us-em Johr 2006