Trudel Wulle

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Dialäkt: Schwäbisch

D Trudel Wulle (* 10. Oktobr 1925 z Heilbronn) ischt a deitscha Schauschbiilere, wo de meischde Leit hauptsächlich vo ihre schwäbische Rolla vom Fernseha her kennet.

Aus ihrem Leaba[ändere | Quälltäxt bearbeite]

D Trudel Wulle ischt am 10. Oktobr 1925 z Heilbronn uf d Welt komma, wo se au ihr Kendheit ond Jugend vrbrôcht hot. Em Johr 1944 hend ihre boide Eltra bei-ma Luftôgriff s Leaba vorlaura. Nôch ihrer Ausbildong zor Schauschbiilere hot d Trudel Wulle zerscht amôl a Engagement am Stadttheater vo ihrer Hoimatstadt kriagt. Dô drnôch hot se Rolla beim Stuegerter Volkstheater gschbiilt. Deet hot se ondr andrem ihrn Kollega Walter Schultheiß kennaglernt. Zamma send dia zwoi en de Operedda Maske in Blau ond Im weißen Rössl uf dr Bihne gschdanda. S hot et lang dauret, bis boide gmerkt hend, dass-se firanandr beschdemmd send. Drom hend se sich 1950 s Jô-Wort gäa.

Wia fenf Johr schbätr dr Soh Götz uf d Welt komma ischt, hot d Trudel Wulle au graußa Zeit lang ufs weitre Schauschbiila vrzichdet. Erscht em Johr 1963 hot se wiidr Rolla ôgnomma, desmôl beim Fernseha, en de Schwäbische Geschichten vom dômôliga Siddeitscha Rondfonk, wo se zamma mit ihrem Môô a Neabaroll gschbiilt hot. Em Lauf dr Zeit send noh an Haufa Uftridd en andre Fernsehschbiil ond –seria drzuakomma. Oft hot mr se au en schwäbische Heerschbiil erleaba kenna, wo em Landesstudio Diibenga vom dômôliga Sidweschtfunk produziirt worra send.

Em Johr 1992 isch d Trudel Wulle – zamma mit ihrem Môô – vo dr Mundartgesellschaft Württemberg e. V. mit dr Friedrich-E.-Vogt-Medaille auszoichnet worra.

D Fernseh-Film ond Seria, wo se dren mitgschbiilt hot[ändere | Quälltäxt bearbeite]

  • 1963: Schwäbische Geschichten, a Fernseh-Serie om-an schwäbischa Birgermoischtr mit-em Willy Reichert en dr Hauptroll; d Trudel Wulle hot dô dren d Keche Anna gschbiilt.
  • 1968: Chronik der Familie Nägele, a Fernseh-Serie; d Trudel Wulle hot en dr Folge Anno 1914 mitgschbiilt.
  • 1972: Ein Chirurg erinnert sich, a Fernseh-Serie, wo se en dr Folge Zweierlei Diagnosen a Bediinong gschbiilt hot.
  • 1982 bis 1986: Der Eugen, a 68-doiliga TV-Serie om-an schwäbischa Wengerter, wo ihr Môô d Titlroll gschbiilt hot.
  • 1983: Köberle kommt, en dera Serie hot-mr se en zwoi Folga seha kenna.
  • 1973: Stuttgarter Blüten, a legendärer Tatort-Krimi, wo se a Zeigin gschbiilt hot.
  • 1977: Himmelblau mit Silberstreifen, a weitrer Tatort-Krimi.
  • 2000: Bienzle und das Doppelspiel, nôch 23 Johr Pause wiidr amôl an Tatort.
  • 2002: Bienzle und der süße Tod, dr virde Tatort, wo se a Roll dren kriagt hot.
  • 2005: Berlin, Berlin, en dera TV-Serie hot se en dr erschda Folge vo dr virda Staffel, wo da Titl Stuttgart, Stuttgart ghet hot, a alda Frau gschbiilt.
  • 2009 bis 2010: Laible und Frisch, a Fernseh-Serie vom Sidweschtrondfonk; bisher send zwoi Staffla mit jeweils sechs Folga dreht worra ond en älle hot se – zamma mit ihrem Môô – mitgschbiilt.
  • 2012: SOKO Stuttgart (oi Folg)

Litradur[ändere | Quälltäxt bearbeite]

  • Götz Schultheiß, Hamlet mit Apfelmus. Walter Schultheiß und Trudel Wulle auf der Bühne und zu Hause, 2007, ISBN 978-3-89850-156-9

Weblink[ändere | Quälltäxt bearbeite]

Information icon.svg Dä Artikel basiert uff ere fräie Übersetzig vu dere Version vum Artikel „Trudel_Wulle“ vu de dütsche Wikipedia.

E Liste vu de Autore un Versione isch do z finde.