St. Peeter

De Sankt Peeter vom Platz bim Grossmöischter us gsee

De Sankt Peeter isch eini vo de drü grosse Chile i de Altstadt vo Züri. Är stoot uf de Süüdsyte vom Hoger, wo linggs oben a de Limet liit, em Lindehoof, nid wyt weg vom Fraumöischter.

Gschicht

De hütig Sankt Peeter isch zum grosse Deil ane 1706 bout worde. Vorheer häts a dere Stell aber scho sid em früene Middelalter en Chile gha, di erschti isch ane 857 inere gschichtleche Kwelle erwäänt. D Archäolooge händ d Grundmuure von ere Chile gfunde, wo öpe im 8. oder im 9. Joorhundert do gstanden isch. Vo de spootromanische Chile usem 13. Joorhundert sind hüt no de Choor und de Durm vorhande.

De Sankt Peeter isch scho im Middelalter, also vor de Reformazioon, d Chile vo de Stadtpfarrei vo Züri gsi, und au spöter isch r e wichdegi Zürcher Pfarrchile blibe. De Sankt-Peeter-Pfaarer Rudolf Gwalter isch de Schwigersoon vom Ulrich Zwingli und Antistes vo de Zürcher Chile gsi.

D Uur ufem Chiledurm hät 1538 vier grossi Zifferebletter auf allne Syte übercho; si händ mee als 8 Meter Durchmässer und sind die gröschte Durmzifferebletter vo Europa. Bis is 18. Joorhundert isch das s einzig öffentlich Zyt vo Züri gsi.

Im Durm sind föif Glogge, wo de Jakob Keller ane 1880 ggosse hät.

Bilder

• 
  d St.-Peeter-Hoofstatt
• 
  dr St. Peeter um 1700
• 
  d Chile vo inne
• 
  d Orgele vo 1974

Literatur

• Peter Ziegler: St. Peter in Zürich. Von den Ursprüngen bis zur heutigen Kirchgemeinde. Züri 2006.

Weblink

 Commons: St. Peeter z Züri – Sammlig vo Multimediadateie

• Gschicht vo dr evangeelisch-refermierte Chilegmäind Züri

47.3711111111118.5408333333333