Im Schönegrond

Schönengrund
	Wappe vo Schönengrund
Basisdate
Staat:	Schwiiz
Kanton:	Appezell Usserrhode (AR)
Bezirk:	(de Kanton kännt sit 1995 ke Bezirk me)
BFS-Nr.:	3003
Poschtleitzahl:	9105
UN/LOCODE:	CH SHB
Koordinate:	735174 / 243265Koordinate: 47° 19′ 35″ N, 9° 13′ 37″ O; CH1903: 735174 / 243265
Höchi:	844 m ü. M.
Flächi:	5,19 km²
Iiwohner:	545 (31. Dezämber 2022)
Website:	www.schoenengrund.ch
Charte
	Charte vo Schönengrund

Im Schönegrond ischd e politischi Gmeend im Henderland vom Kanton Appezäll Osserroode i de Schwiz.

Geografii

Im Schönegrond lid bhabe a de Hoptstross Nr. 8 zwösched Peterzäll ond de Waldstatt. Es wörd o uf däre Strecki dor s Postauto erschlosse.

Nochbergmeende sönd Neckertal, Schwöllbronn, Urnäsch ond Hemberg. Es ischd bis 1992 en Sesselilift uf de Hochhamm, em 1'275 m höche Husberg vom Schönegrond, ufi gfaare.^[2] Hüt louft me hald ufi und cha dobe bi schönem Wätter d Uusicht vor oder i de Wörtschaft gnüüsse.

Gschicht

Im Johr 1268 werd de Ort Zem Schönengrund s erschtmol erwähnt. Dozmol häts no zo Urnäsch ghört, wo gad of de andere Site vom Hochhamm lit ond mit eme chlinne Strössli z erreiche ischt. D Gmeend i de hütige Form ischt entstande, wo sich 1836 de Hushalt vo de reformierte Cherchgmeend und s Guet vo de öffentliche Gmeend trennt häd. Da ischd im Osserroodische di erscht Gmeend gse, wo dia Trennig gmacht häd.

D Schüeler vo de Primarschuel werdid noch em Sangaller Lehrplan onderichted, wel si sed 1868 för d Oberstufe uf Peterszäll i d Sekundarschuel gönd. Wel s Nochberdorf Wald SG sid em 19. Johrhondert all me gwachse ond mit Schönegrond praktisch zämegwachse ischd, häd me 1973 de Zwäckverband Primarschuel Schönegrond-Wald gröndet. S Schuelhuus met em Chindergarte stood z Schönegrond. Dia kantonsöbergrifend Zämeärbed ischd schono näbis Bsondrigs.

Näbed em Vercheersverein gids no me Verein i dem Doppeldorf, wo i erem Name beedi Dorfnäme dinne hend, also Schönegrond-Wald. D Poststöll ond Raiffisebank vo Schönegrond stönd öbrigens uf Walder Bode. Di verböndend Gränze zwösched de beede Dörfer Schönegrond und Wald ischd mit wenige Uusnaame de Tüüfebach.

Bevölkerig

Quälle: Bundesamt für Statistik 2005^[3]

Joor	1850	1860	1870	1880	1888	1900	1910	1920
Iiwohner	609	727	792	727	736	661	699	637
Joor	1930	1941	1950	1960	1970	1980	1990	2000
Iiwohner	538	451	502	450	384	404	434	459

Dr Uusländeraatääl isch 2010 bi 4,2 % gläge.

Religion

15,5 % vo de Iiwooner sönd em Joor 2000 römisch-katholisch gsii, 73,4 % evangelisch-reformiert.

Politik

De Gmäändspresidänt vom Schönegrònd isch de Hans Brunner (Stand November 2017).

Wertschaft

D Arbetslosigkäät isch em Joor 2011 bi 2 % gläge.

Sprooch ond Dialekt

Bi de Volkszellig 2000 hend vo de 459 Iiwoner 97,8 % Düütsch als Hòuptsprooch aagèè, 0 % Franzöösisch, 0 % Italienisch ond 2,2 % anderi Sprooche.

De hochalemannisch Dialäkt vom Schönegrònd ghöört zue de Oschtschwiizer Dialekt.

D Ortstafle vo Wald-Schönegrond, wäme vo Peterszäll här uf Wald ie fahrt.
D Ortstafle vo Schönegrond-Wald, wäme vom Bächli-Hembärg här uf Schönegrond ie fahrt.
D Ortstafle vo Wald-Schönegrond, wäme vo Wald i Richtig Waldstatt oder Schwöllbronn usi fahrt.