Röselichranz

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

Dr Röselichranz isch es Liederbuech vo dr Schwiiz.

Dr ganz Titel vo däm Band, wo im Morgarte-Verlag z Züri anne 1942 usecho isch, heisst «Röselichranz. Volkskinderlieder der Schweiz». Dr Zürcher Musiker Alfred Stèèrn hät’s zäme mit sinere Frou Klara Stèèrn gmacht. Die vile Zeichnige drinn sind vo dr Grafikerin Berta Tappolet (1. Jänner 1897 bis 21. Juli 1947).[1]

Deil Lieder sind vo bekannte Dichter, bi vil anonyme Värsli weiss men aber nid wär se z’erscht agfange het de Chinder vorsäge. Bi de meischte vo dene Lieder sind Musignoote drby und es isch aggèè, us welem Schwiizer Kanton si sind.

Ganz z hinderscht im Büechli cha me gseh, us was für Kwelle s Stèèrns d Lieder und d Melodie gnoo händ. Da drunder sind öppe em Erwin Burckhardt sini Schwiizer Chinderlieder, wo z Aarau usecho sind; em Alfred Leonz Gassme sis Buech Das Volkslied im Luzerner Wiggertal und Hinterland vo 1904; dr Rööseligarte vom Otto vo Greyerz; em Grolimund sini Soledurner und Aargauer Lieder; s Ringe ringe rose vom Carl Hess, s Alemannische Liederbuech vom Rudi Keller, wo anne 1938 z Fryburg im Briisgau usecho isch; d Chüereie und Volchslieder, wo dr Gottlieb Jakob Kuhn gsamlet und useggä het; vom Ernst Ludwig Rochholz s Alemannische Chinderlied; em Otto Sutermeister sini Anthology vo dr alemannische Mundartliteratur; vom Ludwig Tobler s grosse Buech über d Volchlieder; au vom Schwiizerische Volchsliedarchyv z Basel sind deil Nummere, und anders chunt vom Ghöresääge.

D Liedli und Värsli sind in drizää Kapitel püschelet. Das sind:

  • Nina nina Wiegeli
  • Allergattig Tierli
  • gige gige Tänzli
  • Gott Lob und Dank für Spis und TRank
  • Härli rupfe, Öhrli zupfe
  • Ringe ringe Reie
  • Engeli Engeli uf em Tor
  • Pure und Handwerkerlüt
  • Gspassigi Sache zum Singe und Lache
  • Heile heile Säge
  • Vo Sunne, Räge, Wind, vo Bäum und Blueme
  • Rite rite Rössli
  • Vo allerlei Musikante

Fascht es halb Dotze nöji Uuflaage sind vom Suurländer z Aarau sid 1963 usepraacht worde.

Fuessnoote[ändere | Quälltäxt bearbeite]

  1. Biografy vo dr Berta Tappolet