s Schwiizerische Volchsliederarchyv

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

S Schwiizerische Volchsliederarchyv isch es Archyv, wo zu dr Uni Basel ghört.

Das Archyv isch ane 1906 vo dr Schwiizerische Gselschaft für Volkskund ggründet worde. Dä Veräin het wie me das im Ussland scho gmacht het au i dr Schwiiz welle d Liedkultur undersueche; und so wie d Volchskundler alti Materiaalie us dr Sachkultur zämeträit und beschribe händ, isch es trum ggange au d Lieder ufzschrybe und z erforsche. Me het dozmol versuecht d Volchslieder düütlech vo de Kunschtlieder z underscheide, und es isch d Mäinig gsi, d Wärch us em Volch wèère alls anonyms Kulturguet, wo nur müntlech überliferet würdi, und me müess das wo no im Land uss bekannt isch go ufnää und feschthalte.

Di Schwiizerischi Gselschaft für Volkskund het über d Präss und mit Rundschrybe a vil Veräin derzue ufgruefe, me sell d Lieder em Archyv schicke. Das Projäkt het e grosse Erfolg gha. Us alne Deil vo der Schwiiz sind Brief uf Basel choo, und s Volchsliedarchyv het mit dr Zyt e Samlig vo öppe 31'000 deutschsproochige Lieder (hoochdüütschi und schwiizerdüütschi), öppe 3'200 Lieder us dr Wälschschwiiz, 1'400 usem Tessin und 1'200 rätoromanischi Lieder zämetreit. Derzue ane het s Volchsliederarchyv es baar hundert Schallpladde und alti Tonbänder mit Uufnahme vo Lieder.

Weblink[ändere | Quälltäxt bearbeite]