Dr Baasler Petersblatz

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Petersblatz
Wappen Basel-Stadt matt.svg
Blatz z Basel
Petersblatz
Dr Brunne mit dr Statue vom ene Stachelschütz näben em Kollegiehuus
Basisdaate
Ort Basel
Aagläit 1277
Stroosse, wo in Blatz iinechömme Bernoullistrooss
Petersgraabe
Spalegraabe
Bauwärk S Kollegiegeböid vo dr Uniwersidäät Baasel
s Wildt’sche Huus
S Faeschsche Fideikommisshuus
Dr Grabenegg-Brunne
S Huus zum Grabenegg
S Stachelschützehuus
D Willa am Petersblatz 12
Nutzig
Nutzergrubbe Määrt, Mäss
Dialäkt: Baaseldütsch

Dr Petersblatz befindet sich im Vorstedtgwardier in dr Schwizer Stadt Basel. S Kollegiegeböid vo dr Uniwersidäät Baasel befindet sich am Blatz. Uf em Blatz sälber finde reegelmäässig Määrt statt, u. a. jeedi Wuche e Floomäärt. An dr Herbstmäss isch er äine vo de Blätz, won e Hufe Lüt aanechömme.

Gschicht[ändere | Quälltäxt bearbeite]

Usschnitt us dr Stadtaasicht vo Basel vom Matthäus Merian em Eltere, 1642.[1] Dr Petersblatz isch in dr Middi in dr undere Helfti vo däm Bild. Uf em Blatz si e Hufe Böim gstande, in de Egge im Nordweste und Südoste het s Brünne.

Dr Petersblatz isch im Joor 1277 vo de Choorheere zu St. Peter as Baumgaarde vor dr domoolige Stadtmuure aagläit worde. Es het do Linde, Aiche und Ulme ghaa und d Est vo de Laubböim si in d Bräiti zooge worde, so dass si im Summer e Hufe Schatte gee häi.

Illustrazioon vom Matthäus Merian

Im Joor 1286 isch dr Blatz as Däil vom Stadtgebiet anerkennt worde und isch en Art öffentlige Park und Sportblatz gsi. Noch em Baasler Ärdbeebe 1356 isch dr Petersblatz e Zit lang e Määrtblatz gsi und isch eso seer früe en öffentlige Blatz worde.[2] D Lüt si sich dört go vergnüege, aber es häi au milidäärischi Üebige und Waffeninspekzioone dört stattgfunde, wie au Spiili und Wettkämpf, won e Hufe Lüt si cho bschaue. Um e Blatz ume si no di noo verschidnigi Geböid baut worde, wie s Stachelschützehuus im 15. Joorhundert, wo s en Armbrustschiesshalle ghaa het, und 1441 s Korn- und Züüghuus.[3] Dr Blatz het sich immer witer entwigglet und het 1779 am Nordostegge e Brunne überchoo.

S Wildt’sche Huus am Petersblatz

Im Joor 1788 het dr Ardilleriikommandant Wilhelm Haas dr Blatz nöi lo gstalte und 1863 het dr Brunne im Südwestegge e Standbild vom ene Stachelschütz überchoo, wo dr Heinrich Rudolf Meili gmacht het.

Im 18. und 19. Joorhundert het sich s Gsicht vom Gebiet um e Park ume veränderet, verschidnigi Geböid si abbroche worde und mä het sä mit vornäämere ersetzt. Dr Markgräfisch Hoof, dr äinzig fürstligi Barockbalast in dr Schwiz isch baut worde, wo vo 1698 bis 1705 d Residänz vom Friedrich Magnus vo Baade-Durlach gsi isch, wo dä sich vor de Franzoose wäärend em holländische Chrieg und denn wäärend em pfälzische Erbfolgchrieg uf Baasel zruggzooge het und sis Land vo do us regiert het, dr Holstäinerhoof und s Wildt’sche Huus, wo dr Johann Jacob Fechter baut het. Dört wo dr Gottesacker gsi isch, isch dr alti Botanischi Gaarde vo dr Uniwersidäät Baasel aagläit worde.

Litratuur[ändere | Quälltäxt bearbeite]

  • Reclams Kunstführer Schweiz, Philipp Reclam Jun. Stuttgart, 1966
  • François Maurer-Kuhn: Kunstführer Kanton Basel-Stadt, Büchler Verlag, 1980, ISBN 3-7170-0183-3
  • Basler Stadtführer, Friedrich Reinhardt Verlag Basel, 2001, ISBN 3-7245-1131-0

Weblingg[ändere | Quälltäxt bearbeite]

 Commons: Petersplatz, Basel – Sammlig vo Multimediadateie

Fuessnoote[ändere | Quälltäxt bearbeite]

  1. Merian Basel 1642.jpg
    Uf dr Aasicht vom Merian vo 1642 gseet mä dr Petersblatz mit sini Böim rächts uf em Bild.
  2. Fritz Meier: Basler Heimatgeschichte. Lehrmittelverlag des Kantons Basel-Stadt 1974, Site 512 f
  3. Peter Ochs: Geschichte der Stadt und Landschaft Basel, Decker, 1821, 5. Band, S.87
Information icon.svg Dä Artikel basiert uff ere fräie Übersetzig vum Artikel „Petersplatz_(Basel)“ vu de dütsche Wikipedia. E Liste vu de Autore un Versione isch do z finde.

47.5594444444447.5830555555556Koordinate 47° 33′ 34″ N, 7° 34′ 59″ O; CH1903: 610871 / 267647