Heinrich Rudolf Meili

Us der alemannische Wikipedia, der freie Dialäkt-Enzyklopedy
Dr Elisabethebrunne, im Hindergrund dr Durm vo dr Elisabethekiirche
Dialäkt: Baseldütsch

Dr Heinrich Rudolf Meili (* 13. Merz 1827 z Binnige, † 23. August 1882 z Binnige) isch e Baaselbieter Bildhauer gsi.

Lääbe und Wärk[ändere | Quälltäxt bearbeite]

Dr Meili isch dr Soon vom Heinrich Meili und vo dr Katharina geb. Rufer gsi. Er het e Leer as Holzbildhauer z Arlese und z Freiburg gmacht, und het e Zitli an dr Kunstakademii Münche under em Ludwig Michael vo Schwanthaler gleert. Wo dä 1848 gstorbe isch, isch dr Meili zrugg uf Binnige. 1853 het er d Katharina Brüderlin geboreni Riggebach ghürootet, d Dochder vom Johann Jakob Riggebach. Vo de früeje 1860er Joor aa isch er Leerer an dr Baasler Zäichnigsschuel gsi.

Er het e Hufe dekorativi Aarbäite as Bildhauer gmacht, wie die monumentale Grubbe "Handel" und "Industrii" für e Baasler Centralbaanhoof (1863, spööter zerstört) oder d Larve an dr Bank in Baasel (um 1858), e Dänkmol für die verschüttete Chinder vo Hellike uf em Friidhoof dörte und klassizistischi Büste, z. B. äini vom Johann Caspar vo Orelli 1852 in dr Aula vom Zürcher Polytechnikum. Under de Wärk vom Meili, won er noch fremde Entwürf gmacht het, isch vor allem d Brunnefigur "Elisabeth vo Thüringe" (1861-63) z Baasel vo Bedütig, won er noch eme Gmäld vom Hans Holbäi em Eltere gmacht het.

Kwelle[ändere | Quälltäxt bearbeite]

Weblink[ändere | Quälltäxt bearbeite]

 Commons: Heinrich Rudolf Meili – Sammlig vo Multimediadateie