Organisation fir s Verbot vu chemische Waffe

Us der alemannische Wikipedia, der freie Dialäkt-Enzyklopedy
Logo vu dr OPCW
Sitz vu dr OPCW z Den Haag

D Organisation fir s Verbot vu chemische Waffe (ängl.: Organisation for the Prohibition of Chemical Weapons, OPCW) isch en autonomi internationali Organisation, wu dur bsunderi verdragligi Beziehige dr Verainte Natione aagschlossen isch. Si iberwacht d Yyhaltig un Umsetzig vu dr Chemiwaffekonväntion. Si lait d Rammebedingige fescht un het e Kontrollreschim mit wyte Vollmachte.

D OPCW het am 28. April 1997 ihre Arbet ufgnuu. Si het ihre Sitz z Den Haag/Niderlande. Generaldiräkter isch dr tirkisch Diplomat Ahmet Üzümcü. Mit em Bydritt vu Somalia, wu am 28. Juni 2013 in Chraft drätten isch, ghere 189 Staate dr Organisation aa. Dodermit hän nume sibe Staaten d Chemiwaffekonvention nonig ratifiziert: Ägypte, Angola, Israel, Myanmar, Nordkorea, Sidsudan un Syrie.

D Ratifizierigsstaate sin verpflichtet, alljohr e Bricht iber d Maßnamme zue dr Umsetzig vu dr Konväntion aazlege. As Glaich zue dr OPCW mien alli Verdragsstaate ne Informationsbherde nänne. Z Dytschland ibernimmt s Uuswärtig Amt die Funktion, z Eschtrych isch s Bundesminischterium fir Wirtschaft un Arbet. S Kontrollreschim bstoht us unabhängige Inschpäktore, wu uuaagmäldete Militäraalage, zivili Induschtribedrib un Laboratorie bsueche derfe un d Vernichtig vu chemische Waffe iberwache. Z Dytschland wäre d Induschtrikontrolle dur s Bundesamt fir Wirtschaft un Uusfuhrkontroll durgfiert.

Finanziert wird d Organisation dur Mitglidsbydreg, wu an dr gängig Verdailigsschlissel vu dr Verainte Nationen aaglähnt sin. Dodermit sin d USA mit 22 % dr grescht Gäldgeber. Derno chemme Japan mit 19,5 % un Deutschland mit rund 10 %. S jehrli Gsamtbudget lyt bi rund 60 Millionen Euro.

Am 11. Oktober 2013 isch dr Organisation dr Friidesnobelbryys zuegsproche wore.[1]

Weblink[ändere | Quälltäxt bearbeite]

Fueßnote[ändere | Quälltäxt bearbeite]

  1. Nobelprize.org: The Nobel Peace Prize 2013.
Dä Artikel basiert uff ere fräie Übersetzig vum Artikel „Organisation_für_das_Verbot_chemischer_Waffen“ vu de dütsche Wikipedia. E Liste vu de Autore un Versione isch do z finde.