Mundartrock

Dr Mundartrock isch e Musigrichtig.

Es isch Rockmusig, wo d Tegscht vo de Lieder in ere tüütsche Mundart gschribe sind. Dr Name für die Aart vo Musig chunt bsunders im alemannische Sproochruum vor, wil doo vil Bänds statt em dominierenden Änglisch ebe iri eigene Tieläkt pruuche bim Singe.

Deil Künschtler vo dere Musigrichtig schaffen als Singer-Songwriter.

Im Jänner 2018 het bim Weppewäärb vom Schwiizer Radio SRF 3 um de bescht Schwiizer Rocksong s Mundartlied Prada vo dr Oschtschwiizer Bänd Knöppel gwunne.

zu was dr Mundartrock ghört

Me cha dr Mundartrock als en Undergrubbe vo dr Mundartmusig aluege.

Es git au no öppe dr Name Alperock, wil vil vo dene Musiker i dr Nöchi vo den Alpe läbe und Musig mache, psunders i dr Tüütschschwiiz.

D Mundartgselschaft het Musigträffe Alemannerock organisiert. So Musig macht d Rockbänd Luddi vo Birchèdorf im Schwarzwald, wo im Joor 2002 gründet worden isch und anne 2014 dr Chlykunschtpryys vo Bade-Württebärg übercho het.

Und no en andere Begriff, wo dr Mundartrock au drzue basst, isch dä vo dr nöije Volchsmusig.

wie-n er entstanden isch und was drzue ghört

dr Polo Hofer und syni Schmätterbänd im Jahr 1988

Me seit, die Musig sig us der Bewegig vo de Bärner Liedermacher, me het ne d Bärner Troubadours gseit, und em Styl vom Mani Matter use choo. I dere Zyt isch au dr Zürcher Toni Vescoli en Sänger vo nöie Mundartlieder gsi.

Denn isch dr Polo Hofer mit Rumpelstilz ufträtte und het bsunders d Tegscht gsunge vom Hanery Amman, wo ane 2018 gstorben isch. Anderi Gruppe sind d Minstrels (1967–1974) und Span (ggründet 1972) mit em Roland Zoss. Wyteri Gruppe vo Bärn sind sid de 1990er Joor: Züri West, Patent Ochsner (mit em Frontmaa Büne Huber) und Stiller Has. Um d Wändi vom Joortuusig het dr Gölä vil Erfolg gha. Musig bsunders für Chinder het Schtärneföifi (1995), wo us dr Band Baby Jail usecho isch. D Bärner Bänd Fusion Square Garden het dr Mundart-Reggae ufproocht.

Schwiizerdütschi Musig vo deren Aart chunt au vo Plüsch, vom Blusbueb, vo dr Sina, vo Mash, em Florian Ast und em Adrian Stern, vo Piggnigg, Aeywaeg (2003), cüül (2006) und Lockstoff. Au d Sandee isch e Schwiizer Mundartsängerin. Grad i verschidene Sprooche, uf Bärndütsch, Änglisch und Französisch, git dr Stephan Eicher grossi Konzärt.

I dr Schwiiz het au dr Rap mit Mundarttegscht scho e schöni Tradizioon. Zerscht händ zwar au d Schwiizer Räpper uf Änglisch gsunge, aber vil vonne denn immer mee im Tieläkt. Me chan a P-27, dr Gimma und d Black Tiger dänke. Klangtastisch isch e Pop-Chorshow i dr Mundart.

Nöji Mundartmusig vo dr Schwiiz bringe drzue ane au dr Bligg vo Züri-Schwamedinge, d Big Zis und d Steff la Cheffe un dr Greis. D Sektion Kuchikäschtli sind e Mundart-HipHop-Bänd us em Bünderland.

Rock & Rollinger sind e schwööbischi Mundartrockbänd. Si chunt vo Weschderstett und isch anne 2008 vom Andy Susemihi und em Thommy Bloch gründet worde.

Im Merze 2014 het d Sändig Schnabelweid vom Schwiizer Radio i dr Sändig «Züritüütsche Geschichten und Gedichte» zeigt, wies mit dr Rockmusig z Züri stoot. Es schynt, ass der Schwiizer Mundartrock sid öppe 2015 weniger wärdi. Bsunders no dr Bärner Musiker Schöre Müller mit Span pflägi dä tradizionell Styl – wemme em Pricht vo dr Bärner Zytig vo 2018 wott troue: Was vom Mundartrock übrig bleibt..

Z Öschtryych gits all Joor s Rock im Dorf Festival, wo au chly Mundartmusig im Programm het.

Literatur

• Christoph Ballmer: Mundartrock In: Historisches Lexikon vo dr Schwiiz.
• Samuel Mumenthaler: 50 Jahre Berner Rock. Oberhofen 2009.
• Roland Zoss: Saitenstrassen. Münsingen 1998.

Weblink

• www.mundart-rock.ch
• Musikszene Schweiz
• Die Seele des Mundartrock, uf nzz.ch - über e Hanery Ammann