Dr Landroot vom Kanton Basel-Landschaft

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Dialäkt: Baseldütsch

S Kantonsparlament vom Schwizer Kanton Basel-Landschaft isch dr Landroot. Er het 90 Mitgliider, und wird zurzit (2011) vom Urs Hess (SVP) bresidiert. Dr Vizebresidänt isch dr Jörg Degen (SP).

Zsämmesetzig und Ufgoobe[ändere | Quälltäxt bearbeite]

Dr Landroot bestoht us 90 Mitgliider.[1] Die wärde noch em Proporzsystem in vier Wahlregione und zwölf Wahlkreis alli vier Johr gwehlt, s letschte Mol am 27. März 2011. D Verdeilig vo de 90 Abgeordnete uf die zwölf Wahlkreis wird noch dr Zahl vo de stimmberächtigte Bürger in jedem Wahlkreis berächnet; jede Wahlkreis het aber mindestens 6 Abgeordneti im Landroot.[2]

As Legislative erloot dr Landroot Gsetz, wo em Volk müesse zur Genähmigung oder Ablähnig underbreitet wärde, es sig denn, mindestens 80 % vo de Landrööt haige dr Gsetzesvorlag zuegstimmt. Usseredäm kontrolliert und überwacht dr Landroot d Arbet vo dr Regierig.

Dr Landroot versammlet sich in dr Regel zwei Mol im Monet (usser im Juli und im August) immer am Donnschdig im Liestlemer Regierigsgebäud. Siini Sitzige si öffentlig.

Gmäss §§ 61 ff. vo dr Kantonsverfassig het dr Landroot die Ufgoobe und Kompetänze:

  • Er erloot alli grundlegende und wichdige Bestimmige in dr Form vo Gsetz. Usfüehrendi Bestimmige erloot er in dr Form vo Dekret, sofärn er dur s Gsetz drzue ermächtigt worden isch.
  • Er beschliesst – under Vorbehalt vom Finanzreferendum – nöji Usgoobe und setzt im Rahme vom Finanzblaan dr jöhrlig Voraaschlaag fest.
  • Er wehlt die kantonale Gricht, d Staatsaawält, dr Finanzkontrollöör, dr Ombudsman, dr Landschriiber und die eidgenössische Gschworene.
  • Er reglet d Besoldige, wo dr Kanton müess usrichde, und üebt wiiteri Rächt us, won er dur s Gsetz überchoo het.


Wie alli andere Parlamänt in dr Schwiz (inklusive die beide Bundeschammere Nationaal- und Ständeroot), isch au dr Landroot e Milizparlamänt. Mä erhofft sich vo däm System, ass d Parlamentarier en ängeri Realitäts- und Volksbindig wurde haa als Bruefsparlamentarier. Kritiker gsehn din aber d Gfohr vo dr zitlige und fachlige Überforderig.

Bardeie[ändere | Quälltäxt bearbeite]

Sitzverdeilig im Landroot, 2011
  Fraktion 2011 2007 2003 1999 1995 1991
  Sozialdemokratischi Bardei 21 Sitz 22 Sitz 25 Sitz 25 Sitz 24 Sitz 22 Sitz
  Schwizerischi Volksbardei 24 Sitz 21 Sitz 20 Sitz 14 Sitz 11 Sitz 9 Sitz
  FDP Baselland* 14 Sitz 20 Sitz 19 Sitz 22 Sitz 25 Sitz 27 Sitz
  CVP 8 Sitz 11 Sitz 11 Sitz 12 Sitz 13 Sitz 15 Sitz
  EVP 4 Sitz 4 Sitz 3 Sitz 3 Sitz 4 Sitz 4 Sitz
  Grüeni Bardei** 12 Sitz 11 Sitz 8 Sitz 5 Sitz 6 Sitz 8 Sitz
  Grüenliberali Bardei 3 Sitz
  BDP 4 Sitz
  Schwizer Demokrate 0 Sitz 1 Sitz 4 Sitz 9 Sitz 7 Sitz 5 Sitz

NA = Nit aadräte
'* 1991 und 1995 inklusiv 3 Sitz vo dr FDP Laufedaal
'** = 1995 inklusiv 2 Sitz vo dr Freie Grüene Liste

Fuessnote[ändere | Quälltäxt bearbeite]

  1. Artikel 61 vo dr Verfassig vom Kanton Basel-Landschaft Archivlink (Memento vom 3. Mai 2014 im Internet Archive)
  2. Artikel 49 vom Gsetz über die bolitische Rächt vom Kanton Basel-Landschaft Archivlink (Memento vom 3. Mai 2014 im Internet Archive)

Weblingg[ändere | Quälltäxt bearbeite]