Jounpass
| Jaunpass | |||
|---|---|---|---|
 Uf der Passhöchi | |||
| Himmelsrichtig | Ost | West | |
| Passhöchi | 1'509 m ü. M. | ||
| Kanton | Kanton Bern | ||
| Wasserscheide | Ruersgrabe → Simme → Aare → Rhy | Jounbach → Saane → Aare → Rhy | |
| Daalort | Boltige | Jou | |
| Usbau | Stross | ||
| Baut | 1878 | ||
| Profil | |||
| Ø-Stiigig | 6,9 % (620 m / 9 km) | 8 % (1348 m / 16,8 km) | |
| Karte | |||
| |||
| Koordinate | 592313 / 160049 | ||
Der Jounpass isch en Wäg über en Bärgsaddel vom Simmetaal im Kanton Bärn is Greyerzerland vom Kanton Fryburg.
Der Pass het d Höchi vo 1509 Meter über Meer. D Strooss goot us em Simmetaal vo der Ortschaft Reidebach, wo zu der Gmäind Boltige ghört, am weschtliche Bärghang über der Simme z duruff. Zwüschem Sitegrabe und em Ruersgrabe füert der Wääg am Wiiler Eschi verby, durs Spitzebüel und über d Schüpfeböde uf d Passhöchi, wo breit i de Hügel liit und chlyni Tuele mit Sumpfpiet het. Der alt Fuesswäg isch vo Wyssebach us stotzig em Wyssebachgrabe no ufe Bärg ggange.
S Piet mit de Matte uf der Passhöchi ghört bis übere Hundsrüggen y und wyt änenabe im Taal vo Joun zu der Gmäind Boltige. D Kantonsgränze isch erscht zwee Kilometer wyder unde weschtlech vom Pass. Der Jounpass het Turismusagebot für de Summer und für de Winter.
Uf Joun abe goot d Strooss am Bärghang vo Ritzwald no und dur en Dunnel und chunt bim Chappelebode under der Burgruiine Bellegarde is Dorf Joun abe. Do rede d Lüt en alemannische Dialäkt, s Jounertüütsch. Vo do a isch d Strooss lang näbem Jounbach, goot bim Wiiler Im Fang über dä Fluss und im schmaale Ängpass bi de Felseflüene vom Loubspitz und em Tossewald über d Gmäindgränze is Piet vo Galmis, wo zum wälsche Deil vom Kanton Fryburg ghört. Der Fluss heisst vo do a uf Französisch La Jogne. No einisch muess d Strooss mit ere Brugg über dä Bach und liit denn im Dorf Galmis uf der Nordsyte überem Montsalvens-See. Unden a de Dörfer Crésuz und Châtel-sur-Montsalvens verby goot d Passtrooss bis uf Bro abe, wo früener uf Dütsch Bruck gheisse het und det zum Schluss über d Saanebrugg uf Boll.
D Strooss übere Jounpass isch ane 1878 vom Milidäär bout worde. Im Zwöite Wältchrieg het d Schwiizer Armee uf der Passhöchi es Feschtigswärch vo der Artillerii ygrichtet.
Weblink
[ändere | Quälltäxt bearbeite]
Commons: Jounpass – Sammlig vo Multimediadateie
