Gestler

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

Der Gestler – hüt meh bekant mit em französische Name Chasseral – isch e Bärg vom Jura. Er isch in ere Landschaft vo nazionaler Bedüütig.

Der Felse vom Bärg isch us Chalchgschtei. Sin Gipfel isch uf 1606 Meter über Meer, und es isch der höchscht Bärg vom Bärner Jura. Er lyt im Nordweschte vom Dessebärg, und änedra, im Norde vom Chasseral, lyt s Sanktimmertaal.

Der Chasseral isch nid e Bärg, wo ringsume stotzigi Häng het. Nume gäges Middelland, zum Dessebärg abe, goot’s gäch der Bärg ab; do isch die ganzi Bärgflangge uf em Gmeindpiet vo Nods. Der Dessebärg isch es Platoo höch über em Bielersee, und dört unde isch denn der Jurafuess.

Uf der Nordsyte vom Chasseral, über em Sanktimmertaal, ligge höch oben es bar Alpmatte, und vo dene chunt me dure Bärgwald is Taal abe. Der Bärghang under em Chasseral-Gipfel mit der Bärgwirtschaft Métairie de Morat isch i der Gmeind Cormoret. Chly weschtlech dervo chunt au der Gmeindbann vo Villeret bis ganz ufe Bärg ufe.

Der ganz Bärg, wo der Chasseral der höchscht Punkt dervo isch, het d Form von ere länge Bärgchetti; vom nöieburgische Taal Val de Ruz im Weschte bis zu der Kluus oberhalb vo Biel im Nordoschte isch die zwänzg Kilometer läng; es isch die vorderschti Jurachetti, vom Middelland us gseh, und der Chasseral-Gipfel isch eifach der höchscht Platz uf dere langzogne Kreete.

Dört obe stoot e grossi Sändealaag vo der Schwiizer Telekomunikazionsfirma Swisscom. Der Sändeturm isch meh weder 100 Meter hööch. Chly weschtlech vom höchschte Punkt isch s Bärghuus vom Chasseral, und no wyter undedra goot der Chasseral-Pass über d Bärgchetti; der Bärgübergang isch uf 1502 Meter über Meer und d Passhööchi lyt uf der Kantonsgränze zwüschem Kanton Bärn und em Kanton Nöieburg. Uf der ganze Kreete übere Chasseral isch eine vo de schönschte Abschnitt vom grosse Wanderwääg über d Jurahöchine. Vo dört obe cha men es wyts Panorama vo de Alpe aluege.

Bilder[ändere | Quälltäxt bearbeite]

Weblink[ändere | Quälltäxt bearbeite]

 Commons: Chasseral – Sammlig vo Multimediadateie

Fuessnoote[ändere | Quälltäxt bearbeite]