Hermione

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Ermioni vom Norde uus gsie

Hermion oder Hermione (altgriechἙρμιών, Ἑρμιόνη) isch en antiki Hafestadt i de östliche Argolis, bim hüttige Ermioni (noigriech. Ερμιόνη), wo früenner aber Kastrí (Καστρί) ghaisse hett. Hermione isch bikannt gsii för d Purpurfischerai.

Laag und Bschriibig[ändere | Quälltäxt bearbeite]

d Ruine vom Poseidontempel ufem Kap Kastrí.

Hermione isch ufere Halbinsle glege, wo 1300 Meeter is Meer useluegt und geg Norde mitem Festland e gueti natürlich Hafebucht bildet, wo geg Ooste offen isch. De Pausanias, wo im zwaite Joorhundert do vorbii choo isch, hett d Stadt zimmli gnau bischribe. Usse ufem Vorpirg isch e Tempel vom Poseidon gstande, wo uusgrabe woren isch. De Tempel vo de Athena und s Stadion, wo i de Nööchi gstande sind, sind hütt verschwunde. Im dem Stadion söled d Dioskure gchämpft haa. O de Hain wo ghaimi Ritual för d Demeter gfiiret wore sind, isch do gstande. De östlich Tail vo de Halbinsle haisst hütt Bisti und isch miteme Piniewald öberwachse.

De westlich Tail vo de Halbinsle bildet e chliini Ebni, wo di röömischi Stadt gstande isch und hütt d Noistadt stoot. S Trinkwasser isch miteme Aquädukt anegfüert wore. S het o zwee Brüne ghaa, de röömischi het Leimon ghaisse. D Stadt het sich de Hügel Pron (Πρών) ufezoge, wo d Halbinsle gege s Festland abtrennt und o de Platz vo de hüttige Altstadt isch. Uf de Hööchi vom Pron isch de Tempel vo de Demeter Chthonia gstande. Ufem Pron het sich o en Erdspalte uuftue und us dere söll de Herakles de Hund Kerberos usem Hades ufebroocht haa. Öberhopt hets z Hermione zimmli vill Tempel ghaa. Bim moderne Hafe am Nordrand vo de Halbinsle sind antiki Moole erchennbar und südlich vom Hafe d Reste vomene Theater.

Hermione isch de Mittelpunkt vo merere Fest gsii. Woll bim Hafe zue isch de Tempel vom Dionysos Melanaiges ("schwarzes Gaissefell"), wo jedes Joor e Musigweppewerb stattgfunde hett und e Wettschwümme und Wettruedere, wa uusergwöönlich isch, well de Dionysos sös wenig mitem Meer z tue hett. Bim Tempel isch e Statue vom Poseidon gstande, miteme Fuess ufeme Delphin.

S Hailigtum vo de Demeter Chthonia ufem Pron isch weleweeg am Ort vo de hüttige Cherche Agioi Taxiarches ("Erzengel") gstande, wo usem 9. Joorhundert stammt. Jedes Joor im Summer hend d Hermioner e Prozession gfiiret, wo Mane, Fraue und Chind tailgnoo hend. Si hend wiissi Chlaider trait und sind mit Blueme gchränzt gsii. D Mane hend e Chue mitgfüert. Wenn d Prozession zom Tempel choo isch, hend si d Chue loosloo und in Tempel tribe, wo si vo de alte Prietserine töödt woren isch, und zwoo sind vier Chüe anenand gopferet wore. D Mane aber hend nöd tööre is Hailigste vom Tempel inegoo. Am Kult vo de Demeter Hcthonia z Hermione hend sich abem End vom 3. Joorhundert v. Chr. o di messenische Asinäer bitailigt.[1]

Gschicht[ändere | Quälltäxt bearbeite]

Noch de Saag hend sich d Dryoper, wo vom Herakles us de Haimet vertribe wore sind, z Asine und z Hermione niderloo. Hermione werd im Schiffkatalog vo de Ilias gnennt.

D Halbinsle isch scho i de mykenische Zitt mitere Muur bifestigt wore. Si het i de früene Antiki zom Bund vo Kalaureia ghört und ane 480 v. Chr. mit drai Schiff a de Schlacht vo Salamis bitailigt und ai Joor spööter mit 300 Maa a de Schlacht bi Plataiai. Im Peloponnesische Chrieg isch es mit Sparta verbündet gsii. Ab 229 v.Chr. isch Hermione e Mitgliid vom Achäische Bund gsii, het sich aber zwöscheddöre mitem spartanische König Kleomenes III. (235-222 v. Chr.) verbündet.

Quelle[ändere | Quälltäxt bearbeite]

Noowiis[ändere | Quälltäxt bearbeite]

  1. IG IV 679, Inschrift us Hermione

Literatur[ändere | Quälltäxt bearbeite]

  • Yves Lafond: Hermione. In: Der Neue Pauly (DNP). Band 5, Metzler, Stuttgart 1998, ISBN 3-476-01475-4, Sp. 437–438.
  • Isabella Solima: Heiligtümer der Artemis auf der Peloponnes; Verlag Archäologie und Geschichte, Heidelberg (2011). ISBN 978-3-935289-35-1. S. 50-53.