Dryoper

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen

D Dryoper (altgriechΔρύοπες, Drýopes „Aichevolch“) sind e saagehafts altgriechisches Volch gsii. Si sind nochem Dryops binennt, emene Soo vom Flussgott Spercheios oder noch anderne Aagoobe vom Gott Apollon.

Noch de Saage hend Dryoper nördlich vom Berg Parnassos glebt im Piet vom Fluss Spercheios. Der Herakles het Striit aagfange mitem Theiodamas, wo sinerzitt de König vo de Dryoper gsii isch. S isch drufabe zomene Chrieg choo und d Dryoper sind usem Land vertribe wore. De Hylas, der Soo vom Theiodamas, isch vom Herakles graubt wore und het de uf de Argonautefaart biglaitet. D Dryoper sind uf d Peloponnes gfloche und hend sich a de Chüste vo de Argolis i de Stedt Asine und Hermione niderloo. Vo do sind si spööter vo de Argiver o vertribe wore, well si sich mi de Spartaner verbündet hend. D Spartaner hend denn dene erlobt z Messenie e noji Stadt z gründe, wo si ebefalls Asine gnennt hend. Di messenische Asinäer sind no i de Antiki stolz uf eri Herkunft gsii und hend sich selber Dryoper gnennt. Si hend au e Tempel mitere Statue vom Dryops i de Stadt ghaa und asinäischi Münze hend mengisch de Dryops abbildet.

En andere Tail vo de Dryoper isch uf d Insle Euböa gwanderet und het sich i de Stadt Styra niderloo, hend sich denn aber nüme Dryoper gnennt.