EHC Visp

EHC Visp
Grössti Erfolg
Meister NLA 1962 Schwizer Cupsiiger 1964 Meister NLB 1960, 2011, 2014
Vereinsinfos
Gschicht	Gründigsjahr: 1941
Standort	Visp
Vereinsfarbe	schwarz, rot, wiss
Liga	Swiss League
Spielplatz	bis 23. August 2019 Litterna-Halle ab 6. Sept. 2019 Lonza Arena
Kapazität	4’300 Plätz (drvo 850 Sitzplätz)
Cheftrainer	Per Hånberg
Captain	Fernando Heynen
Saison 2019/20	4. Platz, "Playoff-Halbfinal"

Der EHC Visp isch en Schwiizer Ischhockeyclub üs Visp, wo d Profimannschaft uner der Füehrig vo EHC Visp Sport AG iner Swiss League spilt. Der grescht Erfolg vom Club isch der Gwinn vom Meistertitel iner NLA im Jahr 1962. Zudem het mu der Meischtertitel 1960, 2011 und 2014 iner zweit hechschte Spiilklasse NLB gholt.

Gschicht

Der Verein isch 1941 gegründut wordu und isch iner Saison 1959/60 in d Nationalliga A üfgstige, het schich da uber 10 Jahr chänu etablieren. Der Höhepunkt vom Vereinsläbu isch der Schweizer Meistertitel gsi. Am 3. Februar 1962 het mu damals gägu der HC Davos mit 3:0 chänu gwinnu – dische Meistertitel het schich aber nimme widerholt. Im Jahre 1964 isch der EHC Visp Cup-Siiger wordu.

Neuzit

Der Verein isch 1988, 1990, 1997 und 1999 Gruppensiiger in der 1. Liga wordu und isch 1999 in die NLB üfgstigu. Iner zweithechschtu Spiilklasse vo der Nationalliga het mu ine Jahri 2003, 2007 und 2010 den Vizemeistertitel gholt. 2011 het schich der EHC Vischp nach 1960 schine zweitu NLB-Meistertitel gsichert, womu im Final der HC Lausanne mit 4:0 gschlagu het. 2014 heint d Walliser numal der Titel chänu holu, zum zweitu Mal innert dri Jahr. Schi heint als Üsusiter gägu der NLA-Abstiger SC Langnau 4:3 iner Serie gigwunnu.

Am Afang vo der Saison 2013/2014 isch es neus Club-Wappu präsentiert wordu.

Sit 2001 bsteit der EHC iner Form vora Aktiengesellschaft, wo der Spiilbetrib vo 2 Mannschafte (ca. 50 aktive Spiler) organisiert und finanziert. Fer d Saison 2009/10 plant mu mit ma Budget vo Fr. 2'250'000.

D Nachwuchsabteilung isch ine Verein Young Lions üsgeglidert und unerhaltut insgesamt 12 Mannschaften (ca. 250 aktive Spilerinne & Spiler), derva 1 Damen-, 1 Senioren- und 9 Nachwuchsteams. Üserdem spilt der EHC Visp II unerum Dach vom Verein.

Gäguwart

Saison 2006/07

Unerum Cheftrainer Kevin Ryan gewinnt der EHC Visp en grosse Teil vode Heimspil: D Oberwalliser verlierunt lediglich eis Heimspil nach 60 Minüte und zwei iner Verlengrig. Durch di Heimsterchi isch der EHC Visp di ganz Saison aner Tabelluspitza azträffu. Iner erscht Playoff-Rundi trifft der EHC uf der Kantonsrival HC Sierre-Anniviers. Nach era Heimniderlag wärdent Sunnustäter nacher viermal in Serie gschlagu. Ine Halbfinal trifft z Team uf d GCK Lions, di heint der Qualisiger SC Langenthal bezwungu. D Visper gwinnunt öi di Serie mit 4:1. Dermit steit z Final gägu der EHC Biel fest. Z Reglement erleubt, schich nu mit Ausländer zu versterchu. Visp verpflichtut mim Derek Cormier und Lee Jinman zwei Spiler vom Rival üs Siders. Ari Vallin (finnischer Nationalspiler) komplettiert z Trio. Iner Serie gägu Biel verliert d Mannschaft mit 2:4, der viert Sieg holt Biel iner Verlengrig.

Saison 2007/08

Nachum letztjährigu Finalizug und de güetu Leischtige voder Mannschaft verlänt es paar namhafti Spiler und Trainer Kevin Ryan der Club, neue Cheftrainer wird John Fust, assistiert vom Spilertrainer Terry Yake. Trotz der Abgäng cha sichch der EHC am Anfang vo der Saison iner Spitzugruppa beheuptu, di Üsgangslag wird vom positivu Dopingbefund vom Terry Yake uberschattut. D Mannschaft verliert züenämend an Konstanz. Gägu Endi vo der Qualifikation cha en Siegserie vo acht Spil verzeichnut wärdu und dermit chunt schich z Team de erschtu dri Plätz vo der Tabälla necher. D güet Üsgangslag isch nit gnutzt wordu und d Mannschaftisch am letzschtu Spiltag vom HC Ajoie ufe Platz füf gschobu wordu. Der Topscorer vom Team isch der Greg Hogeboom mit 76 Punkta gsi. Ine Viertelfinal het mu üswärts z Break gschafft, verlierts aber im zweite Spil wider. ine räschtlichu Spiil gwinnt immer z Heimteam und so isch d Serie 4:3 vom HC Ajoie gwunnu wordu.

Saison 2008/09

Mit zwei neue Üsländer, Steve Brulé und Jason Guerriero, im Team verleuft der Sasionstart durchzogu. Nach zäh Rundine rangierte der EHC um der sibtu Platz und d beidu Üsländer sind scho iner Kritik gstandu. Nach der Verletzig vom Guerriero wird temporär der uberzählig Üsländer von SC Langenthal (Marco Charpentier) und der z Lausanne in Ungnade gfallu Cory Pecker verpflichtut. Pecker wird nacher vom Lausanne HC definitiv ubernu. Züesätzlich wird der vom SCL Tigers uberzählig Stürmer Roman Botta verpfllichtut. Di Kadermutationen wirkunt schich öi uf der Tabälla üs, nach und nach schiebunt schich d Oberwalliser immer weiter in Richtig Spitza. Nach Abschluss vo der Qualifikation und Zwischurundi platziert schich der EHC Visp uf de zweit Platz. Bi der Üswahl vo de Playoffgägner heint d Visper als zweits Team chänu wählu und schich fer de EHC Olten entschidu. In der Playoffserie spielt z Duo Brulé-Pecker gross üf und entschiedent d Serie fast im Alleigang (4:1 Siege). Nach de Solothurner is im Halbfinal gägu der HC La Chaux-de-Fonds gangu. derbi heint schich d Neueburger fer de EHC Visp als z starch erwisu. D Serie isch de öi mit 4:0 Siega an d „Chaux-fonnier“ gangu. Jedoch sind alli Ziil vo der EHC Visp Sport AG erreicht wordu, mim Klassieru ine Top 4 (Platz 2) und mim erreichu vo de Playoff-Halbfinal.

Saison 2009/10

Mit der Verpflichtig vom Kanadier Dominic Forget cha der Trainer John Fust schis Kader durch en weitere starche Stürmer ergänzu. Der EHC Visp startut erfolgrich in d Saison 2009/10 und setzt schich nach churzer Zit an d Spitza vo der Tabälla. Visp schliesst d Qualifikation mit 95 Punkta ufum erschtu Platz ab. Mit 224 Träffer schiesst der NLB- Qualifikationssiger mit Abstand am meischtu Tor vo alle Teams. Fast d Hälfti derva gänd ufs Konto vom Stürmerduo Forget-Pecker, wo öi d Topscorer-Wärtih vo der NLB na der Vorrundi mit 105 beziehigswis 101 Scorerpunkten agfüiehrt heint.

Trainer John Fust git Afang Januar schine Wägsel zu de SCL Tigers üs Langnau nam Endi vo der Saison bekannt. Churz druf stellunt d Klubverantwortlichu Real Paiment als schine Nachfolger vor. Ine Playoff-Viertelfinal setzt schi Visp gägu Basel souverän mit 4:0 iner Serie durch. Im Halbfinal, gägu der Kantonsrival Siders, gwinnt Visp d erschtu dri Spile. Nacher verliert z Team zweimal nach Verlengrig, cha aber mim Gewinn vom sägschtu Spil d Serie mit 4:2 fer schich entscheidu. Mitum Finalizug het Visp schis Saisonzil erreicht. Der Final verliert Visp gägu der HC Lausanne iner Serie mit 1:4, obwohl das z erscht Spil nu fer schich entschidu het. Der EHC Visp wird hiner de Waadtländer Vizemeister vo der Nationalliga B Saison 2009/10.

Saison 2010/11

Mit de Üsländer Dominic Forget und Steve Brulé und uner der Leitig von Real Paiement, spilt Visp iner Saison 10/11 en durchzogeni Qualifikation. Im Oktober wird der Paiement ufgrund vo fählendu Resultat frigstellt. Fer ihnu ubernimmt der Michel Zeiter interimistisch als Spiler-Trainer, im Dezember chunt der Kanadier Bob Mongrain an d Banda. Z Team beleit der 6. Schlussrang iner Qualifikation. Nachdem Visp der SC Langenthal mit 4:2 im Viertelfinal und HCC La Chaux-de-Fonds im Halbfinale mit 4:3 eliminiert, schlänsch der Ligakrösus und Üfstigskandidat HC Lausanne glatt mit 4:0 Spil. So chamu mu der zweit NLB-Meischtertitel nach 1960 firu. Iner Ligaqualifikation ume Üfstig verliert der EHC Visp gägu der HC Ambrì-Piotta 1:4.

Saison 2011/12

Der Trainer het öi 2011/12 Bob Mongrain gheissu. Zum Dominic Forget het schi en weitere Kanadier gsellt, Alexandre Tremblay. Iner Qualifikation erreicht Visp der 4. Platz. Mit ema 4:1 im Viertelfinal ind Playoffs uber der EHC Olten sichrut schich Visp der Izug ins Halbfinal, wamu aber gägu der HC Lausanne 0:4 in Serie verloru het.

Saison 2012/13

Forget und Tremblay bildunt öi am Afang vo der neui Saison z Üsländerduo. Der als Spiler zruggeträttu Michel Zeiter het der Bob Mongrain aner Banda abglöst. Im Dezember het mu der Vertrag vom Tremblay üfglöst und an schiner Stelle isch der Domenico Pittis cho bis zum Saisonendi. D Qualifikation schliesst Visp als fünfte ab. Ine Playoffs isch mu scho im Viertelfinal mit 1:4 gägu der HC Lausanne üsgschidu.

Saison 2013/14

Mit der Verpflichtig vom ehemaligu russischu NHL Profi, Stanleycupsiger, Olympiasiger und U20-Junioru-Wältmeischter Alexei Kowaljow glingt dum EHC Visp en Sensationstransfer.

Der Start ind Saison misslingt gründlich, zitwiss ligunt d Oberwalliser sogar ufum letschtu Tabälluplatz. Der Club zieht d Rissleina und besetzt mim Kim Collins der Trainerpostu neu. Der langjährig Spiler Forget müess äbufalls der Verein verla, är wird durch der James Desmarais ersetzt. Visp erholt schich und schliesst d Qualifikation ufum füftu Platz ab. Z Team cha schich ine Playoffs steigru. Kowalev und Desmarais schiessunt Visp praktisch im Alleigang gägu HC Red Ice (4:0) ine Halbfinal. Da bezwingunsch der SC Langenthal mit 4:3 iner Serie. Der EHC Visp geit als Üsusiter ins Finale und setzt schich inra hert umkämpftu Serie gägu d SCL Tigers mit 4:3 durch. So chamu der drit NLB-Meischtertitel iner Gschicht und der Zweit Titel innert 3 Jahr fiiru. Iner Ligaqualifikation unterligt mu dum EHC Biel mit 1:4.

Saison 2015/16

Der EHC Visp beendut d Qualifikation vo der Saison 2015/16 ufum sägschtu Rang. Im Viertelfinal müess schi der EHC Visp mit 3:4 iner Serie gägu der EHC Olten gschlagu gä.

Saison 2016/17

Uner der Leitig vom Trainer John Fust isch Qualifikation als Sibte beendut wordu. Ine Playoff-Viertelfinal Isch mu gägu der HC La Chaux-de-Fonds mit 1:4 iner Serie üsgschidu. Nacher isch der üsleufent Vertrag vom Fust nimme verlengrut wordu, Sportchef Alex Kowalew het schis Amt miessu abgä.

Saison 2017/18

Im April 2017 isch der Finn Matti Alatalo als neue Cheftrainer verpflichtut wordu. Z Team het d Qualifikation üfum siebtu Rang abgschlossu. Der EHC Visp scheidut im Viertelfinal gägu der SC Langenthal mit 2:4 iner Serie üs.

Saison 2018/19

Der Matti Alatalo isch wärend der ganz Sasion Cheftrainer vom EHC geblibu. Der EHC het d Quali ufum 6. Platz abgschlossu. Ine Playoff Viertelfinal isch mu gägu der EHC Oltu mit 0:4 iner Serie üsgschidu.

Sasion 2019/20

Der EHC Visp startet witerhin mim Cheftrainer Matti Alatalo in d neu Sasion. Der EHC schliesst d Qualifikation ufem 4. Platz ab und sichrut sich somit der Heimvorteil ine Playoff Viertelfinal gägu der HC Thurgau. D Viertelfinal-Serie het mu 4:1 chänu gwinnu und wär nah 5 Jahr mal wider ine Halbfinal gägu de HC Ajoie igezogu. Doch wägem Corona-Virus het mu d Playoffs an der Stell abgebrochu.

Saison 2020/21

Im Juni het der EHC Visp der Melvin Merola vom HC Thurgau verpflichtut. Endi Oktober 2020 wird nach mehrere Niederlage der Trainer Matti Alatalo entlah, der Sportchef Bruno Aegerter het interim unernu. Im Januar 2021 het der Yves Sarault z Team als Trainer ubernuh.

Visp het d Qualifikation ufum 7. Platz abgschlossu und trätut ine Pre-Playoffs gägu d Ticino Rockets a. Durch en 2:0-Siig iner Serie trifft der EHC ine Playoffs uf der HC Ajoie. D Serie het mu mit 0:4 verloru. Churz vorum Endi vo der Saison git der Sandro Wiedmer nach 13 Saisons bi Visp schine Rücktritt bekannt. Zudem sind der Raphael Kuonen vo de SCL Tigers und der Evgenï Chiriaev vom EHC Olten fer d negst Saison verpflichtut wordu.

Saison 2021/22

Im Mai 2021 isch bekannt wordu, dass der Schwed Linus Klasen verpflichtut und mit ema Zweijahresvertrag üsgstattet wordu isch. Als neue Trainer isch der Per Hånberg vorgestellt wordu, wo mitum EHC Chlotu iner Vorsaison der Final erreicht het.

Mannschaft

Kader vo der Saison 2021/22

Stand: 2. Dez. 2021

Nr.	Nationalität	Spiler	Position	Geburtsdatum	Im Team sit	Geburtsort
26	Schweiz	Reto Lory	G	28. August 1988	2018	Bern
68	Schweiz	Matteo Ritz	G	24. März 1998	2021	Visp
50	Schweiz	Cedric Schaller	G	13. März 2001	2019	Visp
11	Schweiz / Italien	Luca Camperchioli	D	22. Januar 1991	2018	Zunzgen
20	Schweiz	Giacomo Casserini	D	20. September 1990	2021	Locarno
72	Schweiz / Schweden	Fabian Eggenberger	D	12. Oktober 2000	2020	Nacka, Schweden
29	Schweiz	Finn Fuchs	D	26. November 2001	2021	-
57	Schweiz	Andy Furrer	D / RW	15. Januar 1988	2004	Visp
	Schweiz	Lorenz Kienzle	D / RW	6. Juni 1988	2021	Schaffhausen
90	Schweiz	Marc Lütolf	D	10. Februar 2001	2019	-
2	Schweiz	Valentin Pilet	D	18. Februar 1997	2020	-
27	Schweiz	Marc Steiner	D	27. März 1996	2018	Schüpfen
65	Schweiz / Schweden	Philip Åhlström	D	13. Mai 1995	2021	Stockholm, Schweden
21	Schweiz	Niels Berger	RW	2. Januar 1991	2019	Niederurnen
15	Schweiz	Sandro Brügger	RW	11. November 1991	2018	-
55	Schweiz	Dario Burgener	LW	17. April 1996	2017	Visp
18	Schweiz / Ukraine	Evgenï Chiriaev	C	3. August 1989	2021	Kiew, Ukraine
44	Schweiz	Lukas Haas	C / LW	14. März 1988	2020	Langnau
24	Schweiz	Fabian Haberstich	LW / RW	7. Januar 1997	2019	-
86	Schweden	Linus Klasen	LW	19. Februar 1986	2021	Stockholm, Schweden
21	Schweiz	Raphael Kuonen	RW / LW	13. März 1992	2021	Visp
5	Schweiz	Melvin Merola	RW	30. März 1993	2020	Verbier
97	Schweiz	Stefan Mäder	C	12. August 1990	2021	Langnau im Emmental
16	Schweden	Niklas Olausson	C	12. Mai 1986	2021	Väckelsång, Schweden
73	Schweiz	Fadri Riatsch	LW	27. März 1999	2019	-
12	Schweiz	Andy Ritz	C / RW	12. Februar 1996	2016	Visp
95	Italien	Stefan Spinell	LW	14. Juni 1999	2019	Bolzano, Italien

Trainerstab

Namu	Funktion	Nationalität	Geburtstag
	Cheftrainer
Björn Lidström	Assistenztrainer	Schweden Schwede	2. Juli 1975
David Vetsch	Konditionstrainer	Deutschland Dytschland	6. Februar 1985
Stefan Volken	Verwaltungsratpräsident	Schweiz Schwiz

Frowe

D Fraueneishockey-Abteilig isch am 19. November 1995 als eigenständiges Mitglied vo der EHC-Visp-Familie gegründut wordu. Trainiert wird zerst mal wöchentlich uner Füehrig vom Peter Baldinger. Ab 1997/98 nimmt z Team vor allum an Nachwuchsturnier teil. Zer Saison 1998/99 hets z erschtmal ane schweizerische Eishockeymeisterschafte teilgnu und beleit uner dum Trainer Christian Lowiner iner NLC-Gruppa der siebt Platz. Ine folgendu Spieljahr etablierte schich d Mannschaft iner LKC, ehe 2005 der Üfstig in d Leistungsklasse B glungu isch. 2008 erreichte der EHC Visp im Rahmu vora Liga-Üfstockig der Üfstig in d Leistungsklasse A.

Fäns

Der EHC Visp cha scho sit immer uf schini treue Ahänger zellu. Är kehrt sit Jahre zu de dri NLB-Clubs mitum höchstu Züschauerüfmarsch. Im Schnitt besüechunt meh als 3500 Fäns d Spil. Der Vercheuf vo de Sasioncharte stigt sit Jahre kontinuierlich, iner Saison 2013/14 het mu mit uber 2200 Stuck en neue Rekord gebrochu. Nam Konkurs vom Kantonsrival HC Sierre chämunt öi vermehrt Züeschauer üsum französischsprachigu Kantonsteil d Spil vom EHC Visp cho lüege. Näbu Unernähmu üsum ganzu Oberwallis, cha der Club ine letztu Jahre öi Sponsoru üsum Unerwallis gewinnu. Der Stationsprächer macht d Durchsage uf Ditsch und Französisch.

Im Verleuf vo Jahr sind diversi Fänclubs gegründut wordu. Summi derva sind wider üfglöst wordu. Momentan giz nur no der Fänclub Litterna Lions `11. Der Fäbclub One Passion isch iner zwischuzit wider üfglöst wordu.

Hockeyhalla

→ Hauptartikel: Litterna-Halle

Eng verchnüpft mit der Geschicht vom EHC Visp isch öi d Litterna-Halle, wo der EHC Visp schini Heimspiele üstreit. En erschti Ischbahn mit Tribünen isch 1956 eröffnut wordu. Im Jahr 1978 het z letscht Spil vom EHC Visp ufum Ischsfäld uner friem Himmel stattgfunu. Siter wird in der im Jahr 1979 erbautu Litterna-Halle gespilt. D Ischhalla, wo mitti ima Wohnquartier steit, hets öi es chlisein Bistro und bietut 4300 Zuschauer Platz. Dernäbu hets numal en chlini Ischhalla, wo der Curlingverein brücht.

Iner ischfri Zit wird d Litterna-Halle öi fer Üsstellige oder kultureli Aläss, wie zum Beispiel Konzärt, gebrücht.

Am 23. August 2019 finud nach 40 Jahr iner altehrwürdigu Litterna-Halle z letzte Spil gägu der Kantonsrival HC Siders Annivers statt, wo Visp mit 1:0 het chänu gwinnu. Abum 6. September 2019 wird d neu Lonza Arena igweiht.

Bekannti ehemaligi Spiler

• Russland Alexei Kowaljow
• Kanada Steve Brulé
• Kanada Dave Gardner
• Schweden Stefan Ketola
• Finnland Pekka Marjamäki
• Finnland Jorma Peltonen
• Finnland Ari Valin
• Kanada/Italien Anthony Iob
• Kanada Richard Laplante
• Schweiz Gaston Furrer
• Schweiz Aldo Zenhäusern
• Kanada Terry Yake
• Kanada Kevin Primeau
• Kanada Chris Helland
• Kanada Jim Campbell
• Kanada Domenico Pittis
• Vereinigte Staaten Brad DeFauw
• Schweiz Walter Salzmann

Weblink

 Commons: EHC Visp – Sammlig vo Multimediadateie

• di offizielli Website
• Geschichte uf ehc-visp.ch
• d Website vom Dameteam (chan zur Zit nöd abgruefe wärde)