Chlaus-Chlöpfe
.jpg)
S Chlaus-Chlöpfe isch e Bruuch, wo i der Zyt vor der Wienecht bsunders im Bezirk Länzbrg i der Schwiiz vorchunt. Das foot a deil Oorte scho am Ändi vom Oktober aa und goot eso bis am zwöite Donschtig im Dezämber.
Mit de länge Geisle wott me der Samichlaus wecke wo im Goffersbärg bi der Stadt Länzbrg woont,[1] und für das tuet me so luut chlöpfe as me cha. Wenn s Oobig wird, chöme die junge Manne wo das guet chönne uf eme Platz zäme und mache der Reie noo oder au zäme ganz luuti Chläpf mit de Geisle.
Me macht das ussert z Länzbrg au no öpen i den Aargauer Gmeinde Ammerschwyl, Gaueschtei, Brunegg, Dintike, Eglischwyl, Halwyl, Huuse, Häntschikle, Hunzeschwyl, Mägewyl, Mörike-Wildegg, Niderlänz, Otmisinge, Robischwyl, Schofise, Seènge, Seon und Staufe.
Der Bruuch vom Geislechlöpfe isch süsch au in anderne Gebiet vo der Schwiiz, z Düütschland und z Öschtryych bekant. S Schwiizerischen Idiotikon het es bar Kwellen und Nowys zum Geislechlöpfe.[2]
Weblink
[ändere | Quälltäxt bearbeite]- e Website übere Bruuch vom Chlaus-Chlöpfe
- s Chlaus-Chlöpfe im Bezirk Länzbrg, in: Die lebendigen Traditionen der Schweiz
Fuessnoote
[ändere | Quälltäxt bearbeite]- ↑ Ruth Steiner: Ein Chlaus wie kein anderer. Weshalb der Stadtchlaus in Lenzburg erst am 13. Dezember kommt. In: Aargauer Zeitung, 6. Dezember 2018.
- ↑ Artikel chlepfe bim Schwiizerischen Idiotikon