Chandra

Us der alemannische Wikipedia, der freie Dialäkt-Enzyklopedy
de Chandra mit de Rohini

De Chandra oder Chandrama (Sanskrit: चन्द्र, Candra m.; Candramā m.; Pali: Canda, Candimā) isch de Moogott im Hinduismus. Er werd maist au Soma gnennt und isch de Welthüeter (lokapāla) vom Nordooste.

de Chandra und di 27 Nakshatras[ändere | Quälltäxt bearbeite]

De Chandra isch de Soo vom Waise (rishi) Atri und vo de Anasuya. Er het 27 Töchtere vom Daksha ghüürootet, wo di 27 Moohüser (nakshatra) darstelet. Er het aber nume för d Rohini Auge ghaa und eri iifersüchtige Schwöstere hend sich bim Vatter bischweert. De het drufabe de Chandra verfluechet, aser abmergle söll. Do hend aber di 27 Fraue Mitlaid öberchoo und de Vatter bete, er söll de Fluech rückgängig mache, waner au gmacht het. Aber e Tail vom Fluech isch blibe und drum wachst de Moo 14 Taag und schwiinet denn 14 Taag.

de Chandra und d Tara[ändere | Quälltäxt bearbeite]

De Chandra het sich i d Tara („Stern“), d Frau vom Brihaspati („Jupiter“), verliebt und si entfüert. Da isch d Uursach vomene groosse Chrieg gsii, wo ase lang duuret het, bis de Brahma em Chandra bifole het, d Tara em Brihaspati zruggee. Si isch aber schwanger gsii und het e Bueb uf d Welt broocht, wo si Budha gnennt het. De isch aber ase hübsch gsii, ass sowoll de Chandra wie au de Brihaspati sich um d Vaterschaft gstritte hend und de Chrieg isch fast wider noi uufgflammt. Uf Bifeel vom Brahma het si denn zueggee, as de Chandra de Vatter vom Budha isch. De Budha isch de Planet Merkur und tar nöd mit em Buddha, em Bigründer vom Buddhismus verwechslet were. Vom Budha stammt d Moodynastii (Chandravamsha) ab, wo au de Krishna dezuegrechnet werd.

Lueg au[ändere | Quälltäxt bearbeite]

Büecher[ändere | Quälltäxt bearbeite]

  • Hans Wilhelm Haussig (Hg.): Götter und Mythen des Indischen Subkontinents. Stuttgart: Klett-Cotta (1984). ISBN 3-12-909850-X