Soma Saft

Us der alemannische Wikipedia, der freie Dialäkt-Enzyklopedy

De Soma (Sanskrit: सोम, soma m.) isch e Ruuschtrank, wo i de Vede gnennt werd und im vedische Kult e wichtigi Role gspillt het. De Soma het nöd nu biruuscht, sondern au inspiriert, Muet igflööst und ghailt.

Herstelig[ändere | Quälltäxt bearbeite]

D Zämesetzig und d Herstelig vo dem Ruuschtrank isch nüme bikannt, vermuetet werd as de Soma de Saft vo de Sidepflanze (Asclepias acida) gsii isch, aber anderi Vermuetige schlönd anderi Pflanze vor. Nochem Rigveda isch de Soma e geelbruune oder röötliche Saft. Er werd vo de Somapflanze gwune, wo i de Berge wachst. D Stengel weret mit Stai uuspresst und de Saft lauft dör e wulligs Siib inen Holzchöbel. De raini Soma werd a de Götter gopferet, zum Trinke werd er mit Milch oder Wasser verdünnt und gsüesst. De mythisch Soma aber chunnt vom Himmel, wo ursprüngli au d Haimet vo de Somapflanze gsii isch.

Kult und Vereerig[ändere | Quälltäxt bearbeite]

De Soma isch a de Götter gopferet wore und de Donnergott Indra werd i de Vede as starche Somatrinker bischribe. Aber au di andere Götter trinket de Soma, demit si Unsterblichkait erlanget. De Somasaft isch ase wichtig gsii, as er vergöttlicht woren isch und im Rigveda sind öber 120 Hymne nöd nume em Saft und a de Pflanze sondern au em Gott Soma gwidmet. Im Hinduismus isch de Gott Soma mit dem Moogott Chandrama verschmolze.

„Die Somatröpfe,
die uuspresste ufem Opferstrau
die, Indra, trink, zur Stärchig!“ Rigveda I,16,5

Haoma[ändere | Quälltäxt bearbeite]

De Soma isch scho vo de Indoarier hergstellt wore und bi de Iraner het de Saft Haoma ghaisse, wa luutlich exakt mit Sanskrit Soma öberiistimmt. Wie de Soma wachst au de Haoma i de Berge und sini Stengel weret uuspresst. De geeli Saft isch denn mit Milch verdünnt wore.

Büecher[ändere | Quälltäxt bearbeite]

  • Hans Wilhelm Haussig (Hg.): Götter und Mythen des Indischen Subkontinents. Stuttgart: Klett-Cotta (1984). ISBN 3-12-909850-X