Brihaspati

de Brihaspati

De Brihaspati (Sanskrit: हस्पति, Bṛhaspati m.), mengisch oo Brahmanaspati, isch im Hinduismus de Priester vo de Götter und ghöört zo de Navagraha, da sind die nüü Planeete i de hinduistische Astrologii. Er entsprecht em Planeet Jupiter.

Mythologie

Im Rigveda helft de Brihaspati em Donnergott Indra im Champf gege de Dämoon Vala. Debii bifrait er mit Hilff fo Zauberlieder d Chüe, wo dee gfange bhaalte hett. Spööter isch de Brihastpati zom Gott vom Planeet Jupiter wore und isch de Soo vom Waise Angiras. De Brihaspati hett d Tara („Stern“) ghüroote. Die aber isch vom Moogott Chandra graubt wore. Dromm isches zom Chrieg choo. De Indra und d Götter hend mitem Brihaspati gchämpft, de Rudra, de Ushanas und d Danava und d Daitya hend de Chandra onderstützt. Im End hett de Brahma bifole, as si Frede schlüsse müend und as d Tara wider zom Brihaspati gfüert weri. Si isch aber schwanger gsii und hett e Bueb, de Budha uf d Welt broocht, wo de Gott vom Planet Merkur isch. Drufabe isch es wider zom Striit choo, well baidi, de Brihaspati und de Chandra gsait hend, si saied de Vatter. D Tara hett den zueggee, as de Chandra de Vatter isch. De Brihaspati hett mit de Mamata de Waisi Bharadvaja züügt.

Literatuur

• Hans Wilhelm Haussig (Hrsg.): Götter und Mythen des indischen Subkontinents (= Wörterbuch der Mythologie. Abteilung 1: Die alten Kulturvölker. Band 5). Klett-Cotta, Stuttgart 1984, ISBN 3-12-909850-X, S. 54 f.
• Brihaspati. In: John Dowson: A classical dictionary of Hindu mythology and religion, geography, history, and literature. Trübner & co., London 1879, S. 63–64.