Baanhof vo Choblez (CH)

Us der alemannische Wikipedia, der freie Dialäkt-Enzyklopedy
dr Uerdinger Schiinebus z Choblez

Dr Baanhof vo Choblez ligt chly usserhalb vo dr Ortschaft Choblez im Schwiizer Kanton Aargau.

Wo di Schwiizerischi Nordoschtbahn (NOB) d Linie vo Turgi uf Waldshuet am 18. Augschde 1859 eröffnet hed, isch au dä Baanhof, als letschde vor dr Landesgränze, in Betrib gno worde.

Ane 1876 isch den d Baanstreki vo Winti uf Choblez und ane 1892 d Linie vo Choblez uf Stei-Säckinge derzue cho. Sider isch dr Baanhof z Choblez e richtige Chrüzigsbaanhof gsi.

Dr Baanhof isch nid noch bim Dorf Choblez am Rhy bout worde, sondern am Ändi vom Aaretaal underhalb vom Hügel, wo Hard heisst, grad a dr Gränze vo Choblez zu dr Gmeind Chlingnau. Do dermit hed me d Linie uf dr Nordsyte vom Baanhof im ene Boge durs Taal vom Apelööbach und dur en Dunnel zu dr Rhybrügg chönne füere. Eso überkweert d Streki dr Rhy im rächte Winkel und hed e gnueg längi Rampe, zum vom Baanhof Choblez zum Baanhof vo Waldshuet die zwänzg Meter, wo dr Höheunderschid isch, z styge.

D Streki vom Baanhof Stei-Säckinge über Loufeburg chunt über ne längi Brügg mid ere Kurve über d Aare zum Baanhof vo Choblez.

Zum Baanhof ghöre au no es Depoo für d Lokomotyve us em Joor 1859, wo under Dänkmolschutz stoot,[1] und en Güeterschuppe. Dr Veräin Dresynesamlig Fricktaal bruucht hüt s alte Depoo. Es Wärchgleis goot vom Baanhof zum Chraftwärch Chlingnau. Im 2013ni hed d SBB dr Baanhof modärnisiert.

Literatur[ändere | Quälltäxt bearbeite]

Fuessnoote[ändere | Quälltäxt bearbeite]

  1. Dossier Bahnhof Koblenz (Memento vom 12. April 2017 im Internet Archive), Denkmalpflege des Kantons Aargau.