D Basiliske-Brünne

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Äine vo de Basler Basiliske-Brünne am Undere Rhiiwääg
Dialäkt: Baseldütsch

As Basiliske-Brunne bezäichnet mä grüeni Brünne mit eme Basilisk druf in dr Schwizer Stadt Basel, wo s e Hufe von ene in dr ganze Stadt git.

In de 1880er Joor isch z Basel e Wettbewärb für e Stadtbrunne usgschriibe worde und 1884 het dr Wilhelm Bubeck, wo denn Diräkter vo dr Basler Gwärbschuel gsi isch, dä Wettbewärb mit em Basilisk, wo dr Basler Schildhalter isch, gwunne. Druf het mä nüünzää Basiliske-Brünne in dr Stadt ufgstellt und spööter no di no si no drissig drzue choo. E baar si wider verschwunde, so dass es hüte no öbbe drissig sonigi Brünne in dr Stadt Basel git.

Alli Basiliske-Brünne si gegen e Rhii grichdet, usser de Brünne uf dr Chläibasler Site, wisawii vom Münster. Dr Grunde isch, dass d Turiste won e Foti vom Münster mache, nit d Hindersite vom Brunne uf em Bild häi, sondern die vorderi.

Äine vo de Basiliskebrunne, dä an dr Augustinergass, stoot under Dänggmolschutz und zelt as e Baasler Kulturguet, wo für d Region vo Bedütig isch.

Beschriibig[ändere | Quälltäxt bearbeite]

Dr Basilisk mit em Stadtwabbe isch us Bronse und dr Räst us Gussiise gmacht. S Wasser chunnt us em Muul vom Basilisk und fliesst in e runds Becki, wo ussenooche mit verschidnige Muster verziert isch. Dr Stockfuess het d Form von ere Urne. Unden am Fuess befindet sich e chliises Drinkschäleli für d Hünd (oder anderi Dier).

Basiliske-Brünne in andere Stedt[ändere | Quälltäxt bearbeite]

D Stadt Basel het iire Partnerstedt mänggisch en originals Basiliske-Brünneli gschänkt, und eso cha mä sä in de letschte Joor au in andere Stedt finde.[1] Sogar im Zentrum vo dr Stadt Züri - wo jo mit dr Stadt Basel zwar äng verbunde aber nit genau befründet isch - stoot sit 1983 e Basiliskebrunne. Witeri Brünne het s in verschiidene Stedt im Elsass, in Süddütschland z Nöijeburg am Rhii[2] und z Huuse im Wiisedaal[3], in dr Nordwestschwiz, z Shanghai und z Wien[4].

Weblingg[ändere | Quälltäxt bearbeite]

Fuessnoote[ändere | Quälltäxt bearbeite]

  1. [1]
  2. Website vo Nöijeburg am Rhii (Site cha nüme abgrüeft wärde; Suche im Webarchiv)[2] [3] Vorlage:Toter Link/www.neuenburg.de, abgrüeft am 31-12-2012
  3. Website vo Huuse im Wiisedaal Archivlink (Memento vom 2. Jänner 2011 im Internet Archive), abgrüeft am 31-12-2012
  4. Kunst und Kultur in Wien, abgrüeft am 31-12-2012