Theater Basel

Dialäkt: Baseldütsch

S Theater Basel isch s Schdadttheater vo der Schdadt Basel. Im Spiilblan schdöhn Schauschbiil, Opere, Operette und Ballett. Wil s Theater Basel kei eignigs Orchester het, wird im allgemeine s Sinfoniiorchester Basel verpflichdet. An Barockopereproduktione schbiilt s Barockorchester La Cetra vo dr Schola Cantorum Basiliensis, wo vom Paul Sacher gründet worden isch. Sit dr Saison 2006/2007 wird au mit dr basel sinfonietta zsämmegschafft. Für d Eröffnig vo dr Operesaison 2007/2008 isch zum erschde Mol s international bekannte Kammerorchester Basel engagiert worde, für ä Neuproduktion vom Mozart siiner Entführig). S Theater het sich mit siine Opereuffüehrige e Name gmacht, und d Fachzitschrift Opernwelt het s 2009 und 2010 zum Operehuus vom Johr gwehlt.

Dr Name Theater Basel wird sit 1968 bruucht, wo s Privattheater „Komödie“, wo 1950 gründet worden isch, as Schauschbiilhuus zum Basler Stadttheater cho isch.

Baugschicht

Theaterbrand 1904

S Basler Schdadttheater isch 1834 gründet worde as s Theater uf em Blömli. S erschde Gebäud isch vom klassizischdische Architekt Melchior Berri baut worde und het 1'300 Blätz gha, was ä bedrächtligi Grössi gsi isch für ä Schdadt wie Basel, wo denn nume 26'000 Iiwohner gha het.

1873-1875 isch an dr gliiche Schdell ä vierrängigs Barock-Gebäud vom Johann Jakob Stehlin em Jüngere baut worde, wo am 7. Oktober 1904 im enä Brand zerschdört, aber denn widr ufbaut worden isch. 1909 isch d Widreröffnig gsi.

Noch em Bau vom jetzige Gebäud mit siinere charakterischtische unregelmässige Form und em gschwungene Dach, wo 1975 eröffnet worden isch, isch s alte Huus gschbrängt worde. Dr Bau het dr Kanton Basel-Stadt 60 Millione Franke koschdet. Der Blatz, wo s Theater dra lit, isch än offeni Flechi mit Bäum zringsum. Bemerkenswärt si d Kunschdwärk us Iise vom Richard Serra und vom Jean Tinguely (dr Fasnachtsbrunne - mechanischi Wasserschbiil zmitzt im enä Brunne.)

S Theater Basel het im grosse Huus faschd 1'200 Blätz, die Chliini Bühni im gliiche Gebäud het meh as 320 Blätz. D "Komödie" in der Steinevorstadt, wo im Johr 1950 gründet worden isch, het 600 Blätz gha. Si isch im Herbscht 2001 gschlosse worde und isch ersetzt worde vom Schauschbiilhuus, wo vom Architekturbüro Schwarz-Gutmann-Pfister us Basel blant und im Januar 2002 an der Steinedoorschdrooss ufgmacht worden isch. Es het Blatz din für öbbe 480 Zueschauer.

Diräkter

• 1954–1960 Hermann Wedekind
• 1968–1975 Werner Düggelin
• 1975–1978 Hans Hollmann
• 1978–1988 Horst Statkus
• 1988–1993 Frank Baumbauer
• 1993–1994 Wolfgang Zörner
• 1994–1996 Hans-Peter Doll
• 1996–2006 Michael Schindhelm
• seit 2006 Georges Delnon

Schauschbiildiräkter

• 1968 - 1975 Werner Düggelin
• - 2003 Stefan Bachmann
• 2003 - 2006 Lars-Ole Walburg
• seit 2006 Elias Perrig

Galerii

• 

  S Theater Basel (im Hindergrund d Elisabethechille), 2009

• 

  S Foyer vom Theater Basel, 2009

• 

  D Fassade vom Theater Basel zur Steinedoorstrooss, 2009

• 

  S Schauspiilhuus an dr Steinedoorstrooss, 2009

Weblingg

 Allmänd (Commons): Theater Basel – Sammlig vo witere Multimediadateie

• D Website vom Theater Basel
• D Website vom Sinfoniiorchester Basel

Dä Artikel basiert uff ere fräie Übbersetzig vum Artikel „Theater_Basel“ vu de dütsche Wikipedia. E Liste vu de Autore un Versione isch do z finde.