Spanische Fussballnationalmannschaft der Männer

Us der alemannische Wikipedia, der freie Dialäkt-Enzyklopedy
Hops zue: Navigation, Suech
Spanie
España
Logo vo de schpanische Nationalmannschaft
Spitznäme La Selección,
La (Furia) Roja
Verband Real Federación Española de Fútbol
Konföderation UEFA
Technische Sponsor adidas
Trainer Vicente del Bosque, seit 2008
Kapitän Iker Casillas
Rekordtorschütz David Villa (46)
Rekordspiiler Andoni Zubizarreta (126)
FIFA-Code ESP
FIFA-Rang 2. (1565 Punkte) (Stand: 26. Mai 2010)[1]
Team colours Team colours Team colours
Team colours
Team colours
 
Heim
Team colours Team colours Team colours
Team colours
Team colours
 
Auswärts
Bilanz
580 Spiil
328 Siig
138 Unentschiide
114 Niiderlage
Statistik
Ersts Länderspiil
Spanien Spanie 1:0 Dänemark Dänemark
(Brüssel, Belgie; 28. August 1920)
Höchste Siig
Spanien Spanie 13:0 Bulgarien Bulgarie
(Madrid, Schpanie; 21. Mai 1933)
Höchsti Niiderlag
Italien Italie 7:1 Spanien Spanie
(Amsterdam, Niderlande; 4. Juni 1928)
Ängland Ängland 7:1 Spanien Spanie
(London, Ängland; 9. Dezember 1931)
Erfolg bi Turnier
Wältmeisterschaft
Endrundeteilnahme 13 (Ersti: 1934)
Besti Resultat Final 2010
Europameisterschaft
Endrundeteilnahme 8 (Ersti: 1964)
Besti Resultat Europameischter 1964, 2008
Konföderatione-Pokal
Endrundeteilnahme 1 (Ersti: 2009)
Besti Resultat Dritter 2009
Olympischi Summerspiil
Silber 1920
(Stand: 7. Juli 2010)

Di schpanischi Fuessballnationalmannschaft (span.: La Selección española de fútbol) isch d Uswahl vom schpanische Fuessballverband Real Federación Española de Fútbol. Schpanie isch im 1964 und im 2008 Europameischter gsi.

Gschicht[ändere | Quälltäxt bearbeite]

Frühi Johr[ändere | Quälltäxt bearbeite]

De erschti Match vo Schpanie gäge Portugal, am 18. Dezember 1921 z Madrid.

Wi fascht überall z Kontinentaleuropa isch de Fuessball au uf Schpanie vo Ängland us cho. Schpanie isch eis vo de Gründigsmitglid vo de FIFA gsi, het aber zu dere Zit no kein natiponale Verband gha. Dodefür de Verein Madrid F.C., s hütige Real Madrid Schpanie verträte. Di erschti Mannschaft isch für di Olympische Spil im 1920 z Antwerpe ufgschtellt worde und het s erschti Länderschpil am 28. Ougschte 1920 z Brüssel gäge Dänemark gha. Schpanie het den Match 1:0 gwunne. Zum Schluss vom Turniir het Schpanie d Silbermedaille übercho und wäge sinere Art z spile ihre Übernäme, wo si bis hüt hei: la furia roja (alem.: di roti Furie). S erschti Mol z Schpanie het d Mannschaft am 7. Oktober 1921 z Bilbao gschpilt, gäge Belgie, wo si 2:0 gwunne het. Bi de Olymische Spil im 1924 und im 1928 isch Schpanie jewils gäge Italie usgschide, einisch in de Vorrunde, bim zweite Mol im Virtelfinal. En bsunderer Match isch im 1929 s Spil gäge Ängland gsi, will Schpanie gwunne het und des für d Ängländer di erschti Nidelag gäge es Team isch gsi, wo nöd vo de Britische Insle isch gsi.

Erschti Wältmeisterschaftsteilnahm[ändere | Quälltäxt bearbeite]

Im 1930i het Schpanie uf e Teilnahm an de WM z Uruguay verzichtet gha, isch dann aber im 1934 z Italie derbi gsi. Nach eme Unentschide gäge Italie im Virtelfinal hets es Widerholigsspiil gäh, wo Schpanie 1:0 verlore het. De Match isch sehr umschtritte gsi und de Schiizer Schiri isch im Aaschluss ans Spil vo sim Verband läbeslang gschperrt worde.[2][3] Wägem Schpanische Bürgerchrieg het Schpanie in de nächschte Johr kei Länderspil me ustrage.

Nach em zwoite Wältchrieg[ändere | Quälltäxt bearbeite]

Schpanie het dann wider bi de WM im 1950i z Brasilie teilgnoh. D Mannschaft isch in d Finalrundi cho und isch derte 4. worde. Im 1954i und im 1958i het sich s Team nöd chönne qualifiziire. Wo im 1954 d UEFA gründt worde-n-isch, isch Schpanie eis vo de Gründigsmitglider gsi. Us politische Gründ het’s Franco-Regime de Nationalmannschaft d Teilnahm an de EM im 1960i verbote, will s Team hetti müesse uf Moskau reise und gäge d Sowjetunion spile. D UEFA het dänn s Hin- und s Rückspil jewils mit 3:0 für d Sowjetunion gwertet.[4] Im 1964i, wo d EM dann z Schpanie schtattgfunde het, het di Schpanisch Nationalmannschaft gäge d Sowjetunion im Final gwunne und isch Europameischter worde. Nch dem Erfolg isch es nüm so guet gloffe. Schpanie het sich hüfig nöd chönne qualifiziire oder isch, wi bi de WM 1962, 1966 und 1978 und bi de EM 1980 scho in de Vorrundi usgschide. Au di Heim-WM im 1982, wo d Schpanier so vil Hoffning hei gha, isch enttüschend gsi. Schpanie isch in de Zwüscherundi usgschide.

Spanischi Spiiler mit em Pokal bi der EM-Fiir 2008.

Im 1984i hets dann zu de Vizeeuropameischteschaft glangt, wo me z Frankriich gäge de Gastgeber de Final verlore het. Bi de nächschte Turnir isch für Schpanie dann meischt im Virtelfinal Schluss gsi: Bi de WM 1986 gäge Belgie im Penalty-Schüsse, bi de WM 1994 gäge Italie, bi de EM 1996 gäge Ängland im Penalty-Schüsse, bi de EM 2000 gäge Frankriich und bi de WM 2002 gäge Südkorea. Bi de WM 1998 isch Schpanie scho in de Vorrundi usgschide. Bi de EM 2008 z Öschtriich und in de Schwiiz isch Schpanie dann zum zwoite Mol Europameischter worde. Im Endschpil het s schpanische Team z Wien gäge Dütschöand 1:0 gwunne.

WM 2010 z Südafrika[ändere | Quälltäxt bearbeite]

Bi de Wältmeischterschaft z Südafrika im 2010 het Schpanie de Uftaktmatch gegä d Schwiiz 1:0 verlore, aber di nächschte Match alli gwunne. Zum Schluss hei si sich im Endschpil gäge d Niderländer mit 1:0 in de Verlängerig chönne düresetze und hei so de Titel gholt.

Einzelnochwis[ändere | Quälltäxt bearbeite]

  1. FIFA/Coca-Cola-Weltrangliste. In: fifa.com, Mai 2010. Abgerufen am 4. Juli 2010.
  2. Die schwarze Liste. In: ballesterer fm. 2006-06-01. Abgrüeft am 2010-05-30. (de)
  3. WM-Historie: Highlights ohne Ende. In: Stern. 2006-06-21. Abgrüeft am 2010-05-30. (de)
  4. Als Spanien und Russland fast die EM sprengten. In: Der Spiegel. 2006-06-21. Abgrüeft am 2010-05-30. (de)