Jean Baptiste Girard

Dr Jean Baptiste Girard, si Name as Franziskaner isch Père Grégoire gsi, (* 17. Dezämber 1765 z Freiburg im Üechtland; † 6. Merz 1850 z Freiburg), isch e Schwiizer Pedagog gsi.

Er het z Luzärn und z Würzburg Theologii studiert. As Pfarrer und Agstellte vo dr Helvetische Regierig het er vil für s Schuelwäse gleistet. Vo 1804 bis 1824 isch er Diräkter vo de Primarschuel z Freiburg gsi. 1824 isch er as Geistlige noch Bärn grüeft worde, spöter isch er Profässer für Philosophii am Lyzeum vo Luzärn gsi. 1834 isch er in s Chloster z Freiburg zrugg.

Dr Girard isch ganz vom Pestalozzi siine Ideä über d Erziehig überzügt gsi, sit er 1810 im amtligen Ufdrag vo dr Dagsatzig d Astalt z Yverdon mit andere bsuecht und über si brichtet het.

1850 het d Freiburger Regierig bim Bärner Bildhauer Joseph Simon Volmar für e Girard e Dänkmol bstellt. Es isch zäh Johr spöter iigweiht und denn no mit Relief vom Raphael Christen ergänzt worde.

Wärk

• De l'enseignement régulier de la langue maternelle dans les écoles et dans la famille, Paris 1844
• Cours éducatif de la langue maternelle, Paris 1840–48, 6 Bände

Weblingg

• Artikel Girard, Jean Baptiste im Historische Lexikon vo dr Schwiiz
• Literatur vu un iber Jean Baptiste Girard im Katalog vu dr Dytsche Nationalbibliothek

Dä Artikel basiert uff ere fräie Übbersetzig vu dere Version vum Artikel „Jean_Baptiste_Girard“ vu de dütsche Wikipedia. E Liste vu de Autore un Versione isch do z finde.