Heidi Abel

Dialäkt: Baseldytsch

D Heidi Abel (* 21. Februar 1929 z Basel, † 23. Dezämber 1986 z Zyri) isch e Schwyzer Färnsee- und Radio moderatori gsi.

Biografi[ändere | Quälltäxt bearbeite]

D Heidi Abel hett noch dr Matuur am Basler Maidligymnasium und noch dr Usbildig a dr Kunschtgwärbschuel z Basel zeerscht als Operatrice und Asagere bi dr Basler Radio- und Kabelgsellschaft Radibus gschafft und denne als Asagere, vor allem aber au Moderatori und Redaktori fyr verschideni Sändige bim Schwyzer Färnsee z Zyri. Si isch e Färnseefrau vo dr erschte Stund bim dämzumoll junge Schwyzer Färnsee und e brägends Gsicht vom Färnsee vor dytsche Schwyz (DRS) gsi.

D Heidi Abel het Kindersändige wie Die Welt ist rund (D Wält isch rund), Was man weiss und doch nicht kennt (Was me weiss aber doch nit kennt), und e Hufe vo Noochrichte-, Diskussions- und Unterhaltigssändige moderiert, wie "Heidi Abel sucht Plätze für Tiere (Heidi Abel suecht es Plätzli fyr Tier), DRS-aktuell, Musik und Gäste (Musik und Gescht), Telefilm und anderi mee. Zletscht hett si d Sändig "Karambuli" moderiert. D Heidi Abel isch au am Schwyzer Radio DRS z heere gsi (Talk-Show "Persönlich" (Perseenlig)).

Am 23. Dezämber 1986 isch d Heidi Abel z Züri an Kräbs gstorbe.

1986 isch dur s Legat vo dr Heidi Abel dr Innovationsfonds vo dr Stiftig fyr Apassti Technologi und Sozialökologi (SATS) vom Ökozentrum Langebruck begrindet worde.

Eerige[ändere | Quälltäxt bearbeite]

D Heidi Abel het zahlriichi Uszeichnige fyr ihr Schaffe bikoo: 1956 en Uszeichnig vom spanische Färnsee als beschti Sprächere, 1976 dr MUT-Priis fyr bsunderi Verdienscht um dr Mensche-, Umwält- und Dierschutz, 1983 dr "Tele"-Priis fyr d Gsprächsfyerig in dr Sändig "Telefilm". Im 2000 isch d Heidi Abel postum von ere Färnsee-Zittschrift zur Schwyzer Färnseefrau vom 20. Johrhundert gwehlt worde.

Z Zyri isch uf si dr Heidi-Abel-Wäg tauft worde.