Der Attentäter

Filmdate
Dütsche Titel	Der Attentäter
Originaltitel	Der Attentäter
Produktionsland	Deitschland
Originalsprooch	Deitsch
Lengi	90 Minute
Stab
Regie	Rainer Erler
Dräibuech	Hans Gottschalk
Muusig	Eugen Thomass
Kamera	Werner Kurz
Bsetzig
Dr Fritz Hollenbeck als Georg Elser D Ruth Kähler als d Else Härlen D Doris Denzel als d Maria Schmauder Dr Werner Schramm als Vadder Schmauder D Ilse Künkele als d Frau Schmauder Dr Ulrich Matschoss als Kommissar Huber Dr Lothar Grützner als Nebe D Ingeborg Lapsien als d Frau Krantz Dr Gustl Bayrhammer als Payerl Dr Ossi Eckmüller als Hausbursch D Marianne Lindner als d Maria Strobel Dr Franz Loskarn als Nachtwächder D Franziska Liebing als d Frau Baumann, D Ursula Herion als d Frau Lehmann Dr Willy Harlander als Niederdorfer Dr Ludwig Wühr als Brög Dr Rolf Schimpf Dr Willy Anders Dr Ernst A. Hartung Dr Walter Starz

Dialäkt: Schwäbisch

Der Attentäter ischt a deitsch-franzeesisch-italienisch-eschtreichischer Fernsehfilm us-em Jôhr 1969 vom Regisseur Rainer Erler, wo s missglickte Attentat uff da Adolf Hitler durch da schwäbischa Schreiner Georg Elser zom Gegastand hôt. S Drehbuach hôt dr Schwôb Hans Gottschalk geschriiba. Dui Titlroll ischt mit-em Fritz Hollenbeck besetzt wôrra. Z Deitschland isch der Film zom erschda Môl am 9. Novembr 1969 em Programm vo dr ARD ausgschdrahlt wôrra. Federfihrend fir d ARD isch dr Siddeitsche Rundfunk (heit Sidweschtrundfunk [SWR]) en Stuegert gwäa.

Handlong

Scho bevor dr Adolf Hitler an d Macht komma ischt, isch’r koi Garant fir da Friida en Eiropa gwäa. Dr Georg Elser, a schwäbischer Schreinergsell vo dr Oschtalb, siht dui Gfahr vo-ma Kriag deitlich am Horizont raufziah. Drom hôt’r sich zom Ziil gsetzt, dui Kadaschroof mit älle Mittl zo vrhendra. Mit-ra eiserscht graußa Sorgfalt bäschtlet’r a Zeitbomb, wo am 8. Novembr 1939 em Minchner Birgerbreikeller explodiira on da Hitler en da Dod reißa soll. Dui Bomb gôht zwar los ond richdet an vrheerenda Schada ôô, abr dr deitsche Dikdador hôt – ganz em Gegasatz zo seira iblicha Gwohnet – dui Vrsammlong scho a baar Menudda friher vorlassa ond ischt uff dui Weis em Ôschlag entganga.

An dr deitsch-schweizerischa Grenz wuud dr Georg Elser vrhafdet. Er geit zua, fir dui Explosioo vrantwortlich zu sei, streidet abr ab, irgendwelche Ufftraggeaber ond Kompliza ghet zo han. Kurz vôr-em Ende vom Zwoida Weltkriag wuud’r em Konzentrazionslager Dachau vo de Nazis ombrôcht.

Eigflochda en dui Handlong send a baar Gschbräch mit Augazeiga, wo bei dr Herstellong vo deam Film noh gleabt hend:

• Dr Schreinermoischtr Friedrich Grupp,
• dr Georg Vollmer, Eigatimer vo-ma Stoibruch, wo dr Georg Elser a Zeitlang gschafft ond Kenntnis en dr Schbrengtechnik erwôrba hôt,
• d Ruth Schmitt, wo em Georg Elser a Wohnong vrmiadet ghet hôt,
• dr SS-Obrgrubbafihrer Friedrich Karl Freiherr von Eberstein, wo dômôls dr Polezeipräsident vo Mincha gwäa ischt,
• dr KZ-Aufseher Franz Lechner ond
• dr Leonhard Elser, em Georg Elser sei jengerer Bruader.

Auszoichnonga

• Grimme-Preis en Gold
• DAG-Preis

Kridik

• Dr Evangelische Film-Beobachter moint, «Der Attentäter» wär a diskussionswirdigs Fernsehschbiil mit-ra graußa Dichte.

Weblink

• Der Attentäter in dr Internet Movie Database