Békés

Békés
Komitatssitz	Békéscsaba
Flächi	5631,05 km² (7. Platz)
Ywohnerzahl	376'657 Ywohner (2008, 11. Platz)
Bevölkerigsdichti	66,8 Ywohner pro km²
Dialekt	Theiß-Dialekt (Tiszai nyelvjárás)
ISO-3166-2-Abchürzig	HU-BE

S Komitat Békés (ung. Békés megye, IPA: ['be:ke:ʃ,mɛɟɛ], ungarndütsche Name: Bekesch) isch eins vo de 19 Komitat vo Ungarn. S litt im Südoste; de Komitatssitz heißt Békéscsaba.

Geografischi Lag

Békés litt in de Große Ungarische Diefebeni uff zimlig flachem Bode. De höchst Punkt ligt z Battonya im Süde vom Komitat uff 106, de diefst zwüsche Szarvas und Békésszentandrás uff 81 Meter.

Im Weste gränzt s Komitat Csongrád a, im Nordweste Jász-Nagykun-Szolnok und im Norde Hajdú-Bihar. Internationali Gränze git s numme zu Rumänie im Oste bis Süde.

Gschicht

Di erschti Besydlig, wo belegt werre cha, isch etwa im 5. bis 4. Johrdausend vor Christus gßi. Mer bezeichnet sälli Sydler als Körös. Nochdem d Ungare um 900 dört acho ßin, hän si di vorgfundene Sydlige usbaut, deno ßin si aber durch de Yfall vo de osmanische Türke vernichtet worre. Erscht im 18. Johrhundert ßin Züewanderer uss verschydene Länder uff Békés cho.

Bevölcherig

Z Békés git's Ywohner mit zimlig vyl verschydene Nationalitäte. Numme 6,2 Brozänt vo de Ywohner ßin im Johr 2001 Yheimischi gßi. Slowakischi Immigrante konzendriere sich z Békéscsaba, z Szarvas und z Tótkomlós, rumänischi z Méhkerék und z Kétegyháza und serbischi z Battonya. D'Roma läbe im ganze Komitat verstreut. Friehner hän au Dütschi (Donauschwobe) e nänneswärte Adeil vo de Bevölcherig usgmacht (z.B. z Elek), si ßin aber noch em Zweite Wältchrieg verdrybe worre.

Ab de 1940er-Johr hät d'Bevölcherig kontinuierlig abgnoh; im Johr 1941 hät Békés numme no ungfähr 477'000 Ywohner gha. Säll isch d'Folg vo de Industrialisierig gßi; d'Lüt ßin in urbaneri Gebiet wie zum Bispyl Budapest abgwandert, wyl si im erschte Wirtschaftssektor durch Maschine ersetzt worre ßin und's im zweite und dritte Sektor nit gnüeg Arbetsblätz gha hät.

Tourismus und Sehenswürdigkeite

Gröschti Touristestädt vo Békés ßin Gyula, Szarvas, Orosháza, Mezőhegyes und d Hauptstadt Békéscsaba. Z Békéscsaba isch de Mihály Munkácsy uff d Wält cho; mer cha drum 21 Gmälde vo ihm besichtige. Z Gyula git s e bekannts Thermalbad und usserdem e Burg uss Zygel. Kulinarischi Beriehmtheite ßin d Würscht vo Csaba und Gyula sowie d Gänsläber vo Orosháza.

Ungarndütschi Ortsnämme

Ungarndütschi Ortsnämme im Komitat Békés

• Almáskamarás - Almasch
• Elek - Elek
• Gyula - Jula
• Mezőberény - Berin

Weblink

 Allmänd (Commons): Komitat Békés — Witeri Mulitimediadateie zum Artikel

• Internetufftritt (uff ungarisch)
• Ungarndütschi, mit ere Lischt vo dütsche Ortsnämme