Annemarie Düringer

D Annemarie Düringer (* 26. Novämber 1925 z Arlise, Kanton Basel-Landschaft; † 26. Novämber 2014 z Baden, Nidereschtrych, Eschtrych) isch e Schwyzer Schauspiileri gsii.

Lääbe

Uusbildig

D Annemarie Düringer isch d Dochter vun Schwyzer Induschtriälle Heinrich Düringer un dr Marie Roider gsii. Ufgwachsen isch si z Muri bi Bärn. Noch em Abschluss vu dr Uusbildig an ere Bärner Handelsschuel het si anne 1946 z Paris am Cours Simon e Schauspiiluusbildig aagfange, wu si ab 1947 zwai Johr lang am Wiener Max Reinhardt Seminar furtgsetzt het.

Bihnekarriere

Anne 1949 isch si Ensemblemitglid vum Burgtheater z Wien wore, wu si bis zue ihrem Dod gspiilt het. Si het unter anderem am Berliner Schillertheater (in s Schillers Räuber oder in s Molières Don Juan) gaschtiert, im Theater am Kurfürstendamm (Lavinia in s O’Neills Trauer muss Elektra tragen), an dr Münchner Chammerspiil un am Bayerische Staatsschauspiil un au bi dr Salzburger Feschtspiil. Dr Annemarie Düringer ihre Repertoire isch brait gfächeret gsii: si het in klassische un au in modärne Inszenierige gspiilt, unter anderem isch si in Stuck vu Aischylos, Gorki, Grillparzer, Hauptmann, Ibsen, Miller, Pinter, Shakespeare, Strindberg, Tschechow oder Wedekind uf dr Bihni gstande.

Dr Annemarie Düringer isch anne 1963 dr Titel „Kammerschauspielerin“ verlihe wore. Si isch mit dr meeschte vu dr große Schauspiilerine un Schauspiiler vum 20. Johrhundert, wie zum Byschpel em Werner Krauß oder dr Paula Wessely uf dr Bihni gstande. Ändi 2000 het si am Wiener Akademietheater unter dr Reschy vum Peter Zadek di aberglaibisch Huushälteri Frau Helseth in s Ibsens Rosmersholm gspiilt. Aini vu ihre bekannteschte Rolle isch d Frau Zittel in s Thomas Bernhards Heldenplatz unter dr Reschy vum Claus Peymann gsii.

Filmkarriere

Anne 1953 isch si zum erschte Mol vor dr Kamera gstande. Dr Regisseur Ernst Marischka het si zum Film Feldherrenhügel gholt, wu si an dr Syte vum Heinz Conrads gspiilt het. Speter sin wyteri Filmrolle chuu, z. B. in Du bist die Welt für mich (1953), in Gefangene der Liebe (1954), in Die Stadt voller Geheimnisse (1954), in Ewiger Walzer (1954), Ein Mann vergisst die Liebe (1955), Der 20. Juli (1955) oder in Oberwachtmeister Borck (1955). In dr Filmadaption vum Stuck Vor Sonnenuntergang vum Gerhart Hauptmann het si 1956 d Inken Peters an dr Syte vum Hans Albers gspiilt. Im Thriller Nachts, wenn der Teufel kam het mer si 1957 unter anderem mit em Mario Adorf un em Claus Holm gsää; fir ihri Laischtig isch si 1958 im Ramme vu dr Berlinale mit em Bundesfilmpryys uuszaichnet wore. Anne 1961 het si näb em Heinz Rühmann in dr Komödie Der Lügner gspiilt.

Au internationali Filmerfolg het si ghaa in ihre Karriere: z. B. het si dr Victor Vicas in sym Spionagedrama Count Five and Die (1958) bsetzt un in SOS – Gletscherpilot (1959).

Dr Schwyzer Reschiseer Franz Schnyder het er anne 1958 d Roll vum Änneli in dr Gotthelf-Verfilmig Die Käserei in der Vehfreude gee un speter d Roll vu dr Sophie in sym Zweedailer iber s Gotthelfs Anne Bäbi Jowäger (1960/62). No 1962 isch si sältener uf dr Lyynwand z sääne gsii: 1970 het si d Frau Jenny in s Kurt Frühs Dällebach Kari gspiilt, 1976 d Mrs. Müller in Schatten der Engel vum Daniel Schmid, 1978 het si im Churzfilm Bourbon Street Blues vum Douglas Sirk mitgwirkt un 1982 het si d Dr. Marianne Katz in s Rainer Werner Fassbinders Die Sehnsucht der Veronika Voss gspiilt.

Verainzlet het si au in Färnsehfilm gspiilt, zum Byschpel in dr Färnsehfassig vu Berlin Alexanderplatz (1980), in dr Tatort-Folg Mord auf Raten (1980), in Das Gläserne Wappen (1983) oder Die Gunst der Sterne (1988) un in s Wedels Meedailer Der große Bellheim (1993). Im Sissi-Filmporträt Wie eine schwarze Möwe (1998) het si d Erzherzogi Sophie gspiilt.

Anne 2002 isch d Annemarie Düringer wider in ere chlaine Kinofilmroll in Gebürtig erschine, dr Verfilmig vum glychnamige Roman vum Robert Schindel. 2006 het si andr Syte vum John Malkovich d Roll vu dr Mueter vum Gustav Klimt in dr Filmbiografy Klimt vum Raúl Ruiz gspiilt. Im nämlige Johr het si im Schwyzer Kinofilm Die Herbstzeitlosen d Roll vu dr Frieda Eggenschwyler gspiilt. Anne 2013 het si d Hauptroll in Lovely Louise unter dr Reschy vu dr Bettina Oberli gspiilt.

D Düringer isch im Novämber 2014 an ihrem 89. Geburtstag im eschtrychische Baden gstorbe.

Uuszaichige

• 1958: Bundesfilmpryys fir Nachts, wenn der Teufel kam (Beschti Näbedarstelleri)
• 1963: Ernännig zur „Kammerschauspielerin“
• 1968: Ehrechryz fir Weeschaft un Chunscht 1. Klasse
• 1974: Hans Reinhart-Ring
• 1977: Kainz-Medallie
• 2000: Alma-Seidler-Ring
• 2001: Doyenne vum Wiener Burgtheater
• 2005: Guldi Ehrezaiche fir Verdienscht um s Land Wien
• 2010: Ehrering vum Wiener Burgtheater
• Ehremedallie vu dr Bundeshauptstadt Wien in Gold
• Großes Ehrezaiche vu dr Republik Eschtrych

Schrifte

• Marie-Theres Arnbom: Blitzlichter. Erinnerungen von Annemarie Düringer. Molden, Wien 2003, ISBN 3-85485-099-9.

Literatur

• Julia Danielczyk: Annemarie Düringer. In: Andreas Kotte (Hrsg.): Theaterlexikon der Schweiz. Band 1. Chronos, Zürich 2005, ISBN 3-0340-0715-9, S. 501 f.

Weblink

• Annemarie Düringer in de Internet Movie Database (änglisch)
• Hansruedi Lerch: Düringer, Annemarie. In: Historisches Lexikon vo dr Schwiiz.

Fueßnote

Dä Artikel basiert uff ere fräie Übersetzig vu dere Version vum Artikel „Annemarie_Düringer“ vu de dütsche Wikipedia. E Liste vu de Autore un Versione isch do z finde.