Amaunet

Us der alemannische Wikipedia, der freie Dialäkt-Enzyklopedy

D Amaunet, au Amunet, Amentet u.s.w., isch en altägyptischi Göttin gsi. Noch de Pyramide Text isch si mit ihrem männlige Gegestück, em Amun, eini vo de Urgötter gsi.[1] Sit dr Spotziit het si zur Götterachtheit vo Hermopolis ghört. Aber im Gegesatz zum Amun het si nume e relativ chliini Rolle gspilt.

Rolle[ändere | Quälltäxt bearbeite]

D Amaunet isch e Schutzgöttin gsi. Vor allem d Pharaone haig si beschützt und häig sä in ihrem Schatte versteckt und ernährt, wie uf eme Relief dr Philip Arrhidaeus. Si haig au an de königliche Dronbestiigige und de Jubileumsfester deilgnoh, wie's vom Thutmosis III. überliiferet isch. Si isch mänggisch mit dr Neith und dr Jusaaset, dr Urmueter vo de Götter, identifiziert worde.

Name und Usgseh[ändere | Quälltäxt bearbeite]

Ihre Name wird in dr Hieroglypheschrift
M17mn&n&t
gschriibe[2] und bedütet die Versteckti. Im Tämpel vo Deir el Medina wird si as die Grossi, d Herrschere vo de beide Länder (d. h. Ober- und Underägypte) gnennt.[3]

Es git nume wenig Darstellige von ere. Z Karnak git s e Amaunetstatue, wo si as Frau mit dr Rote Chrone vo Unterägypte zeigt. Wie die andere Göttine vo dr Achtheit wird au sii as Schlange oder as Schlangechöpfigi Frau abbildet.


Fuessnote[ändere | Quälltäxt bearbeite]

  1. M. Lurker, Lexikon der Götter und Symbole der alten Ägypter, Scherz 1998, S.41
  2. Erman, Adolf & Grapow, Hermann, 1926–1953. Wörterbuch der aegyptischen Sprache im Auftrage der deutschen Akademien. 6 vols. Leipzig: J. C. Hinrichs'schen Buchhandlungen. (Neue Auflage Berlin: Akademie-Verlag GmbH, 1971) 1, 85.3-7
  3. P. Du Bourguet, "Le temple de Deir al-Médina: textes édités et indexés par Luc Gabolde" (MIFAO 122), Le Caire 2002.