Wikivoyage

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen
Wikivoyage
S Logo vo Wikivoyage
URL
Kommerziäll Nei
Bschryybig Wikiprojekt für en frye Reisefüehrer
Regischtrierig optional
Sproche 17
Eigetimer Wikimedia Foundation
Urheber Wikivoyage-Community
Erschine 10. Dezämber 2006

Wikivoyage isch es Wikimedia-Projäkt zur Erschtellig vomene frye Reisefüehrer. Im Vordergrund von Wikivoyage schtaht d Bereitstellig vo praktisch aawändbarem Wüsse zu Reiseziel und Reisethemene. D Bezeichnig setzt sich us „Wiki“ und em französische Wort „voyage“ für Reis zäme.

Z Dütschland gits syt Septämber 2006 en überregional tätige Verein, Wikivoyage e. V. S Projäkt isch syt em 10. Dezämber 2006 im Internet verfüegbar. Es verschtaht sich i jeder Hiisicht als fry: Sini Inhält schtönd under de Copyleft-Lizänz Creative Commons Attribution-ShareAlike, wo au e kommerzielli Nutzig zuelaht, und sie sind sowohl als Online- als au als downloadbari Offline-Version fry und unentgältlich verfüegbar.

Ab Mitti 2012 het's Beschtrebige gäh, Wikivoyage zuekünftig als Projäkt vo de Wikimedia Foundation wyterzfüehre. Im Novämber 2012 sind d Artikel und Mediendatye uf Server vo de Wikimedia Foundation überträit worde. Syt em 15. Jänner 2013 isch es offiziell es Wikimedia-Projäkt.

Gschicht[ändere | Quälltäxt bearbeite]

Logo vo Wikivoyage (2006–2012)

Im Oktober 2004 hend es paar Autore und Adminischtratore vom Online-Reisefüehrer Wikitravel de Uufbuu vonere dütsche Version plant. Bsunders im dütschschprachige Ruum isch d Enttüschig gross gsii, wo am 20. April 2006 de Verchauf vo wikitravel.org a s Internet-Wärbeundernäme Internet Brands bekanntgäh worden isch.[1] Die zuesätzlichi Unzfriedeheit mit em Füehrigsstil vom Projäkt het zum Entschluss vo de meischte dütsche Adminischtratore und Autore gfüehrt, s Projäkt als Abschpaltung fortzsetze.

Nach ere halbjährige Vorbereitigsphase het sich am 30. September 2006 z Schtuegert de als gmeinnützig anerchännti Verein Wikivoyage gründet, wo Eigetümer vo de Domains und Betryber vo de Webserver isch. Am 10. Dezember 2006 isch s Projäkt im Internet mit em vo Wikitravel übernuuene Datebeschtand gschtartet. Bereits vier Mönet schpöter sind scho 30 % vom Artikelbeschtand nüü gsii.

S dütschschprachige Wikivoyage isch am Aafang s Einzige gsii. Mer het d Mediedate und d Verwaltig vo de Nutzerzuegäng aber bereits uf ene mehrschprachigi Nutzig vorbereitet.

Churz nach em Schtart het Wikivoyage über de gröschti wiki-basierti Beschtand a Reiseinformatione im dütschschprachige Ruum verfüegt. Au wenn s no einigi Lückene gäh het, sind bischpielswys für d Reiseziel Ägypte, Thailand und Schwiiz oder fürs Reisethema Velofahre bereits umfangrychi Informatione verfüegbar gsii. Trotz em damals no gringe Beschtand vo öppe 4500 Artikel Ändi Juni 2007 isch s Projäkt bereits es Medie-Thema gsii, grad au i de Schwiiz.

Am 10. Dezember 2007 isch mit em italienische Wikivoyage die zweiti Schprachversion eröffnet worde.

Organisation und Betrieb bis November 2012[ändere | Quälltäxt bearbeite]

Ähnlich wie d Wikipedia het Wikivoyage vo Aafang a die fryi Software MediaWiki ygsetzt, um e aamäldigsfryi, internetbasierti Nutzig und die eigeni Autoreschaft z ermögliche. D Qualitätssicherig isch glych wie bi Wikipedia mittels wächselsytiger Kontrolle dur d Nutzer erfolgt.

Uf Wikivoyage isch aber en anderi Lizänz, d Creative Commons Attribution-ShareAlike-Lizänz, ygsetzt worde. Das het under anderem d Härschtellig vo druckte Füehrer juristisch vereifache sölle. Für Bilder und anderi Medie hets nid die glyche Lizänze gäh. Im Gägesatz zue de Text isch d Verwändig vo gmeinfrye oder doppelt lizänzierten (GNU, Creative Commons) Mediedatye aagschträbt worde.

Im Gägesatz zue Lexika sind d Artikel dütlicher hierarchisch glideret worde. Artikel, wo zum glyche Thema ghöred, sind sowohl mit de vo de Mediawiki-Software bekannte Kategorye als au mit ere «Brösmelinavigation», wo d Zueghörigkeit zu andere Artikel aazeigt, gruppiert worde. Im Artikelnamensruum wärded aber kei Kategorye gfüehrt.

Zur Trännig vo verschidene Theme sind verschideni Namensrüüm ygsetzt worde. De Hauptnamensruum het Reiseziel i ihrere geografische Hierarchie umfasst. Zwei wyteri Namensrüüm sind de Reisetheme und Reisenachrichten vorbehalte gsii. En ängi Verflächtig vo Reiseziel und -theme isch möglich gsii.

„Wikivoyage“ isch vom überregional tätige Verein Wikivoyage e. V. mit Sitz z Halle betriebe worde und het sich us Schpände und Mitgliedsbyträg finanziert. Em Verein ghöred Mitglieder us ganz Dütschland und us de Schwiiz aa. De Verein gits au wyterhii und er het de Name Wikivoyage lizänziert. Er schträbt d Anerchännig als thematischi Organisation vo de Wikimedia Foundation aa. Die inhaltlichi Gschtaltig isch Sach vo den Autore bzw. vo de Community, nid vom Verein, gsii.

Als Wikimedia-Schwöschterprojäkt[ändere | Quälltäxt bearbeite]

Logo vo Wikivoyage (2012/13)

Am 20. März 2012 isch es Vorschtandsmitglied vo Wikivoyage e. V., de Roland Unger, vom James Heilman, em Presidänt vom kanadische Wikimedia-Chapter und Mitglied vom Sister Projects Committee zur Etablierig vo nüüe Projäkt vo de Wikimedia Foundation, aagfragt worde, öb Wikivoyage nid mit de Wikimedia Foundation zämeschaffe wöll.[2] De James Heilman het mehreri unzfrideni Autore und Adminischtratore vom änglische Wikitravel verträte, wo sälber nid öffentlich ufträte sind und ihri Diskussion inere „konschpirative“ Google-Gruppe duregfüehrt hend.

D Frag isch no gsii, öb denn Reiseführer-Informatione förderwürdigs Wüsse darschtellid. Zmindscht het die Frag schlussändlich bejaht wärde chönne. Am 27. Mai 2012 het de James Heilman de Vorschlag a d Wikimedia Foundation wytergleitet. Sim Vorschlag isch am 6. September 2012 zuegschtimmt worde.[3]

Uf de 13. Mitgliederversammlung vo Wikivoyage e. V. isch am 9. Juni 2012 z Köln bschlosse worde, Verhandlige mit de Wikimedia Foundation über es nüüs Schwöschterprojäkt uufznäh.[4][5]

Syt em 18. August 2012 betrybt Wikivoyage e. V. en wytere Server, um d Migration vo wytere Schprachversione voraaztrybe. Am 23. September 2012 isch die änglischi Version, am 29. September 2012 die niderländischi Version, am 3. Oktober 2012 die französischi Version, am 6. Oktober 2012 die schwedischi Version und am 18. Oktober 2012 die russischi Version frygäh worde.

D Wikimedia-Community het sich mehrheitlich für d Bybhaltung vom Namen Wikivoyage für s zuekünftigi Wikimedia-Schwöschterprojäkt entschiede.[6]

Mit de Vertragsunterzeichnung vom 3. November 2012 zwüsche de Wikimedia Foundation und Wikivoyage e. V. isch Wikivoyage es Projäkt vo de Wikimedia Foundation und es Schwöschterprojekt vo de Wikipedia worde. Öppe Mitti Novämber 2012 sind die bishär erschtellte Artikel uf Server vo de Wikimedia Foundation transferiert worde.

Am 15. Jänner 2013 isch de Schtart vom nüüe Wikimedia-Projäkt i damals sibe Schprache offiziell verchündet worde. Aber scho am 31. Mai 2013 het d Wikimedia Foundation s nüüe Projektlogo, wo d Community imene zweischtufige Prozäss gwählt het, ersetze müesse, wil s em Logo vo de Wälthandelsorganisation (WTO) z ähnlich sig.[7]

Geografischi Abdeckig[ändere | Quälltäxt bearbeite]

Die geografischi Abdeckig in de einzelne Schprachversione isch underschiedlich und hangt schtarch vo de Härkunft und de Vorliebene vo der Autoren bzw. Reisende ab. I de änglische Version handlet meh als e Viertel vo de Artikel über Reiseziel in de USA. Änglischschprachigi Länder sind mit über 50 Prozent vo de Artikel verträte. Mit grossem Abschtand die Reiseländer sind Länder wie Indie, s Vereinigti Königrych, Japan und Kanada uf de folgende Plätz. I de dütsche Version isch Dütschland mit über eme Viertel vo de Artikel füehrend, vor Ägypte, Schpanie, de Schwii und Öschtrych. Artikel über dütschschprachigi Länder sind nur zumene Drittel verträte. I de italienische und schpanische Version dominiered italienischi und schpanischi Reiseziel. Überdurchschnittlich starch sind in de dütsche Uusgab Artikel zue Ägypte und in de italienische zue Griecheland verträte. Underrepräsentiert sind Länder mit gringem Bruttonationalykomme und Länder vom südliche Afrika. Em Uusnahm bilded die südamerikanische Länder im schpanische Wikivoyage.[8]

Weblink[ändere | Quälltäxt bearbeite]

 Commons: Wikivoyage – Sammlig vo Multimediadateie

Einzelnachwys[ändere | Quälltäxt bearbeite]

  1. Erin Peacock: Internet Brands Acquires Wikitravel and World66 Online Travel Guides; Company Will Fund Growth of Two of the World’s Fastest Growing Wiki Travel Sites. In: Business Wire. 2006-04-20. Abgrüeft am 2013-09-13. (en)
  2. Anfrage an Wikivoyage von James Heilmann vom 20. März 2012.
  3. Ankündigung des Board of Trustees vom 6. September 2012 (auf Englisch)
  4. wp:kurier, Ausgabe 6/2012
  5. Unterlagen zur 13. Mitgliederversammlung des Wikivoyage e. V. vom 9. Juni 2012
  6. Travel Guide/Naming Process, eingesehen am 16. Oktober 2012.
  7. Michelle Paulson: Logo announcement. In: Meta-Wiki. 31. Mai 2013.
  8. Geographic Coverage of Wikivoyage, Information Geographies at the Oxford Internet Institute, eingesehen am 9. August 2014.



Information icon.svg Dä Artikel basiert uff ere fräie Übersetzig vum Artikel „Wikivoyage“ vu de dütsche Wikipedia.

E Liste vu de Autore un Versione isch do z finde.