Herbstträffe 2015

Us der alemannische Wikipedia, der freie Dialäkt-Enzyklopedy
Zur Navigation springen Zur Suche springen


Di bishärigi Diskussion findsch uf em Stammtisch.

Termiin: Samstig, 24. Oktober, am 11i.

Ort: CH-8840 Einsiedeln. Vo Züri us erreicht mer Äisele mit de Bahn i 45 Minute. D Züg fahred all halb Stund, z Wättischwiil umstiige.

Bsuechsprogramm[Quälltäxt bearbeite]

Chloschter und Dorf

Mier träffid üs am Bahnhof. Zäme gömmer d'Usstellig über de Mundartdichter Meinrad Lienert (1865–1933) go aaluege. Si isch de eigetlichi Grund und Uslöser für das Träffe. In ere Füehrig im Museum Fram lehred mier sicher vill über de Einsidler Dialäkt und s'Läbe und d'Literatuur vom Meinrad Lienert, denäbed aber au öppis wenigs über de Paracelsus und de Benziger-Verlag. D'Füehrig wird vo Wikimedia CH offeriert.

Nach em Mittagässe chömmer s'Chloster und s'Läbchueche-Museum besichtige. Es git am Namittag vom 2 bis Viertel vor 4i en öffentlichi Chlosterfüehrig. D'Läbchuechebeckerii Goldapfel mit de Schafböck stammt wie de Lienert us em vorletschte Jahrhundert und hed mit em Pilgertourismus z'tue.

Gspräch rund ums Projäkt[Quälltäxt bearbeite]

Churz vor üsem Träffe sind zwei quantitativi Meilestei erreicht worde (20'000 Artikel, devo 1000 Basisartikel, wo s in jedere Wikipedia gäh sött). Drum wärdid mier au über di wiiteri qualitativi Entwicklig vo de alemannische Wikipedia rede und das imene Protokoll dokumentiere.

Churzprotokoll[Quälltäxt bearbeite]

Gruppefoti

Zum Spotjohrs-Dräffe z Äisele chuu sin dr al-Qamar, dr B.A.Enz, dr Freiguet, dr Holder + sy Holdi un dr Pakeha.

Mir sin zerscht in s Museum Fram gange un hän dert e Fierig vum Walter Kälin dur d Uusstellig «Auf der Suche nach Meinrad Lienert» iberchuu. Noch em Zmidaag im «Pfaue» (dr Schwigervater vum Lienert isch dr Pfaue-Wirt gsii), hämer e Fierig mitgmacht dur s Chloschter Äisele, hän d Stiftsbibliothek un di Schwarz Madonna bewunderet. Au im härzige Läbchuechemuseum simer no gsii. Derno simer in s Gaschthuus Meinradsberg, schyns s ainzige Wirtshuus z Äisele, wu s kai Pizzeria din het un wu s derfir dr Chloschterwyy, e Leutschner, git. Dert simer no ne baar Stund ghockt un hän bappelet iber di Alemannisch un anderi Wikipedie, iber unsri 20.000 Artikel un d s Idiotikon-Redaktore-Projäkt. Derzue hämer dr Vorschlag, ass mer unsi alt Richtlinie abschaffe, ass d Dialäktvorlag nume in Artikel, wu zue dr Region vum Dialäkt basse, derf dryygsetzt wäre. Vorschleg fir s negscht Dräffe hämer no uf em Haimwäg dischpetiert: mer chennt emol e Dräffe mache bim Badische Werterbuech z Friburg, oder mol im Schwebische (villicht z Dibenga) un au dr Vorschlag vun eme meedägige Dräffe z Alagna Valsesia isch dischkeriert wore. Derzue het dr Pakeha scho mol yyglade zum WMCH-Brunch am 17. Jänner z Züri.

Zletscht nomol e härzlig Dankschen em Pakeha fir d Organisation vu däm Dräffe mit eme vylsytige un spannende Programm un au ne Dankeschen an Wikimedia CH fir d Ibernahm vu dr Cheschte vum Yydritt un dr Fierige! --Holder (Diskussion) 23:25, 25. Okt. 2015 (MEZ)

P.S.: No däre Lischt isch des s 20. Dräffe gsii, des isch is aber nit ufgfalle ... --Holder (Diskussion) 12:38, 26. Okt. 2015 (MEZ)