Westjordanland
S Westjordanland (arabisch الضفة الغربية, DMG aḍ-Ḍaffa al-Ġarbiyya, aḍ-Ḍiffa al-Ġarbiyya, hebräisch הגדה המערבית haGada haMa'arawit) oder Westbank (änglisch West Bank), au Cisjordanie, in Israel offiziell Judäa und Samaria (hebräisch יהודה ושומרון Jehuda we-Schomron), isch e Gebiet in Vorderasie westlig vo Jordanie und östlig vo Israel mit ere Flechi vo öbbe 5800 Kwadratkilometer; doodrvo si öbbe 220 Kwadratkilometer Wasser. 2012 het s gschetzt öbbe 2,4 Millione Iiwooner gha, 83 Brozänt Palestinenser und 17 Brozänt Juude, wo in öbbe 355 israelische Siidlige und iire Usseboste lääbe.[1]
S Gebiet isch in dr Biible as Siidligsgebiet vo verschiidene kanaanitische Völker bekannt, vor allem de Fönizier, de Samaritaner und de Hebräer. D Hebräer häi d Königriich Israel und Juda gründet. Im Lauf vo sinere lange Gschicht isch s Gebiet immer wider eroberet und bsetzt worde; Däil drvo häi zu de antike Riich vo Assur, Egüpte, Persie und Rom ghöört, spööter häi s d Abbaside erooberet, d Osmane und d Brite.
Noch em Erste Wältchrieg isch s Däil vom britischen Völkerbundsmandat für Palestina und d UN-Vollversammlig het s im Däiligsblaan vo 1947 für en arabische Staat reserwiert. D Araber häi das nid anerkennt und im Arabisch-Israelische Chrieg vo 1948 no mee vo däm Territorium verloore. Noch em Waffestillstand zwüsche de Araber und Israel het Jordanie s Gebiet bsetzt und 1950 annektiert. Im Säggsdaagchrieg vom Juni 1967 het s Israel erooberet und es stoot sit denn under israelischer Milidäärverwaltig, Ostjerusalem und si Umgääbig hingegen si vo Israel 1980 annektiert worde, was en UN-Sicherhäitsrootsresoluzioon[2] für völkerrächtswidrig erklärt het, im Underschiid zur jordanische Annexion, wo offesichtlig as koscher aagluegt worde isch. Sit 1993 wärde Däil vom Westjordanland, under anderem d Stedt Jericho, Nablus, Jenin, Tulkarem, Qalqilya, Ramallah, Bethlehem und 80 % vo Hebron, vo dr Palestinensische Autonomiibehörde (PNA) verwaltet.[3][1] D Aktiwidääte vo de jüüdische Siidler in de bsetzte Gebiet sorgen immer wider emol für Unrueje.
Weblingg
[ändere | Quälltäxt bearbeite]
Commons: Westjordanland – Sammlig vo Multimediadateie- Palestinian Central Bureau of Statistics (englisch)
Fuessnoote
[ändere | Quälltäxt bearbeite]- ↑ 1,0 1,1 CIA The World Factbook: West Bank. CIA, 20. Juni 2012, abgruefen am 9. Juli 2012.
- ↑ Resolution 478 des UN-Sicherheitsrates. Abgruefen am 20. Juli 2016.
- ↑ Joel Beinin: Press Information Notes 1: The Demise of the Oslo Process. MERIP, 26. März 1999, archiviert vom Original am 16. August 2000; abgruefen am 26. Juni 2017 (änglisch).